BBVB MAYIN 1-DƏN İSTİFADƏÇİLƏRİN YENİ TİCARƏT-HESABLAŞMA SİSTEMİNƏ MİQRASİYASINA BAŞLAYIR
Bakı Banklararası Valyuta Birjası (BBVB) mayın 1-dən istifadəçilərin yeni ticarət-hesablaşma sisteminə miqrasiyasına başlayır.
Birjanın informasiya-təhlil şöbəsindən AZƏRTAC-ın müxbirinə bildirmişlər ki, proqram təminatı BBVB-nin 2002-ci ilin martında ilk dəfə təqdim etdiyi Birjanın Elektron Hərracları Sisteminin (BEHS) yeni versiyasından ibarətdir. Yeni proqram təminatı miqrasiya BEHS-in ticarət və informasiya terminallarının istifadəçilərinə aid olacaqdır. Bankların treyderləri ticarət terminalları vasitəsilə mütəşəkkil valyuta və banklararası kredit bazarlarında diler funksiyalarını həyata keçirə biləcəklər. BEHS-in yeni interfeysinin imkanları sayəsində banklar bazarın hətta yüksək olmayan likvidliyi dövründə valyuta əqdləri bağlanması ehtimalını xeyli artıran sifarişlərin yeni tipindən istifadə edə biləcəklər. Risklərin idarə edilməsini təkmilləşdirmək məqsədi ilə risk-menecerlər treyderlər arasında ticarət limitlərini müstəqil bölüşdürə biləcəklər. Bundan əlavə, BEHS-in informasiya terminalları sayəsində kredit müəssisələrinin xəzinədarları, holdinqlərin və iri korporotiv müştərilərin maliyyə direktorları, habelə kütləvi informasiya vasitələri real zaman rejimində ölkənin maliyyə bazarı seqmentlərinin monitorinqini aparmaq imkanı əldə edəcəklər.
Bu, bütün istifadəçilərin bazarlara çıxmalarına bərabər şərait yaratmağa və onları keyfiyyətli xidmətlərlə, o cümlədən hərracların, hesablaşmaların təşkili, bir sıra mühüm risklərin idarə olunması, eləcə də onların informasiya texnologiyaları ilə dəstəklənməsi üzrə xidmətlərlə təmin etməyə çalışan BEHS-in inkişaf konsepsiyasına cavab verir. BEHS-in yeni ticarət-hesablaşma sisteminin tətbiqi birjaya yeni maliyyə vasitələrindən istifadə etmək imkanı verəcəkdir. BBVB yeni texnoloji ideyaların hazırlanmasını, yeni maliyyə vasitələrinin və müştərilərə maliyyə bazarının valyuta və pul seqmentlərində göstərilən xidmətlərin tətbiqini gələcəkdə də davam etdirəcəkdir.
Qeyd etmək lazımdır ki, Birjanın Elektron Hərracları Sisteminin fəaliyyət göstərdiyi altı il ərzində BBVB-nın dövriyyəsi 7,2 milyard dolları ötmüşdür. Banklarla bağlanmış əqdlərin sayı isə 10 minə yaxınlaşır ki, bu da elektron sisteminə tələbat olduğunu göstərir. Qeyd etmək lazımdır ki, BEHS-in yeni proqram və texniki təminatı informasiya texnologiyaları təhlükəsizliyinin təmin olunması məsələlərini yeni texnoloji səviyyəyə çıxarır. Məsələn, BEHS-in istifadəçiləri elektron rəqəmli imzalardan istifadə edəcəklər. Xatırladaq ki, BBVB proqram-texniki vasitələrin modernləşdirilməsinə 2006-cı ildə başlamışdır. Birja Rusiyanın “İNİST” şirkətinə sifariş verilmiş yeni proqram təminatından başqa, müasir server və telekommunikasiya avadanlığı almışdır. Bundan əlavə, birja yaxın vaxtlarda BBVB-ni onun çoxdankı və etibarlı tərəfdaşı olan “AzAvroTel” şirkəti ilə bağlayan optik lifli kanalın buraxılış qabiliyyətini xeyli genişləndirmək niyyətindədir.
