CƏMİYYƏT
ASAN Beynəlxalq Assosiasiyasının rəsmi şəxslərinin görüşü keçirilib
Bakı, 24 dekabr, AZƏRTAC
Dekabrın 24-də Bakıda dövlət xidmətləri göstərən qurumların ASAN Beynəlxalq Assosiasiyasını təmsil edən dövlətlərin yüksək səviyyəli ekspertlərinin görüşü keçirilib.
AZƏRTAC-ın məlumatına görə, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev jurnalistlərə açıqlamasında görüşün məqsədinin assosiasiyanın nizamnamə layihəsinin müzakirəsi və sənədin imzalanması məqsədilə üzv ölkələrin dövlətdaxili proseduralarına ötürüldüyünü deyib.
“Bildiyimiz kimi, bu il iyunun 24-dən 26-dək Bakıda BMT-nin Dövlət Xidmətləri Forumu keçirilib. Həmin forum çərçivəsində Azərbaycanın təşəbbüsü ilə ölkələrin hüquqi xidmətlər göstərən dövlət orqanlarının bir assosiasiyasının yaradılması irəli sürülüb. Bu təşəbbüsə Azərbaycan da daxil olmaqla 8 ölkə qoşulub. Nəticədə dövlət xidmətləri göstərən dövlət qurumlarının Beynəlxalq ASAN Assosiasiyasının yaradılması ilə bağlı Niyyət Protokolu imzalanıb. Həmin vaxtdan etibarən həmin ölkələrin aidiyyəti rəsmi şəxsləri ilə zəruri sənədləşmə işləri müzakirə olunub. Bu gün Bakıda həmin üzv ölkələrin rəsmi şəxslərinin ekspertlərinin görüşü keçirilib. Məqsəd ASAN Beynəlxalq Assosiasiyasının nizamnamə layihəsinin təsdiq olunması idi. Bir beynəlxalq təşkilat olaraq onun nizamnaməsi hazırdır. Bütün üzv dövlətlərin ekspertləri tərəfindən ilkin olaraq qiymətləndirilib. Növbəti mərhələdə, yəni 2020-ci ildə üzv ölkələrin nazirlərinin görüşü keçiriləcək. Bu nizamnamə həmin vaxt imzalanacaq və aidiyyəti dövlətlərdə ratifikasiya olunacaq. Bu, çox böyük uğurdur. Çünki hazırda “ASAN xidmət” müxtəlif ölkələr tərəfindən tətbiq olunması arzulanan bir konseptdir. Ayrı-ayrı ölkələrdən “ASAN xidmət” modelinin tətbiqi ilə bağlı sorğular alırıq. Ona görə də belə bir təşəbbüs irəli sürməyi düşündük”, - deyə Ü.Mehdiyev diqqətə çatdırıb.
Agentliyin sədrinin sözlərinə görə, ASAN Beynəlxalq Assosiasiyasının yaradılmasında məqsəd üzv ölkələr arasında dövlət xidmətlərinin səmərəli idarə edilməsi sahəsində yaranan aktual problemlər və müasir çağırışların həll edilməsi yolları, eləcə də vasitələrin müzakirəsidir. Həmçinin strategiya və onun reallaşdırılması çərçivəsini yaratmaq məqsədilə mütəxəssislər və ekspertlərin institusional şəbəkəsini təşkil etmək, habelə dövlət xidmətlərinin gələcək inkişaf istiqamətlərini müəyyən etmək əsas prioritetlərdir: “Bu gün dünyada ayrı-ayrı sahələr üzrə beynəlxalq təşkilatlar mövcuddur. Lakin sırf vətəndaşlar üçün əlçatan dövlət xidmətlərini təşkil edən qurumların belə bir birliyi yox idi. Bu assosiasiya ilk dəfə Azərbaycanın təşəbbüsü ilə yaradılır. Assosiasiyanın əsas məqsədi bu sahədə olan ən mütərəqqi konseptləri digər ölkələrə tətbiq etmək, təcrübə mübadiləsi aparmaq, institusional bir ekspert bazası yaratmaqdır. Azərbaycan bu assosiasiyanın yaratdığı imkanlar hesabına “ASAN xidmət” konseptini daha çox ölkəyə ixrac edə biləcək. Bu baxımdan uğurlu bir modeldir. Burada diqqət çəkən məqam odur ki, “ASAN” sözü beynəlxalq təşkilatın adına və hüquqi xidmətlər göstərmək sahəsində beynəlxalq terminoloji sözə çevrilir". Qeyd edək ki, ASAN Beynəlxalq Assosiasiyasının yaradılmasına dair Niyyət Bəyannaməsini Azərbaycan, Birləşmiş Ərəb Əmirlikləri, Əfqanıstan, İndoneziya, Mərakeş, Monteneqro, Türkiyə və Uqandanın dövlət xidmətləri göstərən müvafiq nazirliklərinin rəhbərləri imzalayıblar.