Bakı, 6 avqust (AZƏRTAC). “Bakcell” şirkəti və Azərbaycan Futbol Federasiyaları Assosiasiyasının (AFFA) birgə təşkilatçılığı ilə “Bakcell Arena”da təşkil olunan “Mançester Yunayted” yay futbol məktəbinin iştirakçılarından biri - Nigar Mirzəliyeva Mançesterə yola düşmüşdür.

Şirkətdən AZƏRTAC-a bildirmişlər ki, N. Mirzəliyeva Mançester şəhərindəki “Denston” kollecində “Mançester Yunayted” yay futbol məktəbində keçiriləcək toplanışda iştirak edəcəkdir.

Cari il iyunun 11-də AFFA və “Bakcell” Azərbaycanda uşaq futbolunun inkişafı və bu idman növünün kütləviliyinin artırılması məqsədi ilə yeni layihəni reallaşdırmağa başlamışlar. Birgə layihə çərçivəsində “Mançester Yunayted” yay futbol məktəbinin “Bakcell Arena”da təşkil olunacaq təlim-məşq toplanışında iştirak etmək üçün Gəncə, Mingəçevir, Lənkəran, Sumqayıt və Bakı şəhərlərində seçim turları təşkil edilmişdir. Bu seleksiya turlarında 32 ən istedadlı uşaq seçilərək Bakıda - “Bakcell Arena”da “Mançester Yunayted” futbol məktəbinin məşqçiləri tərəfindən keçirilən toplanışa cəlb olunmuşlar. İyunun 24-dən 28-dək “Bakcell Arena”da təşkil olunmuş məşqlərdə iştirak edən uşaqların arasından 6 nəfər seçilmiş və onlar İngiltərənin Mançester şəhərinə yollanaraq “Mançester Yunayted” futbol məktəbində hazırlıq keçmək şansı əldə etmişlər.