Bakı, 9 fevral (AZƏRTAC). Fevralın 8-də Qaradağ rayonunda ötən ilin yekunları və qarşıda duran vəzifələrə həsr olunmuş yığıncaq keçirilmişdir.

Yığıncaq iştirakçıları əvvəlcə Lökbatan qəsəbəsində Heydər Əliyevin adına parkda ulu öndərin abidəsi önünə gül dəstələri düzmüş, xatirəsini ehtiramla yad etmişlər.

Tədbiri açan Qaradağ Rayon İcra Hakimiyyətinin başçısı Süleyman Mikayılov yanvarın 15-də Azərbaycan Prezidenti İlham Əliyevin sədrliyi ilə Nazirlər Kabinetinin 2012-ci ilin sosial-iqtisadi inkişafının yekunlarına həsr olunmuş iclasında dövlətimizin başçısının nitqindən irəli gələn vəzifələri diqqətə çatdırmışdır.

İcra hakimiyyətinin başçısı məruzəsində bildirmişdir ki, hesabat dövründə Qaradağ rayonunda 567 milyon 774,1 min manatlıq və ya 2011-ci ilin müvafiq dövrü ilə müqayisədə 16,5 faiz çox sənaye məhsulu istehsal edilmişdir. Rayon iqtisadiyyatının aparıcı sahəsini təşkil edən neft və qaz sənayesi müəssisələrində 411,6 min ton xam neft, 349,9 milyon kubmetr təbii qaz hasil edilmiş, 558,2 min ton sement istehsal olunmuşdur.

Ötən ildə rayonun sosial-iqtisadi sahələrinin inkişafına 369 milyon 93,1 min manat investisiya qoyulmuşdur. İstifadə edilmiş investisiyaların 246 milyon 876,5 min manatı tikinti-quraşdırma işlərinə sərf edilmişdir. Bu da 2011-ci ilə nisbətən 2,8 dəfə artıqdır.

Qeyd edilmişdir ki, hesabat dövründə rayonda orta əmək haqqı 2011-ci ilə nisbətən 18,7 faiz artaraq 966,4 manata çatmışdır. Ötən ildə rayonda 1.310 yeni iş yeri açılmışdır.

Hesabat dövründə rayonun qəsəbələrində genişmiqyaslı quruculuq, abadlıq və yaşıllaşdırma işlərinin həyata keçirilməsi rayon icra hakimiyyətinin fəaliyyətinin prioritet istiqamətini təşkil etmişdir. Təhsil, səhiyyə, mədəni-maarif müəssisələrinin təmiri və maddi-texniki bazalarının möhkəmləndirilməsi istiqamətində xeyli iş görülmüşdür.

Məruzə ətrafında çıxış edən idarə, müəssisə, təşkilat rəhbərləri ötən il həyata keçirilmiş uğurlu işlərlə yanaşı, yol verilmiş nöqsanları da ətraflı təhlil etmiş, mövcud problemlərlə bağlı təkliflərini bildirmişlər. Çıxış edənlər əldə olunan uğurlardan, mövcud problemlər və onların aradan qaldırılması yollarından danışmışlar.

Prezident Administrasiyasının məsul işçisi Tağı Tağıyev, Milli Məclisin deputatı Ağalar Vəliyev çıxış edərək 2012-ci ildə respublikamızın qazandığı uğurlardan danışmış, qarşıda duran vəzifələri qeyd etmiş, tövsiyələrini bildirmişlər.