Astara, 10 may, Bağır Əliyev, AZƏRTAC

Mayın 10-da ölkəmizin cənub bölgəsində Azərbaycan xalqının ümummilli lideri Heydər Əliyevin anadan olmasının 94-cü ildönümü münasibətilə keçirilən anım mərasimləri böyük rəhbərə olan sonsuz məhəbbət və ehtiramın parlaq təcəssümünə çevrilib.

Həmin gün Astara şəhərinin mərkəzi meydanı bayramsayağı bəzədilmişdi. Buraya axın-axın insanlar gəlir, dahi şəxsiyyət Heydər Əliyevin adını daşıyan parkda ucaldılmış abidəsini ziyarət edirdilər.

AZƏRTAC xəbər verir ki, Astara Rayon İcra Hakimiyyətinin başçısı Qəzənfər Ağayev, yaşlı nəslin və gənclərin nümayəndələri, ictimaiyyətin təmsilçiləri, şəhər sakinləri Ulu Öndərin abidəsi önünə əklillər və gül dəstələri düzərək, xatirəsini ehtiramla anıblar.

Mərasim iştirakçıları Astara şəhərindəki Heydər Əliyev Mərkəzində böyük rəhbərin zəngin və mənalı ömür yolunu əks etdirən eksponatlar və fotoşəkillərlə tanış olublar.

Tədbir rayon icra hakimiyyətində Ulu Öndərin anadan olmasının 94-cü ildönümünə həsr olunmuş elmi-praktik konfransla davam edib.

Konfransda çıxış edən rayon icra hakimiyyətinin başçısı Qəzənfər Ağayev ümummilli lider Heydər Əliyevin Azərbaycan xalqı və dövləti qarşısındakı əvəzolunmaz xidmətlərindən danışıb. Qeyd olunub ki, ölkəmizdə, o cümlədən Astara rayonunun idarə, müəssisə və təşkilatlarında, mədəni-maarif müəssisələrində Ümummilli Liderin anadan olmasının 94-cü ildönümünə həsr olunmuş tədbirlərin keçirilməsi böyük rəhbərə olan ümumxalq məhəbbətinin təzahürüdür.

Bildirilib ki, Heydər Əliyev Azərbaycana rəhbərlik etdiyi dövrdə ölkəmiz geridə qalmış aqrar respublikadan çiçəklənən, yüksək inkişaf edən bir diyara çevrilib. O, Azərbaycan tarixində təkrarolunmaz rəhbər, qüdrətli dövlət başçısı kimi əbədiləşib. Bütün mənalı ömrünü xalqının və Vətəninin inkişafına sərf edən Ulu Öndər Azərbaycanı dünyaya tanıtdırıb. Xalqımızın xoşbəxt, firavan gələcəyi üçün etibarlı bünövrə yaradaraq, dövlət idarəçilik mexanizmini formalaşdırıb. Təcrübəli dövlət xadimi zamanın ən çətin və mürəkkəb sınaqlarından məharətlə keçərək Böyük Xilaskar rolunu oynayıb, bizə bugünkü müstəqil Azərbaycanı ərməğan edib.

Toplantıda rayon icra hakimiyyəti başçısının müavini, ictimai-siyasi və humanitar məsələlər şöbəsinin müdiri Yasəmən Rəsulovanın Ulu Öndərin anadan olmasının 94-cü ildönümü ilə bağlı məruzəsi dinlənilib.

Elmi-praktik konfransda Yeni Azərbaycan Partiyası Astara rayon təşkilatının sədri Firudin Əhmədov, Astara Rayon Veteranlar Şurasının sədri Rafiq Əliyev, “Astara” qəzetinin baş redaktoru Fəridə Ocaqova, Astara Pedaqoji Kollecin direktoru Ağababa İbrahimov və başqaları çıxış edərək, ulu öndər Heydər Əliyevin ölkəmiz üçün misilsiz işlər gördüyünü, Astaraya və astaralılara daim diqqət və qayğı göstərdiyini bildiriblər.

Tədbirdə ümummilli lider Heydər Əliyevin anadan olmasının 94-cü ildönümü ilə əlaqədar məktəblilər arasında keçirilən “Ən yaxşı təqdimat” respublika müsabiqəsində üçüncü yerə layiq görülmüş Astara şəhər 2 nömrəli tam orta məktəbin XI sinif şagirdi Leyla Əliyevaya rayon icra hakimiyyətinin fəxri fərmanı və qiymətli hədiyyə verilib.

X X X

Azərbaycan xalqının ümummilli lideri, görkəmli siyasətçi və dövlət xadimi Heydər Əliyevin anadan olmasının 94-cü ildönümü münasibətilə respublikamızın hər yerində olduğu kimi, Lənkəranda da silsilə tədbirlər keçirilib.

AZƏRTAC xəbər verir ki, mayın 10-da Lənkəran şəhərində Ulu Öndərin adını daşıyan xatirə parkında əsl xalq coşqusu və izdiham yaşanıb. Minlərlə rayon sakini buraya gələrək böyük rəhbərə hörmət və məhəbbətlərini ifadə ediblər.

Lənkəran Şəhər İcra Hakimiyyətinin başçısı Taleh Qaraşov, rayonun hüquq-mühafizə orqanlarının, idarə, müəssisə və təşkilatların rəhbərləri, ictimaiyyətin nümayəndələri Ümummilli Liderin abidəsi önünə gül dəstələri düzərək, xatirəsini ehtiramla anıblar.

Ulu öndər Heydər Əliyevin anadan olmasının 94-cü ildönümü münasibətilə Lənkəranda keçirilən ağacəkmə aksiyasında rayonun rəhbər işçiləri, idarə, müəssisə və təşkilatların nümayəndələri iştirak ediblər.

Həmin gün Lənkəran şəhərindəki Heydər Əliyev Mərkəzində Ümummilli Liderin mənalı ömür yolundan bəhs edən sənədli film nümayiş etdirilib, Lənkəran Regional Müalicə-Diaqnostika Mərkəzində talassemiyalı xəstələrə yardım məqsədilə qanvermə aksiyası keçirilib.

X X X

Müstəqil Azərbaycan dövlətinin memarı və qurucusu Heydər Əliyevin anadan olmasının 94-cü ildönümü Masallıda da böyük təntənə ilə qeyd olunub.

AZƏRTAC xəbər verir ki, mayın 10-da minlərlə rayon sakini Heydər Əliyev Parkına gələrək böyük rəhbərə olan sonsuz sevgi və məhəbbətlərini nümayiş etdiriblər.

Masallı Rayon İcra Hakimiyyətinin başçısı Rafil Hüseynov, müharibə və əmək veteranları, idarə, müəssisə və təşkilatların, ictimaiyyətin nümayəndələri Ümummilli Liderin abidəsi önünə gül dəstələri düzərək, xatirəsini ehtiramla anıblar.

Mərasimdə məktəblilərin ifasında Ulu Öndərə həsr olunmuş ədəbi-bədii kompozisiya nümayiş etdirilib.

Tədbir ağacəkmə aksiyası ilə davam edib.

X X X

Mayın 10-da Lerikdə ümummilli lider Heydər Əliyevin anadan olmasının 94-cü ildönümü ilə əlaqədar keçirilən anım mərasimində minlərlə rayon sakini iştirak edib.

AZƏRTAC xəbər verir ki, Lerik Rayon İcra Hakimiyyətinin başçısı Rövşən Bağırov, hüquq-mühafizə orqanlarının, idarə, müəssisə və təşkilatların rəhbərləri, ağsaqqallar və ictimaiyyət nümayəndələri Ulu Öndərin abidəsini ziyarət edərək, önünə tər gül-çiçəklər düzüblər.

Həmin gün rayonda keçirilən ağacəkmə aksiyası zamanı Heydər Əliyev və Bayraq meydanlarında, “Şəhidlər” abidə kompleksində, Lerik şəhərinin park və xiyabanlarında, Lənkəran-Lerik magistral avtomobil yolunun 50-56-cı kilometrliyində, Lerik-Qosmalian-Kəlvəz, Noda-Şingədulan-Xanəgah, Piran-Hamarat-Vijaker avtomobil yollarının kənarında, rayonun idarə, müəssisə və təşkilatlarının həyətlərində və ərazi icra nümayəndəliklərinə məxsus torpaq sahələrində 2800 ədədə yaxın müxtəlif növ ağac və gül kolu əkilib.

X X X

Cəlilabadda da ulu öndər Heydər Əliyevin xatirəsi anılıb.

AZƏRTAC xəbər verir ki, dahi rəhbərin anadan olmasının 94-cü ildönümü münasibətilə Cəlilabad Rayon İcra Hakimiyyətinin başçısı Əziz Əzizov, hüquq-mühafizə orqanlarının, idarə, müəssisə və təşkilatların rəhbərləri, rayon ictimaiyyətinin nümayəndələri Ümummilli Liderin abidəsi önünə gül dəstələri düzərək, xatirəsini ehtiramla yad ediblər.

Tədbir Heydər Əliyev Mərkəzində davam edib. Toplantıda çıxış edən rayon icra hakimiyyətinin başçısı Əziz Əzizov Ümummilli Liderin Vətən və xalq qarşısında əvəzolunmaz xidmətlərindən danışaraq, Azərbaycan dövlətçiliyinin bərpasında və möhkəmlənməsində böyük rəhbərin müstəsna xidmətləri olduğunu bildirib.

Qeyd olunub ki, müstəqil Azərbaycan Respublikasının memarı olan Heydər Əliyev ölkəni vətəndaş müharibəsi təhlükəsindən qurtarıb, geniş islahatların keçirilməsində, “Əsrin müqaviləsi”nin bağlanmasında böyük əmək sərf edib, gənc dövlətimizin beynəlxalq nüfuzunun artmasında misilsiz xidmətlər göstərib.

Diqqətə çatdırılıb ki, Ulu Öndərin siyasi kursu Prezident İlham Əliyev tərəfindən uğurla, dönmədən davam və inkişaf etdirilir.

Tədbirdə çıxış edən Yeni Azərbaycan Partiyası Cəlilabad rayon təşkilatının sədri Mirsüleyman Mirxaslı, Cəlilabad Rayon Ağsaqqallar Şurasının üzvü Ədalət Əsgərov və başqaları Ulu Öndərin Azərbaycan xalqı qarşısında xidmətlərindən danışıblar.

Həmin gün rayonda keçirilən ağacəkmə aksiyasında Bakı-Astara magistral yolunun Cəlilabad rayonundan keçən hissəsi boyunca 2500-dən çox müxtəlif növ ağac əkilib.