Bakı, 17 iyun, AZƏRTAC

“Çiçəklənən Ermənistan” partiyasının sədri, Ermənistan parlamentindəki “Sarukyan” fraksiyasının lideri, milyonçu Qaqik Sarukyanın deputat toxunulmazlığının parlament tərəfindən ləğv edilməsi, sözügedən şəxsin ifadə vermək üçün ölkənin təhlükəsizlik qüvvələri tərəfindən istintaqa cəlb edilməsi baş nazir Nikol Paşinyanın öz rəqiblərinə qarşı həyata keçirdiyi repressiya siyasətinin tərkib hissəsidir. Nəzərə alsaq ki, Qaqik Sarukyanın problemləri onun baş naziri və komandasını tənqid etməsindən və istefaya çağırmasından sonra başlayıb, o zaman baş verənlərin əsasında bilavasitə siyasi motivlərin dayandığı söyləyə bilərik.

Bu fikirləri AZƏRTAC-a açıqlamasında siyasi ekspert Elçin Mirzəbəyli bildirib.

O qeyd edib ki, Nikol Paşinyan küçədən hakimiyyətə gələndə, xüsusilə də onun baş nazir seçilməsi üçün Ermənistan parlamentində müxtəlif manipulyativ ssenarilər işə düşəndə, heç bir idarəçilik təcrübəsi və sistemli düşüncə tərzi olmayan bu şəxsə dəstək verənlərdən biri də Qaqik Sarukyan olmuşdu. 2018-ci il aprelində Ermənistanın kütləvi informasiya vasitələrinə açıqlama verən “Çiçəklənən Ermənistan” partiyasının sədri baş nazir postuna namizədliyini irəli sürməyəcəyini və Paşinyanı müdafiə edəcəyini bəyan etmişdi.

Ekspert bildirib ki, Ermənistanda 2017-ci ildə keçirilən parlament seçkilərində Sarukyanın partiyası 31 yer qazanmışdı və üçdəiki səs çoxluğu tələb edən qərarların qəbulu zamanı kifayət qədər ciddi təsir imkanlarına malik idi. Bu isə parlamentdə tərəfdarları cəmi 9 nəfərdən ibarət olan Paşinyanın baş nazir postuna gətirilməsi üçün həlledici amillərdən biri kimi müstəsna əhəmiyyətə malik idi. Bu məqamlara diqqət çəkməkdə məqsədim Nikol Paşinyanın heç bir fundamental siyasi və ideoloji prinsipə sahib olmayan, öz maraqları üçün istənilən qüvvə ilə bir arada olmağı məqbul sayan bir şəxs olduğunu vurğulamaqdır.

“Qaqik Sarukyan Ermənistanda öz “biznes-imperiyasını” sabiq prezidentlər Robert Köçəryan və Serj Sarkisyanın dövründə qurmuşdu. Həmin dövrdə Nikol Paşinyan və yaxın əhatəsi Sarukyanı ölkənin siyasi rəhbərliyi ilə birlikdə “Ermənistanın sərvətlərini talamaqda” ittiham edirdilər. Amma buna baxmayaraq, Paşinyan küçədən hakimiyyətə gəlişini leqallaşdırmaq üçün Qaqik Sarukyanla əməkdaşlıq haqqında memorandum imzaladı və bu anlaşmanın sayəsində Sarukyanın tərəfdarları 2018-ci ildə keçirilən seçkilərdə parlamentdə 26 yer qazandılar”, - deyə E.Mirzəbəyli qeyd edib.

Siyasi ekspert diqqətə çatdırıb ki, Nikol Paşinyanla Sarukyanın problemləri, əsasən, birincinin öz tərəfdarları ilə birlikdə ölkədəki kapitalı ələ keçirmək istiqamətində addımlar atdıqları və bunun üçün mediada zəmin hazırladıqları zaman başlanıb. Dövlət büdcəsinin vəsaitlərini müxtəlif vasitələrlə ailəsinin və tərəfdarlarının biznesinin qurulmasına və böyüməsinə yönəldən Paşinyan ictimaiyyətin diqqətini özündən əvvəl qazanılan şəxsi mülkiyyətin, kapitalın korrupsiya yolu ilə əldə olunduğu barədə real və qurama faktlara yönəltməyə başladı, “korrupsiyaya qarşı mübarizə” adı altında özünün və tərəfdarlarının nəzarətindən kənardakı iri kapitalı öz əlində cəmləmək üçün bütün resursları, təzyiq mexanizmlərini işə saldı.

Vurğulayıb ki, bir müddət öncə Sarukyanın və tərəfdarlarının Nikol Paşinyana qarşı daha qabarıq şəkildə nəzərə çarpmağa başlayan ittihamlarının əsasında da məhz bu amillər dayanırdı. Qeyd olunurdu ki, baş nazirin məqsədi heç də özünün iddia etdiyi kimi, Ermənistanı böhran vəziyyətindən çıxarmaq, demokratik azadlıqları bərpa etməkdən ibarət deyil. Paşinyan dövlətin təsir mexanizmlərindən istifadə etməklə ölkənin biznes elitasının yalnız öz ailəsindən və yaxınlarından ibarət olmasına çalışır, kapitalını onunla bölüşmək istəməyənlərin varidatına “korrupsiyaya qarşı mübarizə” pərdəsi altında zorla yiyələnməyə cəhd göstərir.

E.Mirzəbəyli diqqətə çatdırıb ki, Sarukyan öz kapitalını Paşinyan hakimiyyətindən öncə qazanıb. Yəni, bu gün ona qarşı irəli sürülən ittihamlar əgər realdırsa, o zaman Qaqik Sarukyan haqqında cinayət işi xeyli öncə, Paşinyanı tənqid etməzdən və istefaya çağırmazdan əvvəl açılmalıydı. Amma belə olmadı. Bütün bunlar isə bir daha təsdiqləyir ki, Nikol Paşinyanın yeganə məqsədi rəqiblərini, onunla eyni mövqeni bölüşməyən siyasətçiləri və iş adamlarını müxtəlif vasitələrlə sıradan çıxarmaqdır. Onun saxta demokrat obrazının arxasında acgöz diktator siması gizlənir.

Qeyd edilib ki, Ermənistan parlamentinin Sarukyanın deputat toxunulmazlığının ləğvinə və həbsinə razılıq verilməsi ilə bağlı qərarının qəbulu edildiyi zaman Ermənistanda "Çiçəklənən Ermənistan" partiyasının sədrinin müdafiəsi ilə bağlı kütləvi aksiya keçirilib. Aksiya polisin sərt müdaxiləsi nəticəsində dağıdılıb və aralarında çoxlu sayda dünya və Avropa çempionlarının da olduğu 100-ə yaxın etirazçı həbs olunub. Baş verən hadisələr zamanı insanların ifadə azadlığı, azad toplaşma hüququ, hüquq-mühafizə orqanları tərəfindən lüzumsuz yerə güc tətbiq olunmaması, KİV-in sərbəst fəaliyyətinə imkan yaradılması və s. kimi Qərbin “önəm verdiyi” bütün dəyərlər ayaq altına atılıb. ABŞ Dövlət Departamenti, Avropa Şurası Parlament Assambleyası, ATƏT-in Media Azadlığı üzrə nümayəndəsi, ABŞ-ın və Qərb ölkələrinin Ermənistandakı səfirlikləri isə özlərini elə aparırlar ki, sanki heç nə baş verməyib. Populist çıxışları ilə tanınan Nikol Paşinyan isə bu susqunluğun fonunda demokratiya adı altında ölkənin tanınmış siyasi və ictimai xadimlərinə qarşı repressiya vasitələrindən geniş şəkildə istifadə etməsi və onları bir-bir sıradan çıxararaq zərərsizləşdirməsi heç kimə sirr deyil.

Elçin Mirzəbəyli vurğulayıb ki, Ermənistanın baş naziri öz siyasi rəqiblərini bir-bir həbsə atır, onları “asfalta uzatmaqla” hədələyir və asfalta uzadır. Paşinyan tərəfindən indiyədək Ermənistanın keçmiş rəhbərliyinə qarşı silsilə cinayət işləri açılıb və hazırda istintaq davam edir.

Bu qanunsuzluqlar, insan hüquq və azadlıqlarının kobud şəkildə pozulması fonunda bəzi beynəlxalq qurumlar, ənənəvi “hüquq müdafiəçiləri”, beynəlxalq QHT-lər, ümumilikdə, bir sıra Qərb təşkilatları sükuta qərq olublar. Öz rəqiblərini susdurmaq üçün siyasi təqib yolunu seçən, ölkənin ana müxalifətinin rəhbərini parlamentdən həbsxanaya yola salan balaca diktatorun bu əməllərinə ənənəvi “azadlıq carçı”larının heç bir reaksiyası nəzərə çarpmır.

"Gələcəkdə özünə rəqib olacaq və ya rəqib olmaq ehtimalı ola bilən istənilən şəxsi korrupsiyaya qarşı mübarizə adı altında həbs etməsi və bunun fonunda Qərbin sükutu Nikol Paşinyanın əl-qolunu daha da açır.

Azərbaycanofobiyadan ilhamlanan bəzi təşkilatlar ölkəmizdə ən xırda məsələyə reaksiya verdikləri halda, Ermənistanda baş verən qanunsuzluğa qarşı bir dəfə də olsun hansısa ittiham səsləndirməyiblər. Görünür, onların demokratiyasının fəlsəfəsi də budur: Əgər mənim adamımsansa və mənə işləyirsənsə, deməli, demokratsan.

Bu arada ABŞ Prezidenti Franklin Ruzveltin adına çıxılan və onun guya Nikaraquanın dövlət başçısı haqqında söylədiyi iddia edilən məşhur “Samosa ola bilsin ki, köpək oğludur, amma bizim köpək oğludur” deyimini xatırlamaq da yerinə düşər. İndiki məqamda Ruzveltin Samosa haqqında bu sözləri deyib-demədiyi önəmli deyil, önəmli olan bu sözlərin həqiqəti əks etdirməsidir" , - deyə siyasi ekspert bildirib.