SİYASƏT
Azərbaycanın təşəbbüsü ilə yaradılan Qadınlar Platforması Qoşulmama Hərəkatının nüfuzunu daha da artıracaq - ŞƏRH
![Azərbaycanın təşəbbüsü ilə yaradılan Qadınlar Platforması Qoşulmama Hərəkatının nüfuzunu daha da artıracaq - ŞƏRH](/files/2023/3/1200x630/17006407494518139740_1200x630.jpg)
Bakı, 22 noyabr, AZƏRTAC
Azərbaycanın təşəbbüsü ilə Qoşulmama Hərəkatının (QH) Qadınlar Platformasının yaradılmasını Bakının beynəlxalq insan hüquqlarına mühüm töhfəsi kimi də dəyərləndirmək olar. Bu, eyni zamanda, Hərəkatın qlobal gücünü daha da artıracaq. Təşəbbüsün Qoşulmama Hərəkatına üzv dövlətlər tərəfindən tam dəstəklənməsi Qadınlar Platformasının yaradılması üçün siyasi iradənin mövcudluğundan xəbər verdi.
Bu sözləri AZƏRTAC-a açıqlamasında politoloq Ramiz Alıyev söyləyib.
Qoşulmama Hərəkatının Bakıda keçirilən “Qadınların hüquqlarının inkişaf etdirilməsi və səlahiyyətlərinin artırılması” mövzusunda konfransının qlobal miqyasda mühüm siyasi hadisə olduğunu vurğulayan politoloq deyib: “Hər şeydən əvvəl qeyd edim ki, Azərbaycanın Qoşulmama Hərəkatına sədrliyinin yekdil qərarla 2023-cü ilin sonunadək uzadılması ölkəmizə olan etimadın göstəricisidir. Dünyada sülh və təhlükəsizliyə, dialoqa, əməkdaşlığa önəm verən Azərbaycan beynəlxalq prinsipləri xarici siyasətində əsas tutur. Dünyada BMT Baş Assambleyasından sonra ən böyük beynəlxalq təsisat olan Qoşulmama Hərəkatı son illər Prezident İlham Əliyevin rəhbərliyi ilə daha səmərəli fəaliyyət göstərir. Dövlətimizin başçısının Qoşulmama Hərəkatının güclənməsində oynadığı rol ölçüyəgəlməzdir. Onun qurumun konfranslarında çıxışı zamanı səsləndirdiyi mesajlar Azərbaycanın humanist dəyərlərə, haqq-ədalətə nə qədər önəm verdiyini sübut edir. Həmçinin Azərbaycan üzv və ya sədri olduğu beynəlxalq təşkilatların nüfuzunu yüksəltməyə qadir bir dövlətdir. Qadın hüquqları ilə bağlı təşəbbüs Azərbaycanın qadınlara hər zaman böyük önəm, əhəmiyyət verməsinin təsdiqidir”.
Ailə dəyərlərinə, ənənələrə bağlı olan Azərbaycan qadınlarının tarixən ictimai-siyasi proseslərdə fəal iştirak etdiklərini, taleyüklü məsələlərdə kişilərlə çiyin-çiyinə vuruşduqlarını bildirən R.Alıyev diqqətə çatdırıb ki, 1901-ci ildə müsəlman dünyasında qızlar üçün ilk dünyəvi məktəb Azərbaycanda açılıb. Ölkəmiz, eyni zamanda, 1919-cu ildə qadınlara səsvermə hüququ verəndə bəzi Qərb ölkələrində nəinki qadınların, hətta qaradərili insanların hüquq və azadlıqları kobud şəkildə pozulurdu. Məhz vətənpərvər Azərbaycan qadınlarının böyütdükləri oğlanların sayəsində torpaqlarımız 30 illik erməni işğalından azad olundu. Odur ki, qadınlara dəyər verilməsi Azərbaycan dövləti üçün hər zaman əsas məsələlərdən olub. Qadın hüquqlarının Qoşulmama Hərəkatının gündəliyində yer alması da Bakının təşəbbüsüdür. Hələ 2019-cu il Bakı Zirvə toplantısının yekun sənədində məlum mövzuya xüsusi diqqət yetirilib və bu sahədə üzv dövlətlərin öhdəlikləri müəyyən edilib.
R.Alıyev hesab edir ki, Qoşulmama Hərəkatının “Qadınların hüquqlarının inkişaf etdirilməsi və səlahiyyətlərinin artırılması” mövzusunda Bakıda keçirilən konfransda müzakirə olunan hər bir məsələ özlüyündə qlobal əhəmiyyətlidir. “Prezident İlham Əliyevin çıxışında toxunduğu məqamlar, xüsusilə də bəzi Qərb dövlətlərinin neokolonializm siyasəti iştirakçılar tərəfindən maraqla qarşılandı. Azərbaycan Fransanın yürütdüyü neokolonializm siyasətini qlobal səviyyədə ifşa edə bildi. Biz Fransanı bu cür utancverici praktikadan əl çəkməyə çağırmışıq. Təbii ki, kolonializm qadınların hüquqlarını kobud şəkildə pozur. Qoşulmama Hərəkatına üzv dövlətlərin əksəriyyəti Qərbin neokolonializm siyasətindən birbaşa və ya dolayı şəkildə əziyyət çəkib. Bu gün Qərbin təsis etdiyi beynəlxalq təşkilatlar öz funksiyalarını həyata keçirə bilməyərək, siyasi alətə, təzyiq rıçaqına çevriliblər. Odur ki, Qoşulmama Hərəkatının beynəlxalq təşəbbüslərlə çıxış etməsinə ciddi ehtiyac yaranıb. Bu hərəkatın həm üzvlərinin sayı, gücü və nüfuzu nəzərə alınmaqla, o, digər beynəlxalq təşkilatlarda daha ədalətli, təsirli mövqe ortaya qoymaq imkanına malikdir. Azərbaycanın təşəbbüsü ilə Qoşulmama Hərəkatının Qadınlar Platformasının yaradılmasını qurumun beynəlxalq miqyasda artan nüfuzunu daha da gücləndirəcək. Bu, həm də insan hüquqlarına, o cümlədən qadınların maraqlarının qorunmasına beynəlxalq diqqəti cəlb edəcək, həmçinin bu sahədə bir sıra problemlərin həllinə töhfə verəcək”, - deyə politoloq bildirib.