Türkiyədə peyklərin işlənib hazırlanması sahəsində ən yaxşı gənc mühəndis-tədqiqatçılar müəyyən olunacaq
Ankara, 20 may, AZƏRTAC
Türkiyənin “Türksat” telekommunikasiya şirkəti T3 Fondu ilə birgə peyklərin işlənib hazırlanması sahəsində ən yaxşı gənc mühəndis-tədqiqatçıların müəyyənləşdirilməsi üzrə doqquzuncu müsabiqə elan edib.
AZƏRTAC xəbər verir ki, bu il 21-28 may tarixlərində keçiriləcək müsabiqənin qalibləri qarşıda Adana şəhərində təşkil olunacaq “TEKNOFEST-2024” Aerokosmik və Texnologiya Festivalı zamanı təltif ediləcəklər.
Təşəbbüsün məqsədi kiçik büdcəli peyklərin düzəldilməsi üzrə tələbələrin səylərini dəstəkləmək, eləcə də bu sahədə ali məktəblərin təcrübə mübadiləsini təmin etməkdir ki, bu da, öz növbəsində, aerokosmik sahədə yeni mütəxəssislər nəslinin formalaşdırılmasına töhfə verir.
Peyklərin modelləşdirilməsi və düzəldilməsi üzrə ilk müsabiqə “Türksat” şirkəti tərəfindən hələ 2016-cı ildə təşkil olunub və sonradan populyar “TEKNOFEST” festivalının təşkilatçıları bu tədbiri dəstəkləyib.
Əgər birinci müsabiqədə üç komandanın heyətində 18 tələbə iştirak etmişdisə, sonuncuda 6 ölkədən 114 komandanın heyətində 1000-dən çox gənc mühəndis artıq qeydiyyatdan keçib.
Bütün peyklər raketlərlə 700 metr yüksəkliyədək buraxılacaq.
Qaliblər böyük məbləğdə pul mükafatı qazanacaqlar.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
