Beyləqanda Qarabağ müharibəsi şəhidlərinin xatirəsinə abidə ucaldılmışdır
Beyləqan, 31 oktyabr (AZƏRTAC). Beyləqan rayonunun Dünyamalılar kəndində Qarabağ müharibəsində şəhid olmuş kənd sakinlərinin xatirəsinə ucaldılmış abidə istifadəyə verilmişdir.
AZƏRTAC xəbər verir ki, bu münasibətlə keçirilən mərasimdə şəhid ailələrinin üzvləri, keçmiş döyüşçülər, kənd sakinləri, rayon ictimaiyyətinin nümayəndələri çıxış edərək qəhrəman oğullarımızın respublikamızın müstəqilliyi və ərazi bütövlüyü uğrunda fədakar mübarizəsindən danışmış, abidənin gələcək nəslin vətənpərvərlik ruhunda böyüməsində mühüm rol oynayacağını vurğulamışlar. Bildirilmişdir ki, müharibə zamanı Beyləqan rayonundan 132, o cümlədən Dünyamalılar kəndindən 19 döyüşçü şəhid olmuşdur.
Mərasim iştirakçıları, həmçinin həmin gün toy mərasimi olan gənclər abidənin önünə gül-çiçək dəstələri düzmüş, şəhidlərin ruhuna dualar oxumuşlar.
Mərasimdə məktəblilərin ifasında bədii kompozisiya göstərilmişdir.
Bölmənin digər xəbərləri
