SİYASƏT
XALQIN TALEYİNİ YAŞAYAN İNSAN
Bu sözlər Azərbaycan Prezidenti Heydər Əliyevin 80 illik yubileyi münasibətilə Daxili İşlər Nazirliyi Daxili Qoşunlarının Baş İdarəsində keçirilən təntənəli yubiley mərasimində səslənmişdir. Tədbiri giriş sözü ilə Daxili Qoşunların komandanı, polkovnik Zakir Həsənov açaraq Prezident Heydər Əliyevin dünyanın nadir şəxsiyyətlər ilə bir sırada dayandığını, yeni Azərbaycan dövlətinin qurucusu və xilaskarı olduğunu vurğulamış, bütün xalqımız kimi, Daxil Qoşunların şəxsi heyətinin də dövlətimizin başçısının yubileyini sonsuz ehtiram və sevgilərlə bayram etdiyini diqqətə çatdırmışdır.
Tədbirdə professor Vəli Əliyevin “Azərbaycan Prezidenti Heydər Əliyevin ömür yolu və fəaliyyəti zəngin həyat məktəbidir” mövzusunda məruzəsi dinlənmişdir. Daxili Qoşunların zabitləri Natiq İsmayılov, Təranə Məmmədova, Cəfərqulu Qurbanov və başqaları çıxış edərək Prezident Heydər Əliyevin xalqımız və dövlətimiz qarşısındakı xidmətlərindən, o cümlədən ordu quruculuğu sahəsindəki fəaliyyətindən danışmışlar.
Respublikanın daxili işlər naziri, general-polkovnik Ramil Usubov çıxış edərək dövlətimizin başçısının titanik səyləri ilə ölkəmizdə yaradılmış sosial-siyasi sabitlikdən, hüquq mühafizə orqanlarının fəaliyyətini gücləndirmək sayəsində görülən işlərdən, Daxili Qoşunların şəxsi heyətinin inkişafı üçün həyata keçirilən tədbirlərdən danışmışdır.
Tədbirin sonunda Azərbaycan Prezidenti, Silahlı Qüvvələrin Ali Baş Komandanı Heydər Əliyevə 80 illik yubileyi münasibətilə Daxili Qoşunların şəxsi heyətinin təbriki qəbul edilmişdir. Təbrikdə deyilir:
Möhtərəm Prezident!
Cənab Ali Baş Komandan!
Bu gün Daxili İşlər Nazirliyi Daxili Qoşunlarının bütün şəxsi heyəti doğma Azərbaycanın çiçəklənməsinə və qüdrətlənməsinə həsr etdiyiniz həyatınızın 80-ci ildönümünü böyük təntənə ilə qeyd edir. Yubileyinizə həsr olunmuş təntənəli mərasim iştirakçıları Sizi, xalqımızın müdrik və fədakar oğlunu ad gününüz münasibətilə təbrik edir, Sizə möhkəm cansağlığı, uzun ömür, Vətənimizin tərəqqisi naminə böyük əzmkarlıqla həyata keçirdiyiniz quruculuq işlərində nailiyyətlər arzulayırlar.
Möhtərəm Prezident!
Sizin, 1993-cü ilin iyun ayında xalqın çağırışı ilə hakimiyyətə tarixi qayıdışınızdan sonra zaman etibarı ilə qısa bir müddət ərzində əvəzsiz milli sərvətimiz olan müstəqilliyimizin qorunub möhkəmləndirilməsi, yeni iqtisadi münasibətlər sisteminin yaradılması, ölkəmizdə ictimai-siyasi sabitliyin bərqərar edilməsi, vətəndaş həmrəyliyinə nail olunması, əhalinin təhlükəsizliyinin və rifahının təmin edilməsi istiqamətlərində qazanılmış nailiyyətlər Azərbaycanın intensiv inkişaf dövrünə qədəm qoymasına şərait yaratmışdır. Artıq böyük fəxr hissi ilə demək olar ki, ölkəmizdə sosial-iqtisadi inkişafın yeni mərhələsinin möhkəm təməli qoyulmuşdur və ölkəmiz müstəqil inkişaf yolu ilə inamla irəliləyir. Suveren dövlət kimi Azərbaycan bütün dünyada tanınıb və dünya birliyində onun öz layiqli yeri vardır. Həyatınızın amalı hesab etdiyiniz Azərbaycan Respublikasının dönmədən inkişafının təmin edilməsi yolunda atdığınız hər bir uğurlu addım vətəndaşlara müstəqil dövlətimizin xoşbəxt gələcəyinə böyük inamla baxmağa əsas verir.
Cənab Ali Baş Komandan!
Müstəqil dövlətimizin təhlükəsizliyinin təminatçılarından olan Milli Ordumuz, eləcə də Daxili İşlər Nazirliyinin Daxili Qoşunları məhz Sizin Azərbaycana rəhbərlik etdiyiniz dövrdə hərtərəfli dövlət qayğısı ilə əhatə olunmuş və mühüm inkişaf yolu keçmişdir.
Dövlət quruculuğu prosesində Daxili Qoşunların fəaliyyətinin düzgün istiqamətdə təşkil edilməsi və qurulması işini çox əhəmiyyətli məsələlərdən biri kimi önə çəkərək bu yöndə qəbul etdiyiniz qərarlar və verdiyiniz göstərişlər qoşunların maddi-texniki bazasının möhkəmləndirilməsində, hərbi xidmətin və döyüş hazırlığının beynəlxalq standartlar səviyyəsinə yüksəldilməsində, şəxsi heyətin sosial təminatının yaxşılaşdırılmasında ciddi irəliləyişlərə səbəb olmuşdur.
Azərbaycanın ərazi bütövlüyü uğrunda döyüşlərdə Daxili Qoşunların xüsusi rolunu qeyd etməyiniz, eləcə də respublikada ictimai-siyasi sabitliyin yaradılmasında, qorunub saxlanmasında üzərimizə düşən vəzifələrin icrası ilə əlaqədar fəaliyyətimizi həmişə yüksək qiymətləndirməyiniz, hərbi qulluqçularımızı yüksək dövlət mükafatlarına layiq görməyiniz xidməti vəzifələrimizi daha nümunəvi yerinə yetirməyə, dövlətçiliyimizin keşiyində daim sayıq dayanmağa məsul edir.
Möhtərəm Prezident!
Cənab Ali Baş Komandan!
Daxili İşlər Nazirliyi Daxili Qoşunlarının şəxsi heyəti Sizi bir daha 80 illik yubileyiniz münasibətilə təbrik edir, Sizin rəhbərliyinizlə xalqımıza, müstəqil ölkəmizə, dövlətçiliyimizə xidmət etmək şərəfini hər şeydən uca tutur, bundan böyük qürur və iftixar hissi keçirir.
Əmin ola bilərsiniz ki, Azərbaycanın tərəqqisi, xalqımızın sosial-maddi rifahının yüksəldilməsi və xoşbəxt gələcəyi naminə uğurla apardığınız dövlət quruculuğu, sosial və hüquqi islahatlar kursunun həyata keçirilməsi işində Daxili İşlər Nazirliyinin Daxili Qoşunları Sizə etibarlı dayaq olacaq, bundan sonra da öz Ali Baş Komandanının bütün əmr və göstərişlərini layiqincə yerinə yetirəcəkdir.