Bakı, 27 yanvar (AZƏRTAC). Yanvarın 27-də Bakıda Əmək və Əhalinin Sosial Müdafiəsi Nazirliyinin, Azərbaycan Həmkarlar İttifaqları Konfederasiyasının (AHİK), Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) təşkilatçılığı ilə “Sosial tərəfdaşlıq: əməyin mühafizəsi, risklərin qiymətləndirilməsi və iş yerlərinin attestasiyası” mövzusunda konfrans keçirilmişdir.

AZƏRTAC xəbər verir ki, sosial tərəfdaşların, beynəlxalq ekspertlərin, müəssisə, idarə və təşkilatların əməyin mühafizəsinə məsul şəxslərinin iştirakı ilə keçirilən konfransda Əmək və Əhalinin Sosial Müdafiəsi Nazirliyi yanında Təhlükəsiz və Sağlam Əmək Şəraiti üzrə Milli Üçtərəfli Sosial Şuranın yaradılması ilə bağlı qərar imzalanmış və Şuranın Əsasnaməsi təsdiq olunmuşdur.

Qərarı əmək və əhalinin sosial müdafiəsi naziri Füzuli Ələkbərov, AHİK-in sədri, Milli Məclisin deputatı Səttar Mehbalıyev və ASK-nın prezidenti Məmməd Musayev imzalamışlar.

Konfransın açılışında çıxış edən əmək və əhalinin sosial müdafiəsi naziri Füzuli Ələkbərov bildirmişdir ki, iqtisadiyyatda müasir texnologiyaların tətbiqi, ölkədə irimiqyaslı infrastruktur layihələrinin icrası prosesinin geniş vüsət aldığı bir dövrdə təhlükəsiz və sağlam əmək şəraitinin təminatı xüsusi aktuallıq kəsb edir. Digər tərəfdən, istehsalatda baş verən və işçilərin ölümü, yaxud xəsarət alması ilə nəticələnən bədbəxt hadisələrin təhqiqatı zamanı belə hadisələrin məhz əməyin mühafizəsi və texniki təhlükəsizlik qaydalarına əməl edilməməsi səbəbindən baş verdiyi müəyyən edilmişdir.

Nazir vurğulamışdır ki, iş yerlərində təhlükəsiz və sağlam əmək şəraitinin yaradılması üçün riskin düzgün qiymətləndirilməsi, iş yerlərinin attestasiyasının vaxtında və keyfiyyətlə aparılması, ümumən işəgötürənlərin bu məsələlərə məsuliyyətlə yanaşması olduqca vacibdir. Bu sahədə mühüm uğurların qazanılması üçün sosial tərəfdaşların səylərinin birləşdirilməsi və əlaqəli fəaliyyətinin təşkili vacib şərtlərdən biridir. Ötən il iş yerlərində sağlam və təhlükəsiz şəraitin yaradılması istiqamətində sosial tərəfdaşların səylərinin birləşdirilməsi və onların bu istiqamətdə fəaliyyətinin əlaqələndirilməsi məqsədilə Təhlükəsiz və Sağlam Əmək Şəraiti üzrə Milli Üçtərəfli Sosial Şuranın yaradılması təklifi irəli sürülmüşdü. Təklif sosial tərəfdaşlar tərəfindən dəstəklənmişdir.

F.Ələkbərov diqqətə çatdırmışdır ki, 2011-ci ilin ortalarından nazirlik yanında ixtisaslaşmış QHT-lərin təmsil olunduğu və tərkibində nazirliyin fəaliyyət istiqamətləri üzrə işçi qrupların formalaşdığı İctimai Şura fəaliyyət göstərir. Ötən müddətdə sosial qanunvericiliyin təkmilləşdirilməsi üçün səmərəli təkliflərin hazırlanması, sosial müdafiə tədbirlərinin daha effektiv təşkili, vətəndaş müraciətlərinin yerində və obyektiv araşdırılması və digər məsələlərdə İctimai Şura tərəfindən mühüm işlər görülmüşdür. İxtisaslaşmış QHT-lərin, uyğun dövlət qurumlarının nümayəndələrinin bu Şuraya cəlb edilməsi nəzərdə tutulur.

AHİK-in sədri, Milli Məclisin deputatı Səttar Mehbalıyev bildirmişdir ki, əsası ümummilli lider Heydər Əliyev tərəfindən qoyulmuş milli sosial inkişaf modelini hazırda Prezident İlham Əliyev uğurla davam etdirir. Ölkədə sosial müdafiə sistemi keyfiyyətcə yaxşılaşdırılır. Bu sahənin inkişafı üçün mühüm tədbirlər həyata keçirilmişdir.

Sosial Şuranın yaradılmasının əhəmiyyətindən danışan S. Mehbalıyev vurğulamışdır ki, iş yerlərində təhlükəsiz və sağlam əmək şəraitinin yaradılması üçün riskin düzgün qiymətləndirilməsi, iş yerlərinin attestasiyasının vaxtında və keyfiyyətlə aparılması vacibdir. Bu sahənin inkişafı üçün sosial tərəfdaşların əlaqəli fəaliyyəti mühümdür.

AHİK-in sədri onu da qeyd etmişdir ki, yoxlamalar nəticəsində ölkədə fəaliyyət göstərən inşaat, neft-qaz, elektroenergetika, dəmir yolu sahələrində əməyin mühafizəsində risklərin daha çox olduğu müəyyənləşdirilmişdir.

Ölkədə uğurlu sosial-iqtisadi islahatların həyata keçirildiyini deyən ASK-nın prezidenti Məmməd Musayev ötən ilin sosial-iqtisadi göstəricilərinə toxunmuş, Sosial Şuranın əhəmiyyətindən danışmış, ASK-nın fəaliyyəti barədə məlumat vermişdir.

Konfransda MDB məkanında ilk dəfə olaraq yaradılan Üçtərəfli Sosial Şuranın sosial tərəfdaşlıq prinsiplərini yeni formatda daha dolğun şəkildə təcəssüm etdirəcəyinə və əməyin mühafizəsi ilə bağlı vahid dövlət siyasətinin inkişafına dəyərli töhfələr verəcəyinə əminlik ifadə olunmuşdur.

Tədbirdə yerli və beynəlxalq ekspertlərin iş yerlərində risklərin qiymətləndirilməsi və iş yerlərinin attestasiyasının aparılması məsələlərinə dair çıxışlar dinlənilmiş, müzakirələr aparılmışdır.