Bakı, 26 yanvar (AZƏRTAC). BMT-nin baş katibi Pan Gi Mun 27 yanvar - Holokost qurbanlarının xatirəsinə həsr olunmuş Beynəlxalq Anım Günü ilə bağlı dünya ictimaiyyətinə müraciət etmişdir.

BMT-nin Azərbaycandakı nümayəndəliyindən AZƏRTAC-a daxil olmuş müraciətdə bildirilmişdir ki, faşistlər və onların müttəfiqləri tərəfindən 1,5 milyon yəhudi uşaq, on minlərlə isə digər millətlərdən olan uşaqlar Holokost nəticəsində qətlə yetirilmişdir. Bu siyahıya əlilliyi olan uşaqlarla yanaşı, Roma və Sinti xalqlarının nümayəndələri də daxildir. Onlar qəzəb dolu bir ideologiyanın qurbanı olmuşlar. Bu ideologiyaya görə onlar “aşağı səviyyəli” insanlar kateqoriyasına daxil edilmişlər.

Sənəddə qeyd olunmuşdur ki, Holokost qurbanlarının xatirəsinə həsr edilmiş Beynəlxalq Anım Gününün builki mövzusu bu dəhşət və zülmlərlə üzləşmiş bütün uşaqlara həsr edilir. Müharibə nəticəsində onların çoxu yetim qalmış və ya ailələrindən uzaq düşmüşlər. Bu uşaqların çoxu aclıqdan, xəstəlikdən və ya onlara edilmiş zülmlərdən həlak olmuşlar. Xilas olanların əksəriyyəti isə öz hekayələrini danışmaq iqtidarında deyildir. Bu gün biz o insanların səslərini ucaltmalarını istəyirik.

Baş katib vurğulamışdır ki, BMT Holokostun bəşəri dərslərini bütün xalqlara çatdırmaqda davam edir. Məhz buna görə də biz hər gün və hər yerdə uşaq hüquqlarını təbliğ edir və onların ümidlərini reallaşdırmaq üçün çalışırıq. Bu gün Holokost zamanı həyatlarını itirmiş gəncləri və yaşlıları xatırlayaraq, mən bütün xalqları irqindən, rəngindən, cinsindən və ya dini etiqadından asılı olmayaraq köməyə ehtiyacı olan hər kəsi qorumağa çağırıram. Bəşəriyyətin ən gərgin məqamlarında ən çox köməyə ehtiyacı olan məhz uşaqlardır. Biz uşaqları dünyanın ən yaxşı nemətləri ilə təmin etməliyik.