İQTİSADİYYAT
KEYFİYYƏT SİSTEMİNƏ DÖVLƏT NƏZARƏTİ UĞURLA HƏYATA KEÇİRLİR
Bakı, 12 fevral (AZƏRTAC). Keyfiyyət sisteminə dövlət nəzarəti uğurla həyata keçirilir.
Standartlaşdırma, Metrologiya və Patent üzrə Dövlət Komitəsinin (SMPDK) sədri Ramiz Həsənov bu barədə fevralın 12-də Yeni Azərbaycan Partiyasının (YAP) mərkəzi qərargahında keçirdiyi mətbuat konfransında məlumat vermişdir.
2009-cu ildə görülmüş işlərdən danışan R.Həsənov bildirmişdir ki, keyfiyyət sisteminə dövlət nəzarətinin həyata keçirilməsi komitənin qarşısında duran əsas məsələdir. Bu sahədə işlərin Avropa Birliyinin tələblərinə uyğunlaşdırılması istiqamətində mühüm addımlar atılmışdır. Komitənin fəaliyyəti ilə bağlı yaxın vaxtlarda bir sıra qanunların qəbul edilməsi gözlənilir. Avropa Birliyi ilə birgə “Twinning”, Almaniya Texniki Əməkdaşlıq Cəmiyyəti (GTZ) ilə mütəxəssislərin hazırlanmasına dair layihələr icra edilir. GTZ ilə birgə təşkil edilən iki həftəlik treninqlərin yekununda imtahandan uğurla çıxan iştirakçılara beynəlxalq səviyyəli keyfiyyət meneceri statusu veriləcəkdir. Bundan əlavə, ötən il komitə Avropa Standartlaşdırma Komitəsində (CEN) müşahidəçi statusu almışdır. Cari ildə isə CEN-in tamhüquqlu üzvü olmaq istiqamətində işlər görüləcəkdir.
Hesabat dövründə Azərbaycanda 70-ə yaxın milli standart qəbul olunmuşdur. Yaxın gələcəkdə pirotexnikaya dair hazırlanmış milli standartların qəbul olunacağı gözlənilir. Bundan başqa, qaz qurğularına dair milli standartlar da hazırlanır. Həmçinin metrologiya sahəsində Azərbaycanda 5 laboratoriya qurulmuşdur.
Komitə sədri demişdir ki, Azərbaycan Prezidenti İlham Əliyevin təşəbbüsü ilə 2009-cu il ölkəmizdə “Ekologiya ili” elan olunmuşdur. Bununla əlaqədar yanacağa tələblərin Avropa standartlarına uyğunlaşdırılması, o cümlədən avtomobildən atmosferə buraxılan zəhərli maddələrin qarşısının alınması məqsədi ilə tədbirlər həyata keçirilir.
İyulun 1-dən Azərbaycanda “Avro-2” standartı qüvvəyə minəcəkdir. Bu standart ölkəmizdə istehsal olunan yanacağa və avtomobillərə tətbiq ediləcəkdir. Eyni zamanda, Avropa standartlarına cavab verməyən, yanacaq sistemində problemlər olan köhnə avtomobillərin ölkəyə idxalının qarşısı alınacaq, belə avtomobillərin Azərbaycanda istifadəsi qadağan ediləcəkdir. Bu barədə Nazirlər Kabinetinin yaxın vaxtlarda qəbul edəcəyi qərarda dəqiq məlumatlar öz əksini tapacaqdır.
Apreldə Azərbaycanda Milli Etalon Mərkəzi istifadəyə veriləcəkdir.
Avropa Birliyi “Twinning” layihəsi çərçivəsində Azərbaycana 1 milyon avro dəyərində texniki yardım etmişdir. Mərkəzin açılışı Avropa Birliyinin göndərdiyi etalonlar quraşdırıldıqdan sonra - aprelin 15-də olacaqdır. Mərkəzdə çəki, təzyiq, sıxlıq, elektrik kəmiyyətləri və s. etalonlar olacaqdır.
2009-cu ildə ölkəmizdə 100-ə yaxın müəssisədə normalara uyğun olmayan, insan sağlamlığı üçün təhlükəli məhsulların istehsalı dayandırılmışdır. Ümumi dəyəri 390 min manata yaxın olan 340 məhsul partiyasının satışı qadağan olunmuşdur. Müəssisələrə 277 iradnamə, 433 tələbnamə verilmişdir. Ciddi nöqsanlara yol verən təsərrüfat subyektləri barədə qanunvericilikdə nəzərdə tutulmuş qaydada 188 protokol tərtib olunmuş və ümumi həcmi 76 min 475 manat məbləğində cərimə tətbiq edilmişdir.
R.Həsənov jurnalistlərin suallarını cavablandırmışdır.
######