CƏMİYYƏT


Uşaq hüquqların qorunması və müdafiəsi Azərbaycan dövlətinin prioritetləri sırasındadır

Bakı, 1 iyun, AZƏRTAC 

1950-ci ildə BMT Baş Assambleyası tərəfindən 1 iyun tarixinin Uşaqların Beynəlxalq Müdafiəsi Günü kimi qeyd olunması barədə qərar qəbul edilib. Belə ki, həmin gün təşkil olunan Qadınların Beynəlxalq Konfransında uşaq hüquqlarının təmin edilməsi ilə bağlı təkliflər səsləndirilib və elə həmin tədbirdə də iyunun 1-nin uşaqların beynəlxalq müdafiəsinə həsr etmək qərarı verilib. Beləliklə, bundan sonra iyunun 1-i Uşaqların Beynəlxalq Müdafiəsi Günü kimi tarixə düşüb.

AZƏRTAC xəbər verir ki, bu fikirlər Milli Məclisin deputatı, Səhiyyə komitəsi sədrinin müavini, tibb elmləri doktoru Rəşad Mahmudovun 1 İyun - Uşaqların Beynəlxalq Müdafiəsi Günü, həmçinin ölkəmizdə uşaq hüquqlarının qorunması və müdafiəsi ilə bağlı məqaləsində yer alıb.

Məqalədə R.Mahmudov bildirir ki, bu beynəlxalq gün dünyanın əksər ölkələrində olduğu kimi, Azərbaycanda da yüksək səviyyədə qeyd edilir. Belə ki, Prezident İlham Əliyev ölkəmizdə uşaqlara dövlət qayğısının gücləndirilməsi istiqamətində müvafiq qərarlar qəbul edib, sərəncamlar imzalayıb. Təsadüfi deyil ki, dövlətimizin başçısının Sərəncamı ilə vətəndaş cəmiyyəti qurumlarının uşaq problemlərinə diqqətinin artırılması və ölkənin uşaqlarla bağlı demoqrafik perspektivlərinin müəyyənləşdirilməsi məqsədilə 2009-cu il Azərbaycanda “Uşaq ili” elan olunub. Bir sözlə, hər il ölkəmizdə iyunun 1-i tarixi xüsusi olaraq qeyd edilir və dövlətimiz tərəfindən uşaqların sağlam bir cəmiyyətdə formalaşması üçün müvafiq addımlar atılır.

Müəllif uşaq hüquqların qorunması və müdafiəsi sahəsində Heydər Əliyev Fondunun gördüyü işlərdən söhbət açıb. Diqqətə çatdırıb ki, Fondun rəhbəri, Birinci vitse-prezident Mehriban Əliyeva körpə balalara xüsusi diqqəti və qayğısı ilə seçilir. Uşaqların gələcək inkişafı üçün əlindən gələni əsirgəməyən Mehriban Əliyeva onların sağlamlığına xüsusi həssaslıqla yanaşır. Heydər Əliyev Fondu uşaqların sağlamlığını prioritet məsələlərdən biri kimi daim gündəmdə saxlayır və ehtiyacı olanlara yardımını əsirgəmir. Ölkəmizdəki bütün körpələrə ana qayğısı ilə yanaşan və nəcibliyi ilə insanların sevgisini qazanan Mehriban Əliyevanın göstərişi ilə çoxlu sayda körpə mürəkkəb əməliyyatlar keçirərək sağlamlığına qovuşub.

Tibb elmləri doktoru məqaləsinin sonunda yazır: “Ulu Öndər Heydər Əliyev uşaqları çox sevirdi və deyirdi: “Uşaqlar bizim gələcəyimizdir”. Həqiqətən, uşaqlar bizim gələcəyimizdir, ümidlərimizdir, arzularımızdır. Uşaqlar gələcəyin həkimi, müəllimi, xalqın elçisidirlər. Dövlətimizin, xalqımızın gələcək müqəddəratı məhz onların əlindədir. Gəlin, onları daha çox sevək və qayğı göstərək”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.