Bakı, 5 fevral (AZƏRTAC). Futbol üzrə 19 yaşadək qızlardan ibarət Azərbaycan yığmasının baş məşqçi vəzifəsinə namizədlərdən biri kimi Patrisia Qonzaleslə aparılan danışıqlar müsbət nəticələnmişdir.

AFFA-dan AZƏRTAC-a bildirmişlər ki, yığmanın baş məşqçi vəzifəsi Patrisia Qonzalesə həvalə olunmuşdur. Hazırda ölkəmizdə olan məşqçi artıq vəzifəsinin icrasına başlamışdır.

Qeyd edək ki, P.Qonzales UEFA-nın B, A və PRo məşqçi lisenziyasına malikdir. Madrid şəhərindəki Camilo Jose Cela Universitetini fiziki hazırlıq və idman elmi ixtisası üzrə bitirmişdir. “Rayo Valekano” klubunun qadınlardan ibarət B komandasının baş məşqçisi, habelə adıçəkilən klubun qadınlardan ibarət bütün yaş qrupları üzrə komandalarının əlaqələndiricisi vəzifəsində çalışmışdır.