AZƏRBAYCAN “AVROPA OPERA GÜNLƏRİ”NDƏ TƏMSİL OLUNACAQ
AZƏRTAC xəbər verir ki, fevralın 16-da Parisdə Klaudio Monteverdinin “Orfey” operasının ilk tamaşasının 400 illiyinə həsr edilmiş “Avropa opera günləri” başlanır. Üçgünlük festivalda müxtəlif ölkələrdən 95 kollektiv iştirak edəcəkdir.
Opera sənəti şənliklərinə həsr edilmiş layihə çərçivəsində keçiriləcək çoxsaylı tədbirlərdə Azərbaycan da təmsil olunacaqdır.
Layihənin təşəbbüsçüləri YUNESKO-nun sabiq baş direktoru, “Fedora” opera firmasının prezidenti Federiko Meyer Zaraqoza, Paris Milli Operasının rəhbəri Jerar Mortye, “Opera Europa” Assosiasiyasının sədri, ispaniyalı Bernar Fokrul və İngiltərənin “Royal Opera House” teatrının direktoru Nikolas Peyndir.
Parisdə dünyanın müxtəlif guşələrindən gəlmiş qonaqların iştirakı ilə “Avropa operası irsi, onun rəngarəngliyi və ümumi dəyərləri” mövzusunda beynəlxalq konfrans da keçiriləcəkdir.
Proqram çərçivəsində musiqi tamaşaları, interaktiv seminarlar, habelə musiqi ifaçılarının və tamaşaçıların iştirakı ilə müzakirələr təşkil olunacaqdır.
“Avropa operası günləri”ndə ölkəmizi Azərbaycan Dövlət Akademik Opera və Balet Teatrının direktoru, əməkdar incəsənət xadimi Akif Məlikov təmsil edəcəkdir. O, xarici musiqisevərlərə milli opera tamaşalarımızın lent yazılarını, Qara Qarayevin məşhur “Yeddi gözəl” baletinin, “Leyli və Məcnun” simfonik poemasının, “Don Kixot” simfonik qravürlərinin və Fikrət Əmirovun “1001 gecə” baletinin, “Nizami” simfoniyasının partituralarını təqdim edəcəkdir.
Bölmənin digər xəbərləri
