CƏMİYYƏT
ABAD-çı rəssam: Artıq ölkə daxilində deyil, həm də xaricdən sifarişlər alıram MÜSAHİBƏ
![](/files/galleryphoto/2024/2/1200x630/17168179931721836717_1200x630.jpg)
![](/files/galleryphoto/2024/2/1200x630/17168179931496827761_1200x630.jpg)
![](/files/galleryphoto/2024/2/1200x630/17168179933070964866_1200x630.jpg)
![](/files/galleryphoto/2024/2/1200x630/17168179933540644508_1200x630.jpg)
![](/files/galleryphoto/2024/2/1200x630/17168179933595238015_1200x630.jpg)
![](/files/galleryphoto/2024/2/1200x630/17168179936102165066_1200x630.jpg)
![](/files/galleryphoto/2024/2/1200x630/17168179933847445751_1200x630.jpg)
![](/files/galleryphoto/2024/2/1200x630/17168179934710526241_1200x630.jpg)
Bakı, 27 may, Leyla Muradzadə, AZƏRTAC
Bədii keramika qədim zamanlarda yaranan və bu günədək insanların marağını cəlb edən bir tətbiqi sənət növüdür. Hər bir rəssamın əsərində özündən bir parça əks olunur. Belə ki, məhz bu insanlar həyatımızı gözəlləşdirən və ilham mənbəyinə çevrilən unikal əsərlərin yaradıcılarıdır. Keramikadan məhsulların hazırlanması prosesi çoxmərhələli və diqqət tələb edən bir işdir. Gilin hazırlanması, qəlibləmə, qurutma, bişirmə prosesi və yekunda naxışların əsərin üzərinə vurulması. Bütün bu heç də asan olmayan proseslər tamamlandıqdan sonra gözəl bir sənət əsəri ərsəyə gəlir.
Uşaq yaşlarından rəsm çəkməyə həvəsi olan, lakin ilk təhsilini Jurnalistika fakültəsində alan, daha sonra isə Azərbaycan Dövlət Rəssamlıq Akademiyasının Dizayn fakültəsində davam etdirən Lalə Həziyeva AZƏRTAC-a müsahibəsində onun incəsənətə gətirən yoldan bəhs edib.
Yeniyetməlik dövründə müxtəlif geyim eskizləri çəkən Lalə xanım həmişə özünü məhz bu sahədə görüb. Jurnalistika fakültəsini bitirdikdən sonra o, bir müddət bu sahədə çalışmağa başlayıb. Lakin incəsənətə son dərəcə bağlı bir insan olaraq Lalə xanımın seçimi məhz rəssamlıq olur.
“Rəssamlıq Akademiyasını bitirdikdən sonra öz biznesimi qurdum. Artıq üç ildir ki, bədii keramika sənəti ilə məşğul oluram. Ondan öncə tablo üzərində rəsmlər yaradırdım. İndi isə fincan, boşqab, güldan, lampa üzərində rəsmlər, portret tabloları çəkirəm”, - deyə rəssam bildirib. Məhsulların üzərində, həmçinin tanınmış brendlərin loqotiplərini də görmək olar.
Bir məhsulun bir həftəyə, on günə və ya daha uzun müddətə başa gəldiyini deyən Lalə xanım bunun hazırlanma və bişmə prosesindən asılı olduğunu qeyd edib: “Bir məhsul sobada dörd gün 1050 dərəcədə bişir. Daha sonra naxış çəkilir və məhsulun üzərinə qlazur vurulur”. Rəssam naxışları gildən hazırladığı məhsulun və yaxud hazır qabların üzərinə çəkir. O, ən çox tələbatın üzərində bürc olan fincanlar olduğunu vurğulayıb. Bədii keramika ustası əl işlərini onlayn formada satışa çıxarır.
“Kətan üzərində yağlı boya olan əsərlərimin hazırlanması bir aydan çox vaxt aparır. Məsələn, bir portret üzərində çalışırdım. Onun ərsəyə gətirilməsı bir müddət vaxt aldı. Bir az çəkirdim, sonra ara verirdim. Sonra yenidən iş prosesinə qayıdırdım. Çəkdiyim portretlərin arasında tanınmış simalar da var. Yaddaqalan əsərimdən biri Heydər Əliyevin 100 illiyinə həsr olunmuş portret oldu”, - deyə gənc rəssam diqqətə çatdırıb.
Həmsöhbətimiz ABAD-la (Ailə Biznesinə Asan Dəstək) əməkdaşlığından söz açıb: “Üç il əvvəl onlara müraciət etdim və lazımi prosedurlardan keçdikdən sonra ABAD-çı kimi fəaliyyətə başladım. ABAD mənim inkişafıma bir növ təkan verdi, mən öz işimdə daha da peşəkarlaşdım. Artıq mən sadəcə ölkə daxilində deyil, həm də xaricdən sifarişlər alıram. Məhsullarımın Moskvada da satışı reallaşdırılır”.
Ümummilli Lider Heydər Əliyevin anadan olmasının 98-ci ildönümünə həsr olunmuş rəsm sərgisində iştirakına görə sertifikata, “Türkiye Exclusive Ödülleri 2022” Azərbaycan layihəsində iştirak və öz sahəsində göstərdiyi peşəkar və uğurlu fəaliyyətinə görə Azərbaycan Respublikası Mədəniyyət Nazirliyi tərəfindən fəxri fərmana layiq görülən Lalə xanımın tələbələri də var. Bədii keramika ustası onlara həm rəssamlıqdan, həm də keramikadan dərs deyir.
Gələcək planlarından danışan Lalə xanım qeyd edib ki, o, qalereyasını yaratmaq və bununla yanaşı, əl işlərinin dünyada tanınmasını görmək arzusundadır.