Zaqatalalı gənclərə “Təhsil və Karyera” layihəsi təqdim edilib

Zaqatala, 23 may, Mustafa Dadaşov, AZƏRTAC

Gənclərin İnkişaf və Karyera Mərkəzinin Zaqatala nümayəndəliyi rayon gənclərinə “Təhsil və Karyera” adlı layihə təqdim edib. Layihə çərçivəsində şəxsi inkişaf təlimçisi Şahnaz Şıxnəsirli tərəfindən gənclərə “Stresdən azad olunma” mövzusunda təlim keçirilib.

Nümayəndəlikdən AZƏRTAC-ın bölgə müxbirinə bildirilib ki, təlim zamanı gənclərə “Stresli olduğunuz zaman nə baş verir?”, “Streslə nə edə bilərsiniz?”, “Stresi idarə etmək üçün lazım olan texnikalar hansılardır?” və digər mövzular barədə ətraflı məlumat verilib, müzakirələr aparılıb, praktiki məşğələlər yerinə yetirilib.