Bakı, 17 may, AZƏRTAC

Yeni Azərbaycan Partiyası (YAP) Səbail rayon təşkilatının və Səbail rayonu C.Əskərov adına 50 nömrəli tam orta məktəbin birgə təşkilatçılığı ilə Novruz Aslanov adına Cocuq Mərcanlı kənd tam orta məktəbinin bir qrup şagirdinin Bakıya səfəri reallaşıb.

AZƏRTAC xəbər verir ki, səfərdə Novruz Aslanov adına Cocuq Mərcanlı kənd tam orta məktəbindən 20 şagird, məktəbin direktoru Zamin Həziyev və 2 müəllim iştirak edir.

Cocuq Mərcanlı məktəbliləri Səbail rayonu C.Əskərov adına 50 nömrəli tam orta məktəbdə “Sinəsi dağlanmasın, bölünməsin bu torpaq” adlı tədbirdə iştirak ediblər.

Tədbirdə iştirak edən YAP Səbail rayon təşkilatının sədri, Milli Məclisin deputatı Şəmsəddin Hacıyev bildirib ki, Azərbaycan Ordusu Aprel döyüşlərində öz gücünü düşmənə göstərdi. Məhz bunun nəticəsidir ki, düşmənin silahlı qüvvələrindən bir kilometr aralıda yerləşən Cocuq Mərcanlı kəndində insanlar rahat şəkildə yaşayırlar. Azərbaycan Ordusuna güvənən Cocuq Mərcanlı sakinlərinin burada rahat şəkildə yaşadığını deyən deputat dövlətin onlara yeni iş yerləri, məktəb yaratdığını söyləyib.

Sonra C.Əskərov adına 50 nömrəli və Novruz Aslanov adına Cocuq Mərcanlı kənd tam orta məktəblərinin direktorları Sədaqət Həsənova və Zamin Həziyev Səbail rayon YAP təşkilatına bu cür tədbiri təşkil etdiyinə görə minnətdarlıqlarını bildiriblər. Qeyd edilib ki, bu tədbir məktəblilər arasında birliyi gücləndirir. Daha sonra məktəb direktorları təhsil ocaqlarının qardaşlaşması ilə bağlı niyyət protokolu imzalayıblar.

Tədbirin sonunda məktəblilərin hazırladığı kompozisiya nümayiş olunub.

Qeyd edək ki, üçgünlük səfər proqramı çərçivəsində məktəblilər Azərbaycan Xalça Muzeyində, Atəşgahda, Qala muzeyində və Yanardağda olacaqlar.