İQTİSADİYYAT
® “Qazax Sement Zavodu” MMC nəhəng beton layihəsini uğurla tamamlayıb
“Qazax Sement Zavodu” MMC nəhəng beton layihəsini uğurla tamamlayıb.
Prezident İlham Əliyevin imzaladığı regionların sosial-iqtisadi inkişafı üzrə Dövlət proqramları ilə ölkəmiz inkişaf edərək sürətlə böyüyən iqtisadi resurslarla zənginləşir. Ölkə başçısı sənaye sektorunun inkişafına xüsusi diqqət ayırır, paytaxt və regionlarda müasir sənaye müəssisələri, iri nəqliyyat infrastruktur layihələri həyata keçirilir.
“Qazax Sement Zavodu” regionda böyük investisiya layihələri həyata keçirən müəssisələr sırasında yer tutub. Respublikada həyata keçirilən genişmiqyaslı tikinti layihələrində “Qazax Sement Zavodu” MMC fəal iştirak edir, layihələri yüksək keyfiyyətli sement və betonla təmin edir.
“Qazax Sement Zavodu” MMC sement istehsalı və satışı sahəsində nailiyyətlər qazandığı kimi, bu ilin əvvəlindən beton istehsalı sahəsinə də innovativ texnologiyaların tətbiqinə başlayıb, respublikada həyata keçirilən iri inşaat layihələrinin fəal iştirakçısına çevrilib. Beton sahəsinə gətirdiyi yeniliklərdən biri Azərbaycanda ilk dəfə olaraq Mobil Beton Laboratoriyanın istifadəyə verilməsi və Beton Leqo Blokların istehsalına başlaması olub.
“Akkord Beton”un cari ildə iştirak etdiyi nəhəng layihələrdən biri də “Azərbaycan Dəmir Yolları” QSC-nin sifarişi ilə Türkiyənin “İlk İnşaat Taahhüt Sanayi və Ticaret Anonim” şirkəti tərəfindən inşa olunan Pirşağı Yol-Tunel Layihəsini betonla təmin etməsi olub. Layihə dəmir yolu xəttinin altından yol-tunel xəttinin inşasını nəzərdə tutur. Layihə tələbi olaraq döşəmə betonu qısa müddətdə və fasiləsiz olaraq həyata keçirilməli idi. Bu il oktyabrın 18-də başlanan betonlama işləri oktyabrın 21-də uğurla tamamlanıb və “Akkord Beton” Azərbaycanda ilk dəfə olaraq 3 gün ərzində 8000 kubmetr tunel döşəmə betonunu fasiləsiz təmin edib. Betonun tikinti sahəsinə çatdırılması və vurulması işləri “Akkord Beton”a məxsus xüsusi betonqarışdıran və beton vuran maşınlarla həyata keçirilib.
“Qazax Sement Zavodu” MMC sement, beton sahəsində bu və ya digər uğurları barədə inşaat şirkətləri və KİV-ni məlumatlandırmaq üçün oktyabrın 22-25-də Bakı Sərgi Mərkəzində keçirilən “BakuBuild 2019” sərgisində iştirak edir. İnşaat sahəsinin vacib tədbirlərindən biri olan bu sərgidə respublikada fəaliyyət göstərən aparıcı inşaat şirkətləri ilə yanaşı, Avropa, Asiya və MDB ölkələrindən də 200-dək şirkət iştirak edir.
“Qazax Sement Zavodu” MMC xüsusi stendlə sərginin fəal iştirakçısı kimi çıxış edir və sərgi günləri ərzində qonaqlar və KİV nümayəndələrinə bu ilin uğurları, gələcək planlar və beton leqo blokların təqdimatını keçirir. Zavodun stendi sərginin ilk günündən müxtəlif dövlət qurumlarının, inşaat şirkətlərinin və KİV nümayəndələrinin böyük marağına səbəb olub, yeni tərəfdaşlarla işgüzar əlaqələr qurulub.