Göygöl rayonunda Olimpiya İdman Kompleksinin təməli qoyulmuşdur
Göygöl, 24 yanvar (AZƏRTAC). Göygöl rayonunda Olimpiya İdman Kompleksinin təməlqoyma mərasimi keçirilmişdir.
AZƏRTAC xəbər verir ki, gənclər və idman naziri Azad Rəhimovun da iştirak etdiyi təməlqoyma mərasimində son illər ölkədə idmanın və onun maddi-texniki bazasının sürətli inkişafından ətraflı söhbət açılmışdır. Bildirilmişdir ki, Göygöl Olimpiya İdman Kompleksi respublikamızda inşa edilən sayca 39-cudur. Hazırda ölkənin 11 rayonunda belə komplekslərin inşası uğurla davam etdirilir.
Mərasimdə Azərbaycan Prezidenti İlham Əliyevin idmanın inkişafına göstərdiyi diqqət və qayğı yüksək dəyərləndirilmişdir. Qeyd edilmişdir ki, 2005-ci ildə idmançılarımız beynəlxalq səviyyəli yarışlarda 130 medal qazandıqları halda, məhz dövlət başçısının diqqət və qayğısı sayəsində 2010-cu ilin yekunlarına görə bu rəqəm 675-ə yüksəlmişdir.
Sonra rayon ictimaiyyəti nümayəndələrinin iştirakı ilə ən müasir tələblər səviyyəsində inşa ediləcək üzgüçülük hovuzu, güləş zalı, 2 min nəfər tamaşaçı tutumu olan stadion, voleybol, mini futbol meydançaları, eləcə də 50 nəfərlik mehmanxana və kottecləri özündə birləşdirəcək Göygöl Olimpiya İdman Kompleksinin təməli qoyulmuşdur.
Bölmənin digər xəbərləri
