ELM VƏ TƏHSİL
Almaniyanın Karlsrue Texnologiya İnstitutunun tədqiqatçı-professoru BDU-da mühazirə keçib
Bakı, 1 sentyabr, AZƏRTAC
Almaniyanın Karlsrue Texnologiya İnstitutunun tədqiqatçı-professoru, fizika-riyaziyyat elmləri doktoru Əli İsmayıl-Zadə Bakı Dövlət Universitetinin (BDU) əməkdaşları, gənc tədqiqatçıları və tələbələri üçün “Fəlakətlər haqqında elmin sərhədlərinin genişləndirilməsi” mövzusunda mühazirə keçib.
Bu barədə AZƏRTAC-a BDU-dan məlumat verilib.
Tədbirdə çıxış edən BDU-nun rektoru Elçin Babayev deyib ki, universitetin ən böyük missiyası ölkə üçün yüksək səviyyəli kadrların hazırlanmasıdır. “Universitetin ən böyük məzunu ümummilli liderimiz Heydər Əliyevdir. BDU məzunları ölkəmizi layiqincə təmsil edirlər. Hətta dünyanın müxtəlif ölkələrində öz məktəblərini yaradan BDU məzunları var. Belə uğurlu məzunlarımızdan biri də Əli İsmayıl-Zadədir”,- deyə rektor bildirib.
Əli İsmayıl-Zadə mühazirəsinin əvvəlində fundamental geofizika elmlərinin və təbii təhlükələrin öyrənilməsinin risklərin qiymətləndirilməsinə necə töhfə verdiyindən danışıb.
O qeyd edib ki, təbii təhlükələr, təbii fəlakətlərə qarşı həssaslıq və onların təsirləri ilə bağlı tədqiqatlara inteqrasiya olunmuş Yerin müşahidələri, məlumatların təhlili və modelləşdirilməsi əsasında elmi kəşflər risklərin qiymətləndirilməsinə kömək edir və beləliklə, təbii fəlakətlər haqqında elmin sərhədlərini genişləndirir. Litosferin dinamikasının ədədi modelləşdirilməsi və zəlzələlərin modelləşdirilməsi seysmik təhlükənin ehtimal analizi ilə birlikdə gələcəkdə güclü zəlzələlər nəticəsində potensial yer silkələnməsinin daha dəqiq qiymətləndirilməsini təmin edə bilər. Lava qübbəsinin böyüməsinin, onun potensial dağılmasının və lava/piroklastik axınların modelləşdirilməsi vulkan təhlükəsinin qiymətləndirilməsində önəmli rol oynayır. Təhlükələrin təhlili, modelləşdirilməsi və proqnozlaşdırılması ekstremal hadisələrin təsirini azaltmağa yönəlmiş profilaktik tədbirlərin işlənib-hazırlanmasına kömək edir. Təbii fəlakətlərə qarşı həssaslıq, sosial qarşılıqlı əlaqə və mürəkkəblik, habelə risklərin azaldılması, risklər barədə ictimaiyyətin məlumatlandırılması, davamlı inkişafın qurulması və elmi əsaslı siyasətlərin hazırlanması ilə bağlı uğursuzluqlar artdıqca, təhlükəli hadisələrin nəticələrinin şiddəti də artır.
Mühazirədə daha sonra təbii fəlakətlər və risklər haqqında elmi biliklərin təbii fəlakət və təbii fəlakətlərə hazırlıqla əlaqəsi, eləcə də əhalinin onlar haqqında məlumatlılığı haqqında danışılıb. Qeyd olunub ki, təbiət, mühəndislik, sosial elmlərin və təcrübənin siyasətin inkişafı ilə inteqrasiyası fəlakət riskinin azaldılması tədbirlərini əhəmiyyətli dərəcədə təkmilləşdirməlidir. Məlumatlı qərarlar qəbul etmək üçün əldə edilmiş biliklərin faydalı mesajlar və mümkün siyasi və iqtisadi tədbirlər şəklində ötürülməsi məqsədilə elmi tədqiqatlarda vahid, fənlərarası və konvergens yanaşmaların inkişaf etdirilməsi vacibdir.