AZƏRBAYCAN HÖKUMƏTİ AQRAR SAHƏYƏ SUBSİDİYALARIN HƏCMİNİ ARTIRIR
Azərbaycan hökuməti ərzaq təhlükəsizliyini təmin etmək məqsədi ilə kənd təsərrüfatı üçün subsidiyaların həcmini artıracaqdır.
AZƏRTAC xəbər verir ki, bunu İqtisadi İnkişaf Naziri Heydər Babayev bildirmişdir. O demişdir ki, hazırda hökumət subsidiya formasını dəqiqləşdirir. Bu, əlavə vergi güzəştləri də ola bilər. Gələn ildən kənd təsərrüfatı istehsalçılarını, torpaq vergisi istisna olmaqla, yenidən vergi ödənişlərindən azad etmək planlaşdırılır. Bununla yanaşı, buğda idxalının əlavə dəyər vergisindən (ƏDV) azad, taxıl məhsullarının istehsalı ilə əlaqədar vergi güzəştləri tətbiq oluna bilər.
Taxıl fondunun yaradılması ilə bağlı tədbirlərin görülməsini vacib sayan nazir nəzərə çatdırmışdır ki, bir çox təsərrüfatlar toxum almaqda çətinliklərlə üzləşirlər. İqtisadi İnkişaf Nazirliyi Kənd Təsərrüfatı Nazirliyi ilə birgə təkliflər planı hazırlayaraq hökumətə təqdim etmək niyyətindədir.
H.Babayev fermerlərin aldığı yanacaq və mineral gübrələr üçün 50 faiz kompensasiya ödənilməsi məqsədi ilə 2007-ci ildə Azərbaycanın dövlət büdcəsindən kənd təsərrüfatı sahəsinin subsidiyasına 68,9 milyon manat ayrıldığını vurğulamışdır.
Bölmənin digər xəbərləri
