Ekvadorda həbsxanada baş verən iğtişaş nəticəsində altı məhbus ölüb
Bakı, 31 may, AZƏRTAC
Ekvadorun qərbində yerləşən Quayakil şəhərindəki həbsxanada baş verən iğtişaş nəticəsində azı altı məhbus ölüb, bir nəfər isə yaralanıb.
AZƏRTAC “Telegrafo” nəşrinə istinadla xəbər verir ki, bu barədə məlumat yerli polisin “Twitter” səhifəsində yerləşdirilib. İnsident zamanı həbsxana binasında qohumlarının ziyarətinə gələn yüzlərlə insan olub.
Penitensiar müəssisənin direktoru Alfredo Munosun sözlərinə görə, dustaqlardan birinin cəsədi yanmış şəkildə aşkarlanıb, digər dustaqlar isə odlu silahlardan açılan atəşlə öldürülüb.
Həbsxanada iğtişaş baş verdiyi barədə xəbərlərdən sonra dustaqların qohumları penitensiar müəssisənin qarşısına toplaşmağa başlayıb. Onlar izahat tələb edib, həmçinin polisi, təcili tibbi yardım maşınlarını və patrul avtomobillərini daşa basıb.
Güc strukturlarının həbsxanada vəziyyəti nəzarət altına aldığı bildirilir. Baş prokurorluq insidentlə bağlı təhqiqata başlayıb və dörd nəfərin saxlanıldığını təsdiqləyib.
Bölmənin digər xəbərləri
