AZƏRBAYCANIN GƏNC MUSİQİÇİLƏRİ
Məsumə Əliyeva
Bakı, 21 iyun, Anara Axundova, AZƏRTAC
AZƏRTAC beynəlxalq müsabiqələrin laureatı olmuş Azərbaycanın gənc istedadlı musiqiçiləri haqqında məqalələr silsiləsini davam etdirir.
Növbəti həmsöhbətimiz Əfrasiyab Bədəlbəyli adına 23 nömrəli musiqi məktəbinin 11-ci sinif şagirdi, fleyta ifaçısı, bir sıra respublika və beynəlxalq müsabiqələrin iştirakçısı və laureatı Məsumə Əliyevadır.
Məsumənin 16 yaşı var, o, ümumtəhsil məktəbinin 10-cu sinfində oxuyur. İstedadlı qız altı yaşından musiqi ilə məşğul olmağa - ilk dəfə blok-fleytada ifa etməyə başlayıb.
Məsumə bəhs edir: “Nənəm bu məktəbdə musiqi müəllimidir. Mən tez-tez ona baş çəkirdim və günlərin birində o, sadəcə mənə blok-fleytanı verdi və öyrətməyə başladı. Uşaqlıqdan nənəmin başqa uşaqlara necə dərs dediyini, özünün necə ifa etdiyini görmüşəm. Mənim üçün baxıb dinləmək çox maraqlı idi. Mənə bu kiçik fleytanı hədiyyə edəndə, çox sevindim”.
Məsumə fleytadan ayrılmadı, vaxtı çatanda blok-fleytadan peşəkar alətə keçdi. O deyir: “Mənə bu dərəcədə dəstək verdiyinə görə məktəbimə və direktorumuz Afət xanıma çox minnətdaram. Məktəb mənə ilk peşəkar fleytamı verdi. Bu, mənə çalışmağa davam etmək üçün həvəs verdi. Ümumiyyətlə, bu məktəb mənim üçün doğma evdir”.
Üçüncü sinifdən Məsumə müsabiqələrdə iştirak etməyə başladı. Onun sözlərinə görə, yaddaşında qalan ən parlaq təəssürat bu yaxınlarda iştirak etdiyi Fikrət Əmirova həsr olunmuş müsabiqə olub.
Məsumə qeyd edir: “Mən iki nominasiyada çıxış etdim: solo və sinif yoldaşım Nəzrinlə duet şəklində. Hər iki nominasiyada mənə birinci yer verildi. Bunun necə bir sevinc olduğunu təsəvvür edə bilməzsiz! Eyni anda iki birinci yer... Bu, böyük nailiyyət idi”.
İstedadlı fleyta ifaçısı deyir ki, müsabiqə üçün həmişə ehtiyatda bir parça olur, çünki müsabiqə xəbərləri çox vaxt gözlənilmədən gəlir: “Biz belə musiqili “yarımfabrikatlar” hazırlayırıq. Daha sonra isə onları xatırlamaq və ifa etmək qalır. Amma bəzən elə alınır ki, yeni bir əsər öyrənməli olursan”.
Zəhmətkeş qızcığaz hər gün məşq edir, bir-iki saat qammaların ifasından sonra əsərin üzərində ətraflı işləyir. Bundan əlavə, Məsumə özü üçün dərs zamanı istifadə etdiyi çox qeyri-adi bir texnika düşünüb.
“Mən öz əsərimi ifa edirəm, eyni zamanda, qulaqcıqda tamamilə fərqli musiqini dinləyirəm, həm də kitab oxuyuram. Sonra özümü oxuduqlarımı xatırlamağa məcbur edirəm. Mən bunu qəsdən edirəm”, -deyə fleyta ifaçısı izah edir. - Bu ona görədir ki, səhnədə konsentrasiyam maksimal olsun. Bu çətindir, amma mən öyrəşmişəm. Sonra səhnədə heç nə fikrimi yayındıra bilməz, çıxış zamanı hər şey ola bilər. Amma bu, diqqətimi yayındırmayacaq”.
İstənilən ifaçının çıxışdan əvvəl keçirdiyi həyəcandan danışan Məsumə başqa bir orijinal həll yolu haqqında deyir.
“İdeal odur ki, həyəcanlı olduğunuz zaman necə davrandığınızı görmək üçün evdə özünüzü “həyəcanlandırın”. Bununla bağlı nə edəcəyini bilmək üçün”, - deyə qızcığaz fikirlərini bölüşür. - Lakin səhnəyə çıxmazdan əvvəl həyəcan həmişə olur və bu, olmalıdır, çünki biz insanıq, belə instinktlərimiz var".
Fleyta ifaçısının fikrincə, müsabiqələrdə ab-hava başqa olur və ifaçılar arasında çox fərqli münasibətlər yarana bilər.
“Məsələn, son müsabiqədə böyüklər kateqoriyasında ifa edən macarıstanlı bir qız birinci yeri tutduğumu biləndə mənim üçün çox ürəkdən sevindi!” –deyə Məsumə xatırlayır.
Həmsöhbətimiz bu il musiqi məktəbini bitirir və musiqi təhsilini davam etdirməyi planlaşdırır. Qızcığaz deyir ki, xaricdə çıxış etməyi xəyal edir.
“Mən Avstriyada və İtaliyada çıxış etmək istərdim, bunlar mənim ziyarət etmək istədiyim iki sənət qalasıdır. Üstəlik, mənim sevimli bəstəkarım Verdi italyan olub”, - deyə fleyta ifaçısı qeyd edir.
Bu yaxınlarda Məsumə konservatoriyada təhsil almaq üçün Macarıstana dəvət alıb. Amma əvvəlcə o, orta məktəbi bitirməlidir. Fleyta ifaçısı bu təklifdən yararlana bilib-bilməyəcəyini bilmir, bu haqda danışmaq hələ tezdir.
“Xaricdə təhsil almaq istərdim. Amma Macarıstana getməsəm, sənədlərimi Bakı Musiqi Akademiyasına verəcəm, daha sonra xaricdə magistr təhsili almaq olar”, -deyə zəhmətkeş və istedadlı qız düşünür.
Söhbətdə Məsumənin müəllimi, nənəsi Rövşanə Quliyeva da iştirak edir. Şagirdi haqqında danışan Rövşanə xanım onun zəhmətkeşliyini və məsuliyyətini qeyd edir.
“Ona hansı parçanı versəm, onu həmişə qısa müddətdə öyrənir. Məsumə həm konsertlərdə, həm də müsabiqələrdə çıxış edib. O, 3-cü sinifdə oxuyanda artıq Qara Qarayev adına Kamera Orkestri ilə çıxış edirdi, o vaxt ona Teymur Göyçayev rəhbərlik edib”, -deyə müəllim bildirir.
Rövşanə xanım Məsumənin gələcəkdə yaxşı müəllim olacağını düşünür. Hərdən o, qızcığazı uşaqlarla yalnız qoyur və Məsumənin onlarla necə yaxşı münasibət qurduğunu, onlara materialı aydın şəkildə başa saldığını görür. Müəllim həm də güman edir ki, nəvəsi gələcəkdə orkestrin solisti ola bilər.
Rövşanə xanım müsabiqələrə müsbət münasibət bəsləsə də, həmişə tələbələrinə ifaçılığın yaradıcılıq sevinci olduğunu deyir.
“Uzun illərdir ki, onları müsabiqələrə göndərirəm və deyirəm ki, biz yer qazanmaq üçün ifa etmirik! Biz özümüzün həzz alması üçün və tamaşaçıların zövqünə uyğun ifa edirik. Bu, bizim üçün bir təcrübədir, səhnəyə, auditoriya qarşısına çıxmaq imkanıdır. Biz heç nə qazanmasaq belə, bunun bizim üçün heç bir əhəmiyyəti yoxdur. Əsas odur ki, bizi xatırlasınlar və məktəbimizdə istedadlı şagirdlərin olduğunu görsünlər”, -deyə müəllim vurğulayır.
Bölmənin digər xəbərləri
