ELM VƏ TƏHSİL
UNEC: İqtisadiyyat və idarəetmə sahəsində magistr və doktorantların II beynəlxalq elmi konfransı keçirilir
Bakı, 29 may, AZƏRTAC
Azərbaycan Dövlət İqtisad Universitetinin (UNEC) 90 illik yubileyi münasibətilə mayın 29-da iqtisadiyyat və idarəetmə sahəsində magistr və doktorantların II beynəlxalq elmi konfransı təşkil olunub.
UNEC-dən AZƏRTAC-a bildirilib ki, konfransın açılış mərasimində universitetin rektoru, professor Ədalət Muradov, Təhsil nazirinin müavini Firudin Qurbanov, “Paşa Holdinq”in baş icraçı direktoru Cəlal Qasımov çıxış ediblər.
Rektor Ədalət Muradov Azərbaycan Prezidenti İlham Əliyevin məqsədyönlü siyasəti nəticəsində ölkəmizdə təhsilin keyfiyyətinin artırılması, milli təhsil sisteminin beynəlxalq sistemə inteqrasiyası istiqamətində zəruri addımlar atıldığını, müvafiq dövlət proqramları və strategiyanın qəbul edildiyini bildirib. Sənədlərdə tədrislə yanaşı, elmi tədqiqatların keyfiyyətinin artırılmasının da əsas vəzifə kimi qarşıya qoyulduğunu deyən rektor, UNEC-də bu istiqamətdə həyata keçirilən tədbirlərdən söz açıb. Dərəcəsindən asılı olaraq, impakt faktorlu jurnallarda dırc olunan məqaləyə görə müəllim, magistr və doktorantlara 4000 manatadək qonorar verildiyini, iqtisadiyyatın müxtəlif istiqamətləri üzrə universitetdə 31 elmi-tədqiqat mərkəzinin fəaliyyət göstərdiyini, UNEC Tədqiqat Fondunun təsis edildiyini diqqətə çatdırıb. Magistrlərin ikinci beynəlxalq konfransının UNEC-də keçirildiyinin təsadüfi olmadığını vurğulayan Ə.Muradov, ölkədə təhsil alan bütün magistrlərin 22 faizinin, MBA proqramı üzrə təhsil alan magistrlərin isə 67 faizinin UNEC-in payına düşdüyünü qeyd edib. Rektor ölkədə ilk dəfə olaraq beynəlxalq konfrans standartlarına cavab verən rəsmi conferences.az saytının qurulduğunu, dünyanın müxtəlif ölkələrinin magistr və doktorantlarını bir platformada toplayan konfransın beynəlxalq təcrübəyə uyğun olaraq təşkil edildiyini diqqətə çatdırıb.
Konfransda çıxış edən Təhsil nazirinin müavini Firudin Qurbanov UNEC-in 90 illik yubileyinə həsr olunan magistr və doktorantların beynəlxalq konfransının aktuallığını vurğulayıb. İqtisadiyyatın inkişafında ali təhsilin rolunun xüsusi önəm kəsb etdiyini diqqətə çatdıran nazir müavini Prezident İlham Əliyevin Sərəncamı ilə təsdiq olunan “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”nın əsas hədəflərini diqqətə çatdırıb.
“Paşa Holdinq”in baş icraçı direktoru Cəlal Qasımov ölkədə elmi tədqiqatların inkişafına töhfə verən beynəlxalq elmi platformanın yaradılmasını yüksək qiymətləndirib. İqtisadiyyat və idarəetmə ixtisası üzrə dünya magistr və doktorantlarını bir araya gətirən beynəlxalq konfransın ölkəmizin nüfuzu üçün böyük əhəmiyyət kəsb etdiyini diqqətə çatdırıb. O, “Paşa Holdinq”in korporativ sosial məsuliyyət siyasəti haqqında məlumat verib.
Konfransda ABŞ, Rusiya və Türkiyənin nüfuzlu ali təhsil müəssisələrinin magistr və doktorantlarının iştirakı ilə 4 dildə (Azərbaycan, ingilis, rus və türk) plenar çıxışlar olub. Azərbaycandan Kamal Mirzəyev “Strateji insan resursları sistemində təmin fəaliyyətinin ölçülməsi və qiymətləndirilməsi”, ABŞ-dan Sevinc Məmmədova “Təhsil və təlimin iqtisadiyyata təsiri”, Türkiyədən Sezgin Uysal “Siyasi risk və enerji qiymətləri arasındakı əlaqə” və Rusiyadan Aleksandr Lyaş “Maliyyə texnologiyalarına əsaslanan effektiv nağd idarəetmə” mövzularında plenar çıxışlarını onlayn təqdim ediblər.
Tədbirin açılış mərasimi UNEC-in rəsmi “Facebook” səhifəsi, “YouTube” kanalı və konfransın rəsmi saytından canlı olaraq Azərbaycan və ingilis dillərində yayımlanıb.
Konfransa təqdim edilən 431 məruzədən 325-i çıxış üçün seçilib, həmçinin konfransın xülasələr kitabı hazırlanıb. Distant formada təşkil olunan beynəlxalq konfransda ümumilikdə dünyanın 21 ölkəsindən 325 gənc tədqiqatçı 65 bölmədə məruzə ilə çıxış edəcəklər.
Mayın 31-dək davam edəcək beynəlxalq konfransın plenar müzakirələri “Zoom” proqramı vasitəsilə keçiriləcək. Məruzə ilə çıxış edən hər bir iştirakçıya seksiya bitdikdən dərhal sonra sertifikat onlayn göndəriləcək. Bundan başqa, seçilmiş keyfiyyətli tədqiqat işləri beynəlxalq ISBN nömrəsi ilə tam mətn məruzələr kitabı formatında onlayn nəşr olunacaq və konfransın rəsmi internet səhifəsində yerləşdiriləcək.