İran və Rusiya prezidentləri Suriya problemini müzakirə ediblər
Tehran, 16 aprel, AZƏRTAC
ABŞ, Fransa və Böyük Britaniyanın müxtəlif bəhanələrlə Suriyanı bombardman etməsi onu deməyə əsas verir ki, bu dövlətlər bölgədə sabitliyin bərpa olmasını istəmirlər.
Bu sözləri İran Prezidenti Həsən Ruhani rusiyalı həmkarı Vladimir Putin ilə telefon söhbətində deyib.
İran Prezidentinin rəsmi saytında yayılmış məlumatına görə, prezidentlər arasındakı telefon söhbətində Suriyanın bombalanması əsas müzakirə mövzusu olub.
Vladimir Putin bildirib ki, suveren dövlətin bombalanması beynəlxalq hüquqda özbaşınalığın yaranmasına səbəb olacaq. Onun sözlərinə görə, belə düşünülməmiş addımların atılması davam etsə, beynəlxalq hüquq normaları qəbul edilməyəcək və dünyada xaos başlanacaq.
Söhbət zamanı prezidentlər bundan sonra da Suriyanı dəstəkləyəcəklərini bildiriblər.
Xatırladaq ki, aprelin 15-də ABŞ, Fransa və Böyük Britaniyanın hərbi aviasiyası Suriyanın hərbi obyektlərini bombardman edib. Rəsmi Vaşinqton bu bombardmanın Suriya hakimiyyətinin kimyəvi silah işlətməsinə cavab olduğunu bəyan edib.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
