Xırdalan, 11 fevral (AZƏRTAC). Abşeron rayon Mədəniyyət evində rayon icra hakimiyyəti başçısı yanında Şuranın geniş iclası olmuşdur. İclasda 2011-ci ilin yekunları müzakirə olunmuş, 2012-ci il üçün vəzifələr müəyyən edilmişdir.

Tədbir iştirakçıları əvvəlcə Mədəniyyət evinin foyesində 2011-ci ildə rayonun inkişafı barədə təsəvvür yaradan stendlər və diaqramlarla tanış olmuşlar. Burada rayon ərazisində fəaliyyət göstərən dövlət və özəl sektor müəssisələrində istehsal edilən tikinti materialları, sənaye, ərzaq, kənd təsərrüfatı və digər sahələrə aid məhsulların sərgisi də təşkil edilmişdir.

Abşeron rayon icra hakimiyyətinin başçısı Zakir Fərəcov hesabat məruzəsi ilə çıxış etmişdir. Natiq bu il yanvarın 16-da Nazirlər Kabinetinin 2011-ci ilin yekunlarına həsr edilmiş geniş iclasında dövlətimizin başçısı İlham Əliyevin nitqinə istinadla bir sıra statistik məlumatları xatırlatmışdır. Qeyd edilmişdir ki, keçən il həyata keçirilmiş geniş investisiya proqramı çərçivəsində ölkə iqtisadiyyatına 20 milyard, o cümlədən daxili vəsaitlər hesabına 13 milyard ABŞ dolları həcmində sərmayə qoyulmuşdur. Valyuta fondunun həcmi artırılaraq 40 milyard ABŞ dollarına çatdırılmış, 900 minə yaxın vətəndaşın pensiyalarının məbləği təqribən 40 faiz artırılmışdır. Hazırda ölkə üzrə pensiyanın orta məbləği 180-190 dollara bərabərdir. Keçən il ölkədə 33 tibb müəsissəsi tikilmiş, 60-a yaxın məktəb, 4 olimpiya kompleksi və bır sıra başqa obyektlər istifadəyə verilmişdir. Z.Fərəcov bildirmişdir ki, bütövlükdə 2011-ci il qarşıya qoyulmuş sosial-iqtisadi vəzifələrin, infrastruktur layihələrin həyata keçirilməsi baxımından daha bir uğurlu il olmuşdur.

Hesabat məruzəsində rayon icra hakimiyyətinin fəaliyyətinin bütün spektri təsvir edilmişdir. Məruzəçi kənd təsərrüfatının, o cümlədən heyvandarlıq sahəsinin inkişafı məsələlərinə diqqət yetirmişdir. Belə ki, hesabat ili ərzində rayon üzrə 2785 ton ət, 37.444 ton süd, 90,6 milyon ədəd yumurta, 2740 sentner yun, 1195 ton meyvə, 6307 ton tərəvəz və 989 ton bostan məhsulları istehsal edilmişdir. Ötən il heyvandarlar üçün də uğurlu olmuşdur: cari ilin əvvəli üçün olan məlumata görə, rayonda 18.681 baş iribuynuzlu qaramal, 106.137 baş davar və 820.854 baş quş vardır.

Tikinti sahəsinə əsaslı vəsait qoyuluşu 2,2 dəfə artaraq 166,3 milyon manata bərabər olmuşdur. Elektrik, su və təbii qaz xətlərinin yenilənməsi və təmiri üzrə həyata keçirilmiş tədbirlər sadalanmışdır. Təhsil, səhiyyə, idman və mədəniyyət sistemində qazanılmış müsbət nəticələr də qeyd edilmişdir. Rayon rəhbərliyi vətəndaşların hər bir müraciətinə diqqətlə yanaşır.

Rayon icra hakimiyyətinin başçısı regional enerji təchizatı strukturunun fəaliyyətini tənqid etmiş, rayon sakinlərinin içməli su ilə təchizatının yaxşılaşdırılması planları, İdman ili çərçivəsində Olimpiya kompleksi və bir sıra idman qurğuları tikilməsi ilə bağlı tədbirlər haqqında məlumat vermişdir.

Şuranın iclasında rayon Maliyyə şöbəsinin rəisi Məhəmməd Köçərli, Polis şöbəsinin rəisi Namiq İsmayılov, Telekommunikasiya şəbəkəsinin rəisi Əyyub İsmayılov, Dövlət Sosial Müdafiə Fondunun rayon şöbəsinin rəhbəri Xanı Rüstəmov, Səhiyyə şöbəsinin müdiri Mehriban Qaralova, Təhsil şöbəsinin müdiri Nadir Ağayev və başqaları çıxış etmişlər. Onlar son illərdə Xırdalanda, rayonun qəsəbə və kəndlərində baş vermiş müsbət dəyişiklikləri qeyd etmiş, rayon icra hakimiyyətinin işini müsbət qiymətləndirmişlər.

Çıxış edənlər Prezident İlham Əliyevin hərtərəfli düşünülmüş, müdrik siyasətini dəstəklədiklərini bildirmişlər.

İşgüzar və konstruktiv şəraitdə keçən yığıncaqda bir sıra aktual məsələlər qaldırılmış, işgüzar təkliflər irəli sürülmüş, qarşıdakı vəzifələr barədə söhbət olmuşdur.

Rayonun idarə, müəssisə və xidmətlərinin xüsusilə fərqlənmiş işçilərinə Abşeron rayon İcra Hakimiyyətinin fəxri fərmanları təqdim edilmişdir.

Şuranın geniş iclasında Prezident Administrasiyasının Regional idarəetmə və yerli özünüidarə orqanları ilə iş üzrə şöbəsinin məsul işçisi Niyaz Əliyev və Milli Məclisin deputatı Hacı Salayev iştirak etmişlər.

Sonda yığıncaq iştirakçıları Azərbaycan Prezidenti İlham Əliyevə müraciət qəbul etmişlər.