DÜNYA
Özbəkistanda elektrik enerjisinin istehsalı kəskin şəkildə azalıb
![Özbəkistanda elektrik enerjisinin istehsalı kəskin şəkildə azalıb](/files/2024/2/1200x630/17194929145262355264_1200x630.jpg)
Bakı, 27 iyun, AZƏRTAC
Özbəkistanda may ayında elektrik enerjisinin istehsalının kəskin şəkildə - 58 faiz azalması müşahidə olunub.
AZƏRTAC Özbəkistan mediasına istinadla xəbər verir ki, bundan əvvəl energetika naziri Jurabek Mirzəmahmudov bildirmişdi ki, 2023-cü ilin eyni dövrü ilə müqayisədə natamam may ayı üçün tariflərin artırılmasından sonra ölkədə elektrik enerjisi istehlakı 324 milyon kilovatsaat, qaz istehlakı isə 125 milyon kubmetr azalıb. Milli Statistika Agentliyinin məlumatları istehlakın azalmasına enerji resurslarının istehsal həcminin aşağı düşməsinin də təsir etdiyini göstərir.
Statistika Agentliyinin sənaye istehsalı haqqında hesabatına əsasən, 2024-cü ilin may ayında Özbəkistanın iri müəssisələri tərəfindən qaz hasilatı da son illərdə rekord həddə - 3,52 milyard kubmetrə qədər azalıb.
Agentliyin məlumatına görə, may ayında neft hasilatı 63,7 min ton təşkil edib ki, bu da 2023-cü ilin may ayı ilə müqayisədə 7,8 faiz azdır. Beş ayda 305 min ton neft hasil edilib ki, bu da ötən ilin müvafiq dövrü ilə müqayisədə 6,9 faiz azdır.