AZƏRBAYCAN NÜMAYƏNDƏLƏRİ DUBLİN DİPLOMATİK KONFRANSINDA İŞTİRAK EDƏCƏKLƏR
19 aprel kasetli silahlara qarşı ümumdünya fəaliyyət günüdür. AZƏRTAC xəbər verir ki, bu münasibətlə aprelin 18-də Beynəlxalq Mətbuat Mərkəzində “Minalar Əleyhinə Azərbaycan Kampaniyası” İctimai Birliyi (İB) mətbuat konfransı keçirmişdir.
Birliyin sədri Hafiz Səfixanov bildirmişdir ki, Azərbaycan ərazisində kasetli silahların tətbiqinin monitorinqi aparılmış və layihə 3 rayonda - Füzuli, Tərtər və Tovuzda həyata keçirilmişdir. Azərbaycan ərazisində döyüş əməliyyatlarının aparıldığı dövrdə keçmiş SSRİ-də istehsal olunmuş kasetli silahlardan istifadə edilmişdir. Bunlar, əsasən, kasetli aviabombalar, “Qrad” tipli reaktiv atəş sistemi və 120 millimetrlik mərmilərdir.
Bildirilmişdir ki, Dağlıq Qarabağ ərazisinin minalardan təmizlənməsi prosesini həyata keçirən “Halo Trast” təşkilatı 162 ərazinin bu silahın təsirinə məruz qaldığını bildirmiş və 2007-ci ildə kasetli silahların 6500- dən çox kiçik hissələrini aşkar etmişdir.
Hafiz Səfixanov demişdir ki, kasetli silahlar ən çox təyyarələr vasitəsilə atılır və təyin olunan nöqtəyə çatdıqda partlayaraq böyük əraziyə yayılır. Kasetli silahların tərkibində 566 xırda hissəcik olur və silahların 10 faizi yerə düşdükdə partlamır. Bu da sonradan böyük fəsadlar törədir.
Natiq vurğulamışdır ki, indiyədək kasetli silahların təsirinə məruz qalmış 30 ölkə və ərazi müəyyən edilmişdir. Bu siyahıya Azərbaycan da daxildir.
H.Səfixanov diqqətə çatdırmışdır ki, kasetli silahlara qarşı ümumdünya fəaliyyət günü ərəfəsində dünyanın müxtəlif ölkələrində fəaliyyət göstərən 105 din xadimi kasetli silahların qadağan olunması üçün bütün hökumətlərə müraciət qəbul etmişdir.
Mətbuat konfransında çıxış edən Beynəlxalq Qızıl Xaç Komitəsinin (BQXK) Azərbaycan nümayəndəliyinin rəhbəri Martin Amaşer bildirmişdir ki, 2007-ci iln fevralında Oslo şəhərində kasetli silahalrın ləğv edilməsi ilə bağlı 46 ölkənin rəsmi nümayəndəsinin iştirakı ilə “Oslo bəyannaməsi” qəbul edilmişdir. Son illər ərzində bu istiqamətdə müxtəlif şəhərlərdə bir çox beynəlxalq konfranslar keçirilmişdir. Mayın 19-dan 30-dək İrlandiyanın paytaxtı Dublin şəhərində keçiriləcək diplomatik konfransda kasetli silahların istehsalı, tətbiqi, ötürülməsi və ehtiyatın toplanmasını qadağan edən yekun beynəlxalq sənəd hazırlanacaqdır. Bu konfransa 100-dən çox ölkəni təmsil edən diplomatlar qatılacaqlar.
Martin Amaşer demişdir ki, Dublin konfransında Azərbaycanı Xarici İşlər Nazirliyinin yüksək səviyyəli diplomatı təmsil edəcəkdir.
