İstanbul, 19 oktyabr, AZƏRTAC

Türkiyənin Bursa vilayətinin Uludağ Universitetində Azərbaycanın dövlət müstəqilliyinin bərpasının 31-ci ildönümü ilə bağlı tədbir keçirilib.

AZƏRTAC xəbər verir ki, tədbir universitetin nəzdində fəaliyyət göstərən tələbələrdən ibarət Azərbaycan Mədəniyyət və İncəsənət Birliyi ilə Bursa Azərbaycan İnnovasiya və Həmrəylik dərnəyinin üzvləri tərəfindən keçirilib.

Mərasimdə əvvəl Azərbaycan və Türkiyənin Dövlət himnləri səsləndirilib, iki qardaş ölkənin şəhidlərinin əziz xatirəsi yad edilib.

Sonra bu ali təhsil müəssisəsinin ərazisində böyük Azərbaycan bayrağı açılıb.

Uludağ Universitetində başlayan “Üniversitetinə Xoş Gəldin Bayramı” ərəfəsinə təsadüf edən tədbir universitet tələbələri tərəfindən böyük maraqla qarşılanıb.

Bayramda Azərbaycan stendi açılıb. Stenddə ölkəmizin milli-mədəni dəyərləri təbliğ olunur.