Hərbi ekspert: Ukraynada cəbhədə vəziyyət çox ağırdır
Kiyev, 27 iyun, AZƏRTAC
Ukrayna-Rusiya cəbhəsində vəziyyət yenidən ağırlaşıb. Rusiya ordusu bütün istiqamətlərdə hücumlarını intensivləşdirib. Ukraynanın hərbi rəsmiləri cəbhədə kritik vəziyyətin qarşıdakı yay aylarında da davam edəcəyini proqnozlaşdırırlar. Hərbi ekspertlər də cəbhədə vəziyyətin ağır olduğunu etiraf edirlər.
Ukrayna Təhlükəsizlik və Əməkdaşlıq Mərkəzinin icraçı direktoru, hərbi ekspert Dmitri Jmailo AZƏRTAC-a müsahibəsində bildirib ki, cəbhədə vəziyyət Ukrayna üçün çox çətindir və indiki vəziyyət bu il ən kritik ola bilər.
“Ruslar düşünürlər ki, biz Qərbdən silah alırıq və buna görə də onlar bu vəziyyətdən maksimum dərəcədə çıxmaq istəyirlər. Halbuki Ukraynada faktiki olaraq yarım ildir nə silah təchizatı, nə də Qərb dəstəyi var idi. Yalnız hərbçilərimizin cəsarəti, pilotsuz uçuş aparatlarının kütləvi istifadəsi sayəsində müdafiədə ciddi geriləmənin qarşısını aldıq. Ruslar indi bütün səylərini cəmləşdiriblər. Ukrayna ərazisinə edilən bütün hücumların üçdəbiri Pokrovski istiqamətində baş verir. Onlar ağır itkilər hesabına Avdeyevka rayonunu ələ keçirdikdən sonra daha operativ məkana daxil olublar, Karlovkaya təzyiq göstərməyə çalışırlar və növbəti cəhdlərindən biri də qoşunlarımızın maddi-texniki təminatını çətinləşdirmək üçün Pokrovsk-Konstantinovka magistral yolunu kəsməkdir. Ona görə də orada vəziyyət son dərəcə ağır olaraq qalır”, - deyə hərbi ekspert əlavə edib.
O hesab edir ki, cəbhədə hadisələrin inkişafı Qərb tərəfdaşlarının Ukraynaya vəd etdiyi silahların nə dərəcədə göndərilməsindən asılı olacaq.
“Əgər Qərb tərəfdaşlarımızın bizə vəd etdikləri silah-sursat kifayət qədər olsa, onda biz vəziyyəti sabitləşdirə və ilin sonuna qədər təşəbbüsü ələ keçirə biləcəyik. Ukrayna Rusiyanın hücumunu dayandırmaq üçün hər şeyi edir. Birincisi, biz vəd edilmiş bütün silahların Ukrayna cəbhə xəttinə mümkün qədər tez çatmasını təmin etmək üçün tərəfdaşlarımızla daim əlaqə saxlayırıq. Tərəfdaşlarımızla ayrı-ayrı sahələrdə, xüsusən də hava hücumundan müdafiənin gücləndirilməsi, Ukrayna ordusunun sursat və texnika ilə təchiz edilməsi ilə bağlı ayrı-ayrılıqda işləyirik. Ümid edirik ki, bu yay müqavilələr sayəsində hava məkanında mübarizədə bizə kömək edəcək F-16 təyyarələri gələcək. Bundan əlavə, biz ABŞ-dan icazə almağa çalışırıq ki, Amerika istehsalı olan bütün Qərb silahlarından Rusiya ərazisində tam istifadə edək. Xüsusilə biz yerüstü ATACMS raket sistemi ilə Rusiya ərazisində hərbi obyektləri vurmağa çalışırıq”, - deyə Dmitri Jmailo qeyd edib.
Hərbi ekspert vurğulayıb ki, Ukrayna cəbhə xəttini sabitləşdirmək üçün bütün tədbirləri görür. Bundan əlavə, Ukrayna səfərbərlik haqqında yeni qanun qəbul edib ki, onun məqsədi hansı ehtiyatların olduğunu və kimiləri səfərbər edə biləcəyimizi öyrənməkdir. Ona görə də rəsmi Kiyev müdafiə sıralarını genişləndirmək üçün bu iki komponent - silah və hərbçilərin sayının artırılması istiqamətində prioritet fəaliyyətini reallaşdırmaqdadır.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
