İSTANBULDA “CASPİAN TELECOMS-2008” KONFRANSI VƏ SƏRGİSİ KEÇİRİLİR
AZƏRTAC-ın xüsusi müxbiri xəbər verir ki, aprelin 17-də İstanbuldakı “Hilton” hotelində Xəzər, Qara dəniz və Mərkəzi Asiya bölgələri ölkələrinin iştirakı ilə “Caspian Telecoms-2008” 7-ci Beynəlxalq konfrans və sərgisi öz işinə başlamışdır.
Konfransda 20 ölkədən 400 şirkət, habelə rabitə və telekommunikasiyalar üzrə hökumət nümayəndələri iştirak edirlər.
Tədbirdə Azərbaycanı Rabitə və İnformasiya Texnologiyaları Nazirliyinin nümayəndə heyəti və “Azercell Telecom” MMC-nin rəhbərliyi təmsil edir.
Konfransda müxtəlif ölkələrdən gəlmiş telekommunikasiya şirkətlərinin təmsilçiləri, o cümlədən ötən il Bakıda keçirilmiş “Caspian Telecoms-2007” Beynəlxalq konfrans və sərgisinin təşkilatçısı “Fintur Holdings” şirkətinin başçıları, “Azercell Telecom” MMC-nin prezidenti Halim Ateş və digərləri məruzə ilə çıxış etmişlər. Azərbaycanın son illər informasiya-kommunikasiya texnologiyaları sahəsində qazandığı uğurlar və ölkəmizdəki sərmayə imkanlarından da ətraflı bəhs olunmuşdur.
Mərkəzi qərargahı Londonda yerləşən Beynəlxalq Ticarət Sərgisinin (İTE) və Türkiyə Telekommunikasiya Şurasının təşkil etdikləri tədbir aprelin 18-də işini davam etdirəcəkdir.
Bölmənin digər xəbərləri
