“Hürriyyət” qəzeti dövlət başçıları Heydər Əliyevin və Süleyman Dəmirəlin imzaladıqları sənəddən - dostluq və hərtərəfli əməkdaşlıq haqqında Azərbaycan-Türkiyə müqaviləsindən bəhs edərək göstərir ki, bu müqaviləyə əsasən, tərəflərdən biri hər hansı ölkə və ya ölkələr tərəfindən təcavüzə məruz qaldığı halda digər tərəf bu təcavüzün qarşısını almaq məcburiyyəti qarşısında qalacaqdır. Beləliklə, bu müqaviləyə əsasən Azərbaycana hər hansı bir dövlət tərəfindən hərbi təcavüz edildiyi halda Türkiyə bunun qarşısını almaq üçün Azərbaycana kömək edəcəkdir.

Qəzetlər Heydər Əliyevin Türkiyə Böyük Millət Məclisindəki çıxışını da geniş şərh edirlər. “Cümhuriyyət” qəzeti yazır: Bu çıxışında Prezident Türkiyə və Azərbaycanın din, dil və mədəniyyətinin bir-birinə bağlı olduğunu qeyd edərək, “heç bir qüvvə keçmişdə də bizi bir-birimizdən ayıra bilmədi və bundan sonra da ayıra bilməyəcəkdir” dedi.

Qəzetlər Heydər Əliyevin Həcəttəpə Universitetində olması və ona Fəxri doktor adı verilməsi ilə əlaqədar keçirilən mərasimə də geniş yer ayırmışlar.

Türkiyə mətbuatı Prezidentimizin səfəri ilə bağlı bütün materiallarında Heydər Əliyevi türk dünyasının görkəmli siyasi xadimi kimi təqdim edir və bildirir ki, məhz onun rəhbərliyi altında Azərbaycan Ermənistanın təcavüzünə qarşı qəti tədbirlər görəcək, öz ərazi bütövlüyünü qoruyub saxlayacaq, müstəqil dövlət kimi beynəlxalq aləmdə geniş nüfuz qazanacaqdır.

Fevralın 11-də Heydər Əliyev öz iqamətgahında Türkiyənin bir qrup iş adamını ayrı-ayrılıqda qəbul etdi. Söhbətlər zamanı iki ölkə arasında işgüzar əlaqələrin daha da möhkəmlənməsi və inkişaf etdirilməsi, Türkiyənin nüfuzlu şirkətlərinin Azərbaycana investisiyalar qoymaq imkanları hərtərəfli müzakirə olundu. Qəbullarda respublikanın xarici işlər naziri Həsən Həsənov iştirak edirdi.

Fevralın 11-də İstanbulda Heydər Əliyev Türkiyə Baş nazirinin müavini, dövlət naziri Murad Karayalçı ilə görüşdü.

Sonra Azərbaycan Prezidentinin şərəfinə ziyafət verildi.

Azərbaycan Prezidenti İstanbuldan Bakıya yola düşməzdən əvvəl türk dünyasının görkəmli xadimi, ölkənin keçmiş Prezidenti Turqut Özalın qəbrini ziyarət etdi, onun məzarı önünə tər çiçək dəstələri qoydu və Turqut Özalın xatirəsini birdəqiqəlik sükutla yad etdi.

Fevralın 11-də Azərbaycan dövlətinin başçısı İstanbuldakı mətbuat mərkəzində dünyanın əksər ölkələrindən bu səfəri işıqlandırmaq məqsədi ilə gəlmiş jurnalistlər və Türkiyənin, Azərbaycanın kütləvi informasiya vasitələrinin işçiləri üçün mətbuat konfransı keçirdi.

Heydər Əliyev Prezident Süleyman Dəmirəlin dəvəti ilə Türkiyəyə rəsmi səfərinin gedişindən geniş bəhs etdi və bildirdi ki, bu səfərdən məqsəd Türkiyə ilə Azərbaycan arasında əlaqələri daha da genişləndirmək və inkişaf etdirməkdir. Azərbaycan Prezidenti dedi ki, Türkiyə Azərbaycanın müstəqilliyini dünya dövlətləri arasında birinci tanımışdır. Xalqlarımızın tarixi keçmişində, milli ənənələrində, mədəniyyətində çox oxşarlıq var. Dəfələrlə demişəm və bu gün yenə də qeyd edirəm ki, biz bir kökdən olan xalqlarıq. Ona görə də xalqlarımız arasında sıx əlaqələr olması təbii haldır.

Heydər Əliyev Türkiyənin Azərbaycana köməyi və yardımından da bəhs edərək dedi ki, qardaş ölkə respublikamıza təmənnasız olaraq təxminən 100 min ton taxıl vermək barədə xahişimizi müsbət qarşılamışdır və mən əminəm ki, xahişimiz yerinə yetiriləcəkdir. Xarici siyasət sahəsində də Türkiyə Azərbaycana yardımı davam etdirəcəkdir.

Respublika Prezidenti Ermənistanın Azərbaycana təcavüzündən geniş söhbət açdı, işğal olunmuş ərazilərimizdən didərgin düşmüş qaçqınların çox ağır həyat şəraiti barədə jurnalistlərdə aydın təsəvvür yaratdı. O, müharibənin dayandırılması üçün Azərbaycanın gördüyü tədbirlərdən də danışdı. Qeyd etdi ki, biz müharibənin sülh, danışıqlar yolu ilə dayandırılmasına tərəfdarıq və bunun üçün dəfələrlə təşəbbüs göstərmişik. Qarşı tərəf isə nə beynəlxalq təşkilatların, nə də dünya dövlətlərinin təsirinə məhəl qoymur, öz təcavüzkar hərəkətlərini davam etdirir. Hazırda Azərbaycan xalqı öz torpaqlarını azad etmək, ərazi bütövlüyünü qorumaq üçün ayağa qalxmışdır. Biz bir daha bildiririk ki, Ermənistan Silahlı Qüvvələri Azərbaycan ərazisindən çıxmalıdır.

Heydər Əliyev dedi ki, Azərbaycan müstəqil dövlət kimi ümumdünya təcrübəsindən istifadə edərək demokratiya yolu ilə gedir və öz milli ənənələrinə arxalanaraq bu yolu davam etdirəcəkdir. Hazırda respublikamızda hüquqi demokratik dövlət qurulur. Azərbaycanda yaşayan hər bir vətəndaş dinindən, dilindən asılı olmayaraq eyni hüquqlara malikdir və dövlətimiz öz vətəndaşlarının hüquqlarının və insan haqlarının qorunmasına tam təminat verir. Prezident daha sonra bildirdi ki, Azərbaycan sərbəst bazar iqtisadiyyatı yolu ilə gedir və dünyanın bütün ölkələrində, o cümlədən Türkiyədə fəaliyyət göstərən işgüzar dairələrlə sıx əlaqələr yaradılmasına tərəfdardır.

Dövlət başçısı ölkəmizdəki ictimai-siyasi vəziyyət barədə də jurnalistlərə məlumat verdi, daxili və xarici siyasət sahəsində respublika rəhbərliyinin həyata keçirdiyi tədbirlərdən danışdı.

Daha sonra Heydər Əliyev jurnalistlərin çoxsaylı suallarına cavab verdi.

Fevralın 11-də Azərbaycan Respublikasının Prezidenti Heydər Əliyev və onu müşayiət edən şəxslər İstanbul hava limanından Bakıya yola düşdülər.

Bakının Binə hava limanında Azərbaycan Prezidenti Heydər Əliyevi Respublika Ali Sovetinin sədri Rəsul Quliyev, Baş nazir Surət Hüseynov və digər rəsmi şəxslər qarşıladılar.

Aslan Aslanov

AZƏRTAC-ın xüsusi müxbiri

Ankara-İstanbul-Bakı