Astara, 8 noyabr, Bağır Əliyev, AZƏRTAC 

Noyabrın 8-də Astara şəhərindəki Gənclər Evinin qarşısında Dövlət Bayrağı Gününə həsr olunmuş ümumrayon tədbiri keçirilib.

AZƏRTAC xəbər verir ki, tədbirdə Astara Rayon İcra Hakimiyyətinin məsul işçisi Mərasim Hacızadə, Heydər Əliyev Mərkəzinin direktoru Kübra Səmədova, Yeni Azərbaycan Partiyası Astara rayon təşkilatının gənclər birliyinin sədri Tural Eyvazov, gənclər və idman idarəsinin rəisi Ərçə Əliyev, Astara Pedaqoji Kollecinin Tələbə Gənclər Təşkilatının sədri Elnur Əskərov Dövlət Bayrağı Günü ilə bağlı çıxış ediblər.

Çıxışlarda qeyd olunub ki, üçrəngli bayrağımız 1918-ci il noyabrın 9-da Azərbaycan Xalq Cümhuriyyəti hökumətinin iclasında qəbul edilib və 1920-ci ilin aprel ayınadək dövlət statusuna malik olub. Yetmiş ildən sonra, 1990-cı il noyabrın 17-də Naxçıvan Muxtar Respublikası Ali Məclisinin sədri, ümummilli lider Heydər Əliyevin təşəbbüsü və rəhbərliyi ilə keçirilən sessiyada Naxçıvan Muxtar Respublikasının dövlət bayrağı kimi təsdiqlənib. 1991-ci il fevralın 5-də Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək, üçrəngli bayrağımızı Dövlət bayrağı elan edib.

Diqqətə çatdırılıb ki, Astara rayonunda iki yerdə - şəhərdə və Kijəbə qəsəbəsində Dövlət bayrağı ucaldılıb. Rayonun giriş qapısı olan Çayoba kəndində dalğalanan Dövlət bayrağı isə bu məkana qədəm qoyan hər kəsi heyran edir.

Çıxışlarda Azərbaycanın ərazi bütövlüyünün tezliklə bərpa olunacağına, dövlət bayrağımızın ölkəmizin hər yerində olduğu kimi, Dağlıq Qarabağda da dalğalanacağına əminlik ifadə edilib.

Tədbir iştirakçıları Bayraq Meydanında dövlət rəmzlərini əks etdirən əl işlərindən ibarət sərgi, Gənclər Evində fəaliyyət göstərən Bayraq Muzeyində tarixi Azərbaycan bayraqları, döş nişanları, qədim pul vahidləri ilə tanış olublar.

X X X

Noyabrın 8-də Masallı şəhərində yeni salınmış Bayraq Meydanı və Azərbaycanın Dövlət Rəmzləri Muzeyinin qarşısında Dövlət Bayrağı Gününə həsr olunmuş tədbir təşkil edilib.

AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək, xatirəsini ehtiramla anıblar.

Mərasimdə Masallı Rayon İcra Hakimiyyəti başçısının müavini Aybəniz Qafarovanın Dövlət Bayrağı Günü ilə bağlı məruzəsi dinlənilib. Qeyd olunub ki, Azərbaycan Respublikasının Prezidenti İlham Əliyevin sentyabrın 3-də Masallı rayonuna səfəri çərçivəsində Bayraq Meydanının və Azərbaycanın Dövlət Rəmzləri Muzeyinin açılışından sonra bu gün burada ilk tədbir keçirilir.

Bildirilib ki, Xalq Cümhuriyyətinin süqutundan sonra Azərbaycan SSR-in bayrağı 5 dəfə dəyişdirilsə də, üçrəngli milli bayrağımız xalqımızın qəlbində hər zaman yaşayıb. Müasir Azərbaycanın qurucusu Heydər Əliyevin təşəbbüsü ilə üçrəngli, ay-ulduzlu bayrağımız yenidən ilk dəfə 1990-cı ildə Naxçıvanda dalğalandırılıb, 1991-ci ildə isə Azərbaycan Ali Soveti tərəfindən dövlətin əsas atributu kimi qəbul edilib.

Çıxış edən Binə Xocavar kənd orta məktəbinin müəllimi Ülvi Rufullayev, Qadın Resurs Mərkəzinin üzvü Nərmin Dəyyanova ümummilli lider Heydər Əliyevin təməlini qoyduğu dövlətçilik ənənələrinin Prezident İlham Əliyev tərəfindən uğurla davam etdirildiyini diqqətə çatdırıblar.

Tədbirin bədii hissəsində Masallı Rayon Mədəniyyət Mərkəzinin, "Halay" folklor xalq kollektivinin, Heydər Əliyev Mərkəzinin rəqs qrupunun üzvləri, uşaq-incəsənət məktəbinin müəllim və şagirdləri maraqlı konsert proqramı ilə çıxış ediblər.

X X X

Noyabrın 8-də Lənkəran şəhərindəki Heydər Əliyev Mərkəzində Azərbaycan Dövlət Bayrağı Gününə həsr edilmiş “Bayrağımız qürur mənbəyimizdir” mövzusunda tədbir keçirilib.

AZƏRTAC xəbər verir ki, tədbirdə çıxış edən Mərkəzin direktoru Reyhanə Sadıxova rayon sakinlərini əlamətdar gün münasibətilə təbrik edərək, Dövlət bayrağımızın yaranma tarixindən danışıb.

Tədbirdə Azərbaycan bayrağının müasir dövlətçiliyimizdə oynadığı rolu əks etdirən videoçarx nümayiş etdirilib.

Lənkəran şəhər Təhsil Şöbəsinin müdir müavini Güloğlan Bağırov üçrəngli bayrağımızın Azərbaycan dövlətçiliyi tarixində oynadığı roldan söz açıb.

Sonra çıxış edənlər gənclərin hərbi-vətənpərvərlik tərbiyəsində milli atributlarımızın, dövlət rəmzlərimizin təbliğinin önəmindən danışıblar.

X X X

Noyabrın 8-də Lerik Rayon İcra Hakimiyyəti və rayon gənclər və idman idarəsinin birgə təşkilatçılığı ilə Dövlət Bayrağı Gününə həsr olunmuş veloyürüş təşkil olunub.

AZƏRTAC xəbər verir ki, 50-yə yaxın rayon sakininin qatıldığı yürüşə şəhər 1 nömrəli texniki fənlər təmayüllü liseyin qarşısından start verilib. Veloyürüş Heydər Əliyev Meydanında şəhər sakinlərinin sürəkli alqışları ilə başa çatıb.

Tədbir iştirakçıları ümummilli lider Heydər Əliyevin abidəsini ziyarət edib, abidənin önündə Azərbaycanın Dövlət himnini sakinlərlə birgə səsləndiriblər.

Sonra veloyürüş iştirakçıları Lerik rayon Mədəniyyət Mərkəzində Dövlət Bayrağı Gününə həsr edilmiş məktəblilərin əl işlərindən ibarət sərgi ilə tanış olublar.

Yürüş iştirakçılarına rayon gənclər və idman idarəsinin fəxri fərmanları verilib.