Bakı, 21 dekabr, Əziz Məmmədov, AZƏRTAC

Dekabrın 21-də Səhiyyə Nazirliyinin Elmi-Tədqiqat Travmatologiya və Ortopediya İnstitutunda cari ilin yekunlarına həsr edilmiş hesabat mətbuat konfransı keçirilib.

AZƏRTAC xəbər verir ki, tədbiri giriş sözü ilə institutun direktoru Səhiyyə Nazirliyinin baş travmatoloqu, tibb elmləri doktoru, professor Vaqif Verdiyev açıb. O qeyd edib ki, Prezident İlham Əliyevin rəhbərliyi altında ölkəmizdə ən müasir tələblərə cavab verən səhiyyə infrastrukturunun yaradılması, yeni xəstəxanalar tikintisi, mövcud tibb müəssisələrinin yenidən qurulması prosesləri geniş vüsət alıb. Əhaliyə təqdim edilən tibbi xidmətlərin keyfiyyətinin yaxşılaşdırılması üçün səhiyyənin ayrı-ayrı sahələrində dövlət proqramları xüsusi rol oynayır. Bundan əlavə, son illərdə tibbi kadrların, o cümlədən travmatologiya və ortopediya sahəsində mütəxəssislərin hazırlanması işində ciddi uğurlar qazanılıb.

Vaqif Verdiyev xatırladıb ki, bu il ETTOİ-nin yaradılmasının 70 illiyi qeyd olunub. Baş travmotoloq deyib: “1946-cı ildə SSRİ-nin bəzi şəhərlərində ortopediya və bərpa cərrahiyyəsi institutları yaradılmasının məqsədi Böyük Vətən müharibəsi əlillərinə ixtisaslı travmatoloji və ortopedik yardım göstərməkdən ibarət idi. 1951-1959-cu illərdə institutun direktoru görkəmli ictimai və siyasi xadim, professor Əziz Əliyev olub. Böyük Vətən müharibəsi iştirakçılarının istər Bakıda, istərsə də regionlarda köməyə ehtiyacı olduğu həmin illərdə professor Əziz Əliyev müharibə əlillərinin müalicəsi və reabilitasiyası məsələləri üzrə səyyar elmi konfranslar keçirirdi. İnstitutda odlu silah yaralarının müalicəsi və bu müalicənin nəticələri məsələlərinə həsr edilmiş elmi-tədqiqat işi aparılması planlaşdırılırdı. 1952-ci ildə Zaqafqaziya və Şimali Qafqaz respublikalarının elmi-praktiki konfransının təşkil edilməsində Ə.Əliyevin böyük xidməti olub”.

Vurğulandı ki, ETTOİ Azərbaycanda ortopediya və travmatologiyanın inkişafı istiqamətində çox böyük iş aparıb, bütövlükdə dünya elminə sanballı töhfələr verib. V.Verdiyev daha sonra deyib: “İnstitutda SSRİ-də birincilər sırasında sümük patologiyası şöbəsi, toxumaların konservasiyası laboratoriyası, eksperimental laboratoriya, neyrofiziologiya laboratoriyası və digər bölmələr açılıb. ETTOİ-də sümüklərin ostesintezinin yeni metodları tətbiq edilib, dayaq-hərəkət sisteminin anadangəlmə və qazanılmış deformasiyaları müalicə edilib, poliomielit, onurğa sütununun, aşağı və yuxarı ətrafların deformasiyaları ilə bağlı tədqiqatlar aparılıb. Bu il institutda təqribən 9000 xəstəyə yardım göstərilib. 7000-dən çox xəstə ambulator rejimdə, 1900 nəfər stasionar rejimdə müalicə alıb. Cari ildə institutda təxminən 1500 əməliyyat aparılıb. İnstitutun klinikasında 200 çarpayı, 7 əməliyyat otağı var. Bundan əlavə, 2009-cu ildən institutda endroprotezləmə əməliyyatları aparılır. İndiyə qədər 100-ə yaxın xəstə üzərində dövlət hesabına bu cür əməliyyatlar aparılıb. İnstitutda 417 əməkdaş, o cümlədən 51-i elmi işçi, 1 Əməkdar Elm Xadimi, 1 Əməkdar Həkim, 3 professor, 7 elmlər doktoru, 16 nəfər tibb üzrə fəlsəfə doktoru çalışır”.

Tədbirdə ETTOİ-nin şöbə müdirləri Elşən Məhərrəmov, Yaşar Cəlilov, Qələndər Canbaxışov, Fikrət Qafarov və digərləri çıxış ediblər. Onlar bildiriblər ki, institutda yeni texnologiyalardan geniş istifadə edilir. Məsələn ətrafların sınıqları zamanı bloklayıcı ştiftlər, plastinlər, diz oynağı üçün fiksəedici bandajların müxtəlif növləri, biləyin boru şəkilli sümüklərinin rezeksiyadan sonrakı defektlərində biokompozit materiallar tətbiq olunur. Bundan əlavə, ETTOİ Azərbaycanda bu sahədə baş elmi-tədqiqat müəssisəsi olmaqla həm Bakıda, həm də regionlarda praktiki yardım göstərir. Burada aşağı və yuxarı ətraflarda, onurğa və çanaq sümüklərində mürəkkəb əməliyyatlar aparılır.

ETTOİ mütəxəssisləri vurğulayıblar ki, hazırda yol-nəqliyyat hadisələrində zərər çəkmiş şəxslərin müalicəsi sahəsində daha mürəkkəb vəziyyət yaranıb. Yol qəzaları nəticəsində kəllə-beyin travmaları, döş qəfəsinin ciddi zədələnməsi halları müşahidə olunur. Çoxseqmentli sınıqlarla bağlı müraciətlərin sayı artıb. Məsələn ETTOİ-yə anadangəlmə zədəli pasiyentlərlə yanaşı, alətlərlə düzgün rəftar etməmək nəticəsində əllərini zədələmiş insanlar da daxil olur. Bundan əlavə, instituta müraciət edən bəzi pasiyentlərin ağır formalı skoliozdan əziyyət çəkmələri müşahidə olunur. Məlum olduğu kimi, 18 yaşdan yuxarı insanlarda skoliozun aradan qaldırılması çox çətin, hətta təhlükəlidir.

Qeyd olundu ki, bəzən qeyri-peşəkar cərrahi müdaxilə halları ilə üzləşirlər. Belə müdaxilələr sonradan bir sıra ağır fəsadlara gətirib çıxara bilər. Bununla əlaqədar, xəstələr müvafiq profil üzrə ixtisaslaşmış həkimlərə müraciət etməlidirlər. Təəssüflə qeyd edildi ki, ETTOİ-yə müraciətlərin bir qismi valideynlərin ehtiyatsızlığı üzündən uşaqların əllərinin ətçəkən maşına düşməsi ilə bağlıdır. Belə hallarda pasiyentlərin əllərini bərpa etmək çox mürəkkəb olur.

Tədbirin sonunda jurnalistlərin suallarına cavab verilib.