Naxçıvan, 7 may, Rauf Kəngərli, AZƏRTAC

Naxçıvan Dövlət Universiteti ilə Türk Ağsaqqalları Birliyi birlikdə “Ulu öndər Heydər Əliyev və Türk dünyası” adlı konfrans keçirdi. Düşünürəm ki, məhz Naxçıvanda belə bir konfransın təşkil olunmasının xüsusi əhəmiyyəti var. Ona görə ki, hazırda regionumuzda yaranan yeni geostrateji reallıqlar, əldə etdiyimiz tarixi Zəfər kontekstində Naxçıvanın 100 il bundan əvvəlki geostrateji əhəmiyyəti, coğrafi mövqeyi, Türk dünyasının bütövlüyü yenidən özünə qaytarılıb.

Bu sözləri AZƏRTAC-ın Naxçıvan bürosuna müsahibəsində Yeni Azərbaycan Partiyası İdarə Heyətinin üzvü, Milli Məclisin deputatı, professor Hikmət Babaoğlu deyib.

Hikmət Babaoğlu qeyd edib ki, bundan sonra regionumuzda inşa ediləcək mümkün sülh prosesində Naxçıvanın coğrafiyası xüsusi əhəmiyyət kəsb edəcək. Dövlət başçımızın da qeyd etdiyi kimi, Zəngəzur dəhlizi artıq reallığa çevrilməkdədir və sevindirici haldır ki, münaqişə dövründə - ötən 30 il müddətində, əslində, Naxçıvan bu gələcəyə hazırlaşıb, burada böyük və yeni infrastruktur yaradılıb. Bu gün dəmir yolu dəhlizinin xətti işlək vəziyyətdədir. Çox sevindiricidir ki, Naxçıvan özünün inkişafı, turizm obyektləri, geniş prospektləri, yaraşıqlı binaları ilə Türk dünyasının gələcəyinə hazırdır. Amma biz bütün bu zəfərlərimizi qeyd edərkən bir həqiqətlə üz-üzə gəlirik. Bu həqiqət ondan ibarətdir ki, regionda yaranmış hazırkı reallıqların təməli, Naxçıvanın coğrafi mövqeyinin möhkəmləndirilməsinin əsası böyük dövlət xadimi, ulu öndər Heydər Əliyev tərəfindən qoyulub və muxtar respublika rəhbəri tərəfindən uğurla, qətiyyətlə davam etdirilir. Bu gün Ulu Öndərin Naxçıvanla bağlı arzularının çin olduğu tarixdir.

“Ulu öndər Heydər Əliyev və Türk dünyası” adlı konfransın əhəmiyyətini vurğulayan Hikmət Babaoğlu bildirib ki, konfransda bir-birindən maraqlı, çoxsaylı məruzələr dinlənildi. Bunlar “Ulu öndər Heydər Əliyev və Türk dünyası” mövzusunun müxtəlif – ideoloji, iqtisadi, siyasi, regional aspektlərini əhatə edirdi. Düşünürəm ki, konfransda səslənən elmi məruzələr, bundan sonrakı mərhələdə də konfrans materialı kimi Naxçıvan Dövlət Universitetində tələbələr üçün maraqlı mənbə olacaq, onların yaxın siyasi keçmişimizin tarixi ilə bağlı istifadə və xeyli sayda məlumat əldə edəcəkləri bir qaynaq rolunu oynayacaq.

“Naxçıvan Dövlət Universiteti ərazisinə, binalarına və kampus tipli olmasına görə Azərbaycanın digər ali təhsil ocaqlarından fərqlənir. Universitetdə yaradılan elmi mühit və təşkilatçılıq olduqca yüksək səviyyədədir”, - deyən Milli Məclisin deputatı vurğulayıb ki, bu elmi mühit, bu tədris mühiti təqdir olunmalıdır. Naxçıvan Dövlət Universitetinin beynəlxalq əlaqələrini ayrıca qeyd etmək lazımdır. Qonşu Türkiyənin universitetləri, ölkə universitetləri, eləcə də dünyanın aparıcı universitetləri ilə təcrübə mübadiləsi, kitabxanalarla əlaqələr tələbələr üçün yeni imkanlar yaradır. Elmin sərhədi yoxdur, yetər ki, təşəbbüskarlıq olsun. Naxçıvan Dövlət Universiteti də bu istiqamətdə çox böyük strateji addımlar ata bilib. Şübhəsiz ki, bu faktor önümüzdəki mərhələdə universitetdə kadrların elmi, siyasi, ideoloji hazırlığı kontekstində də öz rolunu oynayacaq.