CƏMİYYƏT


Xüsusi hərbi ixtisaslı sürücü müdavimləri arasında “Hərbi zəkalıyam” intellektual bilik yarışı keçirilib VİDEO

Bakı, 13 oktyabr, AZƏRTAC

Oktyabrın 13-də Səfərbərlik və Hərbi Xidmətə Çağırış üzrə Dövlət Xidmətinin “Hərbi Vətənpərvərlik və Mütəxəssis Hazırlığı Mərkəzi” MMC xüsusi hərbi ixtisaslı sürücü müdavimləri arasında “Hərbi zəkalıyam” intellektual bilik yarışı təşkil edib.

AZƏRTAC xəbər verir ki, tədbirdə çıxış edən Cəmiyyətin sədri Şahvələd Əliyev yarışın Azərbaycan Respublikasının dövlət müstəqilliyinin bərpasının 26-cı ildönümü ərəfəsində keçirilməsindən məmnunluğunu bildirib. O, müstəqilliyimizi əbədi və dönməz edən ulu öndər Heydər Əliyevin “Hər bir Azərbaycan gənci müstəqil dövlətimizin fəal qurucusu olmalıdır” sözlərini müdavimlərin diqqətinə çatdıraraq, onlara dahi şəxsiyyətin dərin məzmunlu fikirlərindən, mənalı həyatından və çoxşaxəli siyasi fəaliyyətindən nümunə götürməyi tövsiyə edib.

Xüsusi vurğulanıb ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin gənclərlə bağlı imzaladığı sərəncamlar, təsdiq etdiyi Dövlət proqramları onların hərtərəfli inkişafında mühüm rol oynayır. O, bunun əyani göstəricisi kimi dövlətimizin başçısının çıxışlarında gənclərin intellektual səviyyəsinin yüksəldilməsi və hərbi vətənpərvərlik ruhunda tərbiyələndirilməsi ilə bağlı fikir və tövsiyələrini, 2012-ci ildə imzaladığı Fərmanla təsis olunan “Hərbi Vətənpərvərlik və Mütəxəssis Hazırlığı Mərkəzi” MMC-ni, “Azərbaycan gəncliyi 2017–2021-ci illərdə” Dövlət Proqramının təsdiq edilməsi haqqında Sərəncamı və s. qeyd edib. Sədr Milli Ordumuz üçün mütəxəssis-əsgərlərin hazırlanması kimi şərəfli missiyanın Cəmiyyətin üzərinə düşdüyünü vurğulayıb, bu baxımdan belə yarışların gənc müdavimlərin hazırlıq keçdikləri xüsusi hərbi ixtisaslarla yanaşı, onların hərbi vətənpərvərlik ruhunun, intellektual səviyyələrinin və hərbi biliklərinin yüksəldilməsinə, çağırışaqədərki hazırlıqlarına xidmət etdiyini deyib.

Sonra yarışa start verilib. Turnirdə Cəmiyyətin Sabunçu, Xətai, Bakının Nizami, Binəqədi və Nəsimi rayon 1 nömrəli, Sumqayıt şəhər 1 və 3 nömrəli filiallarını təmsil edən komandalar iştirak edirlər. Yarışda hər komandanın tərkibində 5 nəfər olmaqla, ümumilikdə 35 müdavim mübarizə aparıb.

Maraqlı mübarizə şəraitində keçən yarışda Cəmiyyətin Binəqədi rayon filialının komandası 116 bal toplayaraq qalib olub. Nəsimi komandası 115 balla ikinci, Nizami komandası isə 84 balla üçüncü yerə layiq görülüb.

Qaliblərin mükafatlandırılması mərasimində çıxış edən Ş.Əliyev bildirib: “Hərbi zəkalıyam” intellektual bilik yarışının nəticələri bir daha göstərdi ki, “Hərbi Vətənpərvərlik və Mütəxəssis Hazırlığı Mərkəzi” MMC-nin filiallarında xüsusi hərbi ixtisaslara yiyələnmək istəyən çağırışçılar gələcəkdə Vətən qarşısında hərbi borclarını layiqincə yerinə yetirəcəklər. Onlar təkcə hərbi texnikanı mükəmməl idarə etmək qabiliyyətləri ilə deyil, mənəvi əxlaqi dəyərlərə sədaqətləri ilə də seçiləcək, bilikli və intellektual vətəndaş olacaqlar”.

O, yarışın gənc nəslin hərbi vətənpərvərlik ruhunda tərbiyəsi işinin təbliği məqsədilə qarşıya qoyulan məqsədə doğru növbəti uğurlu addım olduğunu, müdavimlərin iştirakı ilə müxtəlif səpkili tədbirlərin bundan sonra da təşkil ediləcəyini bildirib.

Mükafatlandırma mərasimində qalib komandaların üzvlərinə diplom və qiymətli hədiyyələr təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.