Bakı, 15 oktyabr, AZƏRTAC 

Azərbaycan Respublikası Ali Məhkəməsinin sədri Ramiz Rzayev Türkiyə Kassasiya Məhkəməsinin sədri İsmail Rüştü Ciritin dəvəti ilə oktyabrın 11-12-də İstanbul şəhərində keçirilmiş IV Yuxarı İnstansiya Məhkəmələrinin beynəlxalq sammitində iştirak edib.

Ali Məhkəmədən AZƏRTAC-a bildiriblər ki, dünyanın beş qitəsini əhatə edən bir çox ölkələrin nümayəndələrinin iştirak ilə keçirilmiş sammitdə Ali Məhkəmənin sədri “Məhkəmələrdə şəffaflığın təmin olunması” mövzusunda çıxış edib. O, son illər Azərbaycanda aparılan məhkəmə-hüquq islahatları barədə geniş məlumat verib, elektron məhkəmə icraatı, məhkəmələrdə işlərin hakimlər arasında informasiya texnologiyalarından istifadə edilməklə avtomatlaşdırılmış qaydada bölüşdürülməsi, Ali Məhkəmənin “İnternet” səhifəsində informasiya axtarış sistemi ilə məhkəməyə gəlmədən proses iştirakçısının işinin qeydiyyata düşməsi, icraatda olan işə baxılması üçün hakimin təyin olunması, işə baxılması, çıxarılmış qərar haqqında məlumat, qərarın mətni barədə Azərbaycan məhkəmə sisteminin təcrübəsindən danışıb.

Tədbirdə məhkəmə prosesində şəffaflığa dair İstanbul Bəyannaməsində əks olunan aşağıdakı prinsiplərin həyata keçirilməsini təmin etmək məqsədi ilə icra tədbirlərinin layihəsi geniş müzakirə edilib: məhkəmə prosesi bir qayda olaraq ictimaiyyət üçün açıq olmalıdır; məhkəmə sistemi vətəndaşların ölkədaxili məhkəmə binalarına asanlıqla daxil olmasını və müvafiq məlumatların əldə edilməsini təmin etməlidir; ədalət mühakiməsi vətəndaşların məhkəmə sisteminə çıxışını asanlaşdırmalıdır; məhkəmə orqanları tərəfləri sinxron tərcümə ilə təmin etməli və bu xidmət ödənişsiz şəkildə həyata keçirilməlidir; məhkəmədə işlərin bölgüsü zamanı şəffaflıq təmin olunmalıdır; məhkəmə hakimiyyəti ədalət mühakiməsinin həyata keçirilməsində şəffaflığı təmin etməlidir; hüquq -mühafizə orqanları tərəfindən saxlanılan şəxslərlə bağlı nəzarət səlahiyyətlərinə malik olmalıdır; məhkəmə hakimiyyəti ali və apellyasiya məhkəmələrinin qərarlarının mütəmadi olaraq dərc edilməsini təmin etməlidir; tələbələri məhkəmə prosesini öyrənmək üçün proqramlar təşviq etməlidir; məhkəmə sisteminin rolu barədə ictimaiyyət arasında maarifləndirmə işini apararaq, proqramların hazırlanmasına və təşəbbüsünə dəstək verməlidir; məhkəmə prosesləri barədə, həmçinin qəbul olunmuş qərarlar da daxil olmaqla, ictimaiyyəti məlumatlandırmaq üçün kütləvi informasiya vasitələrinə müvafiq yardım göstərməlidir; ədalət mühakiməsinin təmin edilməsində ictimai məmnunluğu qiymətləndirməli və bununla da ədalət mühakiməsinin keyfiyyətini yüksəltməyə çalışmalıdır; hakimlərin təyin edilməsi prosesində şəffaflıq olmalı; məhkəmə hakimiyyəti hakimlərin qeyri-etik davranışlarına dair şikayətlərə cavab verməli; hakimlərlə bağlı intizam prosesində şəffaflıq təmin olunmalıdır.

Ali Məhkəmənin sədri müzakirə olunan icra tədbirlərinin əksəriyyətinin ölkəmizdə həyata keçirilməkdə olduğunu tədbir iştirakçılarının diqqətinə çatdırıb. Qeyd edib ki, son illər Azərbaycanda aparılan məhkəmə-hüquq islahatları, hakimlərin seçilməsi proseduru Avropa Şurası tərəfindən qabaqcıl nümunə kimi digər ölkələrə tövsiyə edilib. Ali Məhkəmənin qərarlarının internet səhifəsində dərc olunması, ictimaiyyətlə daimi əlaqələrin qurulması, Ali Məhkəmənin hakim-spikerlərinin səmərəli fəaliyyətinin təşkili xüsusi vurğulanıb.

Sammitin yekununda İstanbul Bəyannaməsində əks olunan prinsiplərin səmərəli icrası üçün tədbirlər planı müəyyənləşdirilib.