Bakı, 27 iyun, AZƏRTAC

İyunun 27-də “Bakı Kristal Zal”da SABAH.HUB İnnovasiya Mərkəzinin dəstəyi ilə yaradılmış, Azərbaycanın və regionun əsas startap innovasiya tədbiri olan “Baku ID” innovasiya festivalı başlanıb.

AZƏRTAC xəbər verir ki, tədbirin açılışında çıxış edən SABAH.HUB-ın baş icraçı direktoru Rəhim Bayramlı builki “Baku ID” tədbirində 200-dən çox yerli və xarici investorun, 100-dən çox xarici və yerli startapın, 5000 iştirakçı və 50-dən artıq tərəfdaşın yer aldığını bildirib.

Rəhim Bayramlı diqqətə çatdırıb ki, bu il SABAH.HUB, həmçinin vençur fondunu yaradır.

“SABAH.HUB-dan olan startapların son iki il ərzində yerli və regional investorlardan 4 milyon dollardan çox vəsait topladığını elan etməkdən çox məmnunam. Yaxın iki gündə, artıq elan olunduğu kimi, bu məbləğ azı 2 milyon dollar artacaq. Bu, yaxşı başlanğıcdır, lakin səyahətimizin yalnız əvvəlidir. Mən 25 milyon dollar dəyərində öz vençur kapital fondumuzun yaradılmasını elan etməkdən qürur duyuram. “SABAH.fund” Cənubi Qafqaz və Mərkəzi Asiya, böyük qlobal ambisiyaları olan regionlardakı şirkətlərə sərmayə qoyaraq startap maliyyələşdirilməsini növbəti səviyyəyə qaldıracaq. Bu hadisə üçün ilk çekimizi yaxın 48 saat ərzində verməyi planlaşdırırıq”, - deyə o bildirib.

Tədbir çərçivəsində “Startup Wise Guys”, “Al-Farabi Innovation Hub ”, “Caucasus Ventures”, “MOST Ventures”, “Startupbootcamp”, “Aloqa Ventures” və “SABAH.fund” vençur fondlarının dəstəyi ilə ümumi məbləği 1.000.000$ olan sindikat fond yaradılıb.

Tədbirdə çıxış edən Azərbaycanın elm və təhsil naziri Emin Əmrullayev bildirib ki, qarşıdakı illərdə əvvəlki dövrün bütün təhsil sistemini təkrarlamağa çalışsaq, daha az optimal nəticələr əldə edəcəyik. Buna görə də Elm və Təhsil Nazirliyinin “SABAH” qrupları ilə layihəsi bu baxımdan daha fərqlidir: “SABAH”ın fərqli sütunları var. Elm və Təhsil Nazirliyi olaraq biz “SABAH” Akademiyasının tərəfində qalmağa, üzvlərini artırmağa və maraqlı tərəflərimizlə birlikdə digər mərhələlərdə birgə fəaliyyətə əmin olmağa çalışırıq. Bu yola qoşulan bütün digər tərəfdaşlara, xüsusilə İqtisadiyyat Nazirliyi və SABAH.HUB-a təşəkkür edirəm. Gələcəkdə bunun Azərbaycanın təhsil və startap ekosisteminə töhfə verəcəyinə inanıram”, - deyə nazir bildirib.

İqtisadiyyat naziri Mikayıl Cabbarov çıxışında sahibkarların və ya tənzimləyicilərin üzləşdiyi çətinliklərin həm də qanunvericilikdəki boşluqlardan irəli gəldiyini söyləyib. “Biz startap ekosistemini təmin etməli, maliyyəyə çıxış və vençur kapitalının cəlbi ilə bağlı işlər görməliyik. Hazırda rəqəmsal texnologiyanın transformasiyası mərkəzini işə salırıq. Bunun üçün müvafiq yerlər ayırdıq. Məqsəd sahibkarlar üçün platforma təmin etməkdir. Azərbaycanda innovasiya siyasəti və baxışı daha aydın ifadə olunmalıdır”, - deyən nazir vurğulayıb ki, bunun üçün uğurlu başlanğıc edilməlidir.

Bundan əlavə, “İnnovasiyaların İdarə Edilməsi və Bilik-Əsaslı İqtisadiyyata Keçid” panelində iqtisadiyyat naziri Mikayıl Cabbarov, elm və təhsil naziri Emin Əmrullayev, “PAŞA Holding”in aparat rəhbəri Dəyanət Sədullayev və SOCAR-ın prezidenti Rövşən Nəcəf iştirak ediblər.

Tədbir zamanı “Al-Farabi Innovation Hub” ilə SABAH.HUB və Yüksək Texnologiyalar Parkı arasında memorandumlar imzalanıb. Həmçinin “Baku ID” çərçivəsində SABAH.HUB və 4SİM arasında ölkədə rəqəmsal iqtisadiyyatın inkişafı çərçivəsində yerli startap ekosisteminin inkişafına dəstək göstərilməsi və bu sahədə əməkdaşlıqla bağlı ikitərəfli anlaşma memorandumu imzalanıb.

Qeyd edək ki, “Baku ID” innovasiya festivalı fəaliyyət dövrü çərçivəsində onlarla startapın inkişafına dəstək verərək minlərlə şəxsin innovasiya ekosistemi haqqında birbaşa məlumatlanmasına nail olub. Ümumilikdə isə startapların 1.7 milyon AZN-dən çox investisiya cəlb etməsinə dəstək göstərib.

“Baku ID”nin baş sponsorları Elm və Təhsil Nazirliyi, SOCAR, “PAŞA Holding”, ABB və “Mappable”, tərəfdaşlar isə 4SİM və İnnovasiya və Rəqəmsal İnkişaf Agentliyidir (IDDA). AZƏRTAC tədbirin media tərəfdaşı olaraq informasiya dəstəyi göstərir.