İQTİSADİYYAT
Ağdamda sosial-iqtisadi inkişaf sahəsində uğurlu nəticələr qazanılmışdır
Ağdam, 11 fevral (AZƏRTAC). Ağdam rayonunda 2011-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş yığıncaq keçirilmişdir.
AZƏRTAC xəbər verir ki, yığıncaq iştirakçıları əvvəlcə ümummilli lider Heydər Əliyevin Quzanlı qəsəbəsinin mərkəzindəki abidəsi önünə tər çiçək dəstələri düzərək, xatirəsini ehtiramla yad etmiş, 2011-ci ildə rayonun sosial-iqtisadi inkişafını əks etdirən videogörüntüyə baxmışlar.
Rayon icra hakimiyyətinin başçısı Nizami Sadıqov hesabat məruzəsində bildirmişdir ki, ötən il rayonun sosial-iqtisadi inkişaf dinamikası saxlanılmış, ümumi məhsul istehsalının həcmi artaraq 96 milyon 088 min manat olmuşdur. Bu dövrdə sənaye məhsulunun həcmi 4 milyon 930 min manat, kənd təsərrüfatı məhsulunun həcmi 64 milyon 269 min manat, ticarət dövriyyəsi 7 milyon 955 min manat olmuş, əsas kapitala 17 milyon 888 min manat vəsait yönəldilmişdir.
Ağdamda aparılan tikinti-quruculuq və abadlıq işləri barədə məlumat verən natiq bildirmişdir ki, Prezident İlham Əliyevin muvafiq sərəncamlarına uyğun olaraq rayonun 21 kəndini, 6 köçkün qəsəbəsini birləşdirən Quzanlı-Xındırıstan-Əhmədağalı-Əfətli avtomobil yolunun, doğum evi, uşaq xəstəxanası, təcili tibbi yardım stansiyası binalarının tikintisi, mədəniyyət evinin əsaslı təmiri başa çatdırılaraq istifadəyə verilmişdir. Ağdam Dövlət Dram Teatrının fəaliyyəti bərpa edilmişdir. Hazırda rayonun girişindəki Qala ətrafı parkın abadlaşdırılması, “Aqroservis”in inzibati binasının, Səfərli kənd tam orta məktəbinin, Birinci Dördyol qəsəbəsində xeyir-şər evinin, Xındırıstan kənd uşaq musiqi məktəbinin tikintisi, Yeni Azərbaycan Partiyası rayon təşkilatının inzibati binasının, Yüzbaşılı kənd uşaq bağçasının təmiri davam etdirilir. Dördyol-Mamırlı ərazisində məskunlaşan köckün ailələri üçün 932 ailəlik yeni qəsəbənin tikilməsi üçün torpaq sahəsi ayrılmışdır.
2011-ci ildə əhalinin “mavi yanacaq”la təminatı sahəsində xeyli iş görülmüşdür. Yeni yaşayış məntəqələrinə təbii qaz xətti çəkilmişdir. Rayonda qaz xəttinin çəkilişi davam etdirilir.
Hesabat ilində rayonda 1601 yeni iş yeri açılmışdır ki, onlardan 842-si daimidir. Rayon məşğulluq mərkəzinə 640 nəfər işaxtaran vətəndaş müraciət еtmiş, onlardan 265 nəfəri daimi işlə təmin olunmuşdur.
Ötən ilin məhsulu üçün 19 min 511 hektar sahədə taxıl əkilmiş, 41 min 71 ton məhsul əldə olunmuşdur. Hesabat dövründə rayon üzrə iribuynuzlu mal-qara 34 min 160 baş, o cümlədən inək və camışlar 15 min 200 baş, qoyun və keçilər 102 min 047 baş olmuş, 3115 ton ət, 27 min 100 ton süd, 8046 min ədəd yumurta istehsal edilmişdir. Əvvəlki ilin müvafiq dövrü ilə müqayisədə iribuynuzlu mal-qaranın sayı 9 faiz, qoyun və keçilər 1,3 faiz, ət istehsalı 10,5 faiz, süd istehsalı 0,9 faiz, yun istehsalı 1,6 faiz artmışdır.
Yığıncaqda digər çıxış edənlər də hesabat ilində görülmüş işləri ətraflı təhlil etmiş, uğurlarla yanaşı, problemləri də sadalamış, onların həlli üçün təkliflər irəli sürmüşlər.
Prezident Administrasiyasının məsul işçisi Rüfət Məmmədov, Milli Məclisin deputatları Bəxtiyar Sadıqov və Elman Məmmədov yığıncaqda çıxış etmişlər.
Toplantı iştirakçıları adından Prezident İlham Əliyevə müraciət qəbul olunmuşdur.