CƏMİYYƏT


Uşaqların hüquqlarının qorunması dövlət siyasətinin prioritetlərindəndir

Bakı, 20 noyabr, AZƏRTAC

Ailə, Qadın və Uşaq Problemləri üzrə Dövlət Komitəsi BMT-nin “Uşaq hüquqları haqqında” Konvensiyanın qəbul edilməsinin ildönümü münasibətilə ənənəvi silsilə tədbirlər həyata keçirir. Uşaqların hüquq və azadlıqlarının qorunması, onların qayğı ilə əhatə olunmaları, keyfiyyətli təhsil və yüksək standartlara cavab verən tibbi xidmətlərlə təmin edilmələri, hərtərəfli şəxsiyyət və layiqli vətəndaş kimi formalaşmaları Azərbaycan dövlətinin uşaq siyasətinin prioritet istiqamətlərini təşkil edir.

AZƏRTAC xəbər verir ki, Dövlət Komitəsinin (AQUPDK) təşkilatçılığı ilə noyabrın 20-də “Uşaq hüquqları: suallar və cavablar” mövzusunda dəyirmi masa keçirilib. Tədbirdə fəallığı, intellektual səviyyəsi ilə seçilən uşaqlar iştirak ediblər.

Dövlət himninin səsləndirilməsi ilə başlayan tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva 20 noyabr - Ümumdünya Uşaq Günü münasibətilə iştirakçıları təbrik edib. Uşaq hüquqlarının müdafiəsinin dünyada ən aktual məsələlərdən biri olduğunu qeyd edən A.Sofiyeva bildirib ki, bu əlamətdar gün 1954-cü ildən BMT Baş Assambleyasının təşəbbüsü ilə bütün dünyada qeyd edilir. Baş Assambleya 1959-cu il noyabrın 20-də Uşaq Hüquqları Bəyannaməsini, 1989-cu ilin həmin günündə isə Uşaq Hüquqları haqqında Konvensiyanı qəbul edib.

Komitə sədrinin müavini ümummilli lider Heydər Əliyevin hər zaman uşaqları diqqətdə saxladığını, onların hüquqlarının müdafiəsi istiqamətində mühüm addımlar atdığını diqqətə çatdırıb. Bildirib ki, Prezident İlham Əliyev tərəfindən uşaqların sağlamlığına, təhsilinə, layiqli vətəndaş kimi hərtərəfli inkişafına yönəlmiş tədbirlər həyata keçirilir, bu istiqamətdə uğurlu islahatlar aparılır. Vurğulayıb ki, Birinci vitse-prezident Mehriban Əliyevanın uşaqlara qayğısı və bu istiqamətdə həyata keçirilən sosial layihələr onların inkişafına, rifah halının yüksəldilməsinə xidmət edir.

Azərbaycanın bu sahədə bir çox beynəlxalq konvensiyalara qoşulduğunu qeyd edən sədr müavini bu istiqamətdə müxtəlif qanunlar qəbul edildiyini, fərmanlar imzalandığını diqqətə çatdırıb.

Ailə, Qadın və Uşaq Problemləri üzrə Dövlət Komitəsinin Aparat rəhbəri Ceyran Rəhmətullayeva uşaqların müdafiəsinin vacib məsələ olduğunu qeyd edib. Bildirib ki, uşaq hüquqlarının tam təmin edilməsi, problemlərinin ardıcıl həlli ölkəmizdə bu sahədə həyata keçirilən dövlət siyasətinin prioritet istiqamətlərindəndir. Son illərdə uşaqların hüquqlarının müdafiəsi, sağlamlığının möhkəmləndirilməsi, onların müasir tələblər səviyyəsində təhsil alması üçün davamlı tədbirlər həyata keçirilir.

Tədbirdə uşaq hüquqları, eləcə də internet vasitəsilə zorakılıq, ekologiya, cinsi istismar halları ilə bağlı müzakirələr aparılıb, təkliflər dinlənilib.

Qeyd edək ki, tədbirdən əvvəl Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Şüvəlan uşaq və ailələrə dəstək mərkəzindən gələn uşaqlarla görüşüb, onlara hədiyyələr təqdim edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.