SİYASƏT
DAĞISTAN NÜMAYƏNDƏ HEYƏTİ XAÇMAZDA OLMUŞDUR
Xaçmaz, 11 may (AZƏRTAC).Rusiya Federasiyası Dağıstan Respublikasının nümayəndə heyəti ümummilli lider Heydər Əliyevin anadan olmasının 86-cı ildönümü ilə əlaqədar Xaçmaz şəhərinə səfər edərək şəhərdə aparılan abadlıq, quruculuq işləri ilə tanış olmuş, pivə zavodunun açılışında iştirak etmişdir.
Qonaqlar əvvəlcə ümummilli lider Heydər Əliyevin adını daşıyan parkda ulu öndərin abidəsinin önünə gül dəstəsi düzmüş, xatirəsinə ehtiramlarını bildirmişlər.
Nümayəndə heyəti ulu öndərin adını daşıyan parkda quraşdırılan musiqili fəvvarənin açılış mərasimində iştirak etmişlər. Fəvvarənin ətrafına Türkiyə və İspaniya istehsalı olan mərmər və mozaik plitələr döşənmişdir. Bu yaraşıqlı qurğunun konstruksiyaları İtaliya, İspaniya və Yaponiyadan gətirilmişdir.
Daha sonra Qafqazda bənzəri olmayan saat qülləsinin açılışında iştirak edən nümayəndə heyətinə məlumat verilmişdir ki, Xaçmazın turizm potensialı nəzərə alınaraq quraşdırılan bu saat qülləsi şəhərə gələn qonaqların rahatlığını təmin etmək məqsədi daşıyır. Hündürlüyü 16 metr olan bu qüllədə Bakı, Ankara, Moskva və London vaxtını göstərən saatlar quraşdırılmışdır. Qüllədə Azərbaycanın xəritəsi əks olunmuşdur. Musiqili fəvvarə və saat qülləsi şəhərin gözəlliyini daha da artırmışdır.
Nümayəndə heyəti Azərbaycanın və Dağıstanın görkəmli dövlət xadimi Əziz Əliyevin abidəsini də ziyarət etmişdir.
Daha sonra qonaqlar Xaçmazdakı Şəxsiyyətlər Muzeyi ilə tanış olmuş, Milli Qəhrəman Yavər Şahbazovun abidəsini ziyarət etmiş, xatirəsinə ehtiramlarını bildirmişlər.
Sonra tanınmış dövlət və ictimai-siyasi xadim Səid Qurbanovun adını daşıyan küçənin açılışı olmuşdur. Tədbirdə Xaçmaz rayon İcra hakimiyyətinin başçısı Şəmsəddin Xanbabayev ümummilli lider Heydər Əliyevin ölkəmizə rəhbərlik etdiyi illərdə iki respublika arasında bütün sahələrdə əlaqələrin genişləndiyini və bu əlaqələrin hazırda Prezident İlham Əliyevin rəhbərliyi ilə daha da inkişaf etdirildiyini vurğulamışdır.
Daha sonra “Səid Qurbanov küçəsi” sözləri yazılmış lövhənin üzərindən ağ örtük götürülmüşdür.
Rusiyanın Azərbaycandakı səfiri Vladimir Doroxin çoxəsrlik tarixi olan Rusiya-Azərbaycan münasibətlərinin bu gün uğurla inkişaf etdiyini bildirmişdir. Səfir demişdir ki, Azərbaycanda diplomatik fəaliyyətim müddətində birinci dəfədir ki, bu cür tədbirdə iştirak edirəm. Bu gün gördüm ki, Azərbaycan ilə Dağıstan Respublikası arasında münasibətlər inkişaf edir və bu temp bundan sonra da yüksələcəkdir.
Dağıstan Respublikası Xalq Məclisi sədrinin birinci müavini
Nikolay Alçiev bildirmişdir ki, əsası ümummilli lider Heydər Əliyev tərəfindən qoyulan münasibətlər uğurla davam etdirilir. Bizim münasibətlərimiz çoxəsrlik tarixi köklərə əsaslanır və bu tədbirlər də bunun bariz nümunəsidir.
Dərbənd Administrasiyasının rəhbəri Qurban Qurbanov demişdir ki, biz qardaşlaşmış şəhərlərik və bizim bu səfərimiz ənənəvi səfərlərdən biridir. Biz burada aparılan tikinti-yenidənqurma işləri ilə tanış olduq və bu, Azərbaycanın iqtisadi gücünün artdığını göstərir.
Qonaqlar tikintisinə 2008-ci ildən başlanmış Xaçmaz pivə
zavodunun açılışında da iştirak etmişlər. Almaniya istehsalı olan texnoloji qurğuların quraşdırıldığı zavod gündə 3 tona yaxın pivə istehsal edəcəkdir.
Qonaqlar istehsal prosesi ilə tanış olmuşlar. Bildirilmişdir ki,
zavodda istehsal olunan pivənin arpası, əsasən Almaniya və Çexiyadan gətirilir. Bütün bu işlər regionların sosial-iqtisadi ikişafı Dövlət proqramı çərçivəsində görülmüşdür.