Bakı, 8 avqust (AZƏRTAC). Avqustun 8-də Azərbaycan Respublikası Prezidenti yanında Gənclər Fondunun dəstəyi ilə reallaşdırılan “Milli Qəhrəmanlarımızı tanı” maarifləndirmə layihəsi çərçivəsində Nizami rayonunun gəncləri ilə görüş keçirilib.

Yeni Azərbaycan Partiyası Nizami rayon təşkilatından AZƏRTAC-a bildiriblər ki, görüşdə əvvəlcə Vətən uğrunda həlak olmuş milli qəhrəmanlarımızın və şəhidlərimizin əziz xatirəsi bir dəqiqəlik sükutla yad edilib. Sonra milli qəhrəmanlarımızdan bəhs edən videoçarx nümayiş olunub.

Tədbirdə çıxış edən layihənin rəhbəri Sevinc Nəcəfova bildirib ki, “Milli Qəhrəmanlarımızı tanı” maarifləndirmə layihəsi Ermənistanın Azərbaycana olan ərazi iddialarının qarşısını almaq məqsədilə döyüşlərə atılaraq şərəfli döyüş yolu keçən və hazırda da həyatda olan və yenə də şərəflə xalqa, vətənə xidmət edən Milli Qəhrəmanlarımızın gənclərimizə tanıdılmasına xidmət edir.

Nizami Rayon İcra Hakimiyyəti başçısının müavini Gülnaz İsrafilova çıxış edərək qeyd edib ki, Azərbaycan torpaqlarının bütövlüyü uğrunda qəhrəmancasına döyüşərək düşmənə dəfələrlə sarsıdıcı zərbələr endirən milli qəhrəmanlarımızın gənclərlə görüşü unudulmaz və yaddaqalan hadisədir. Onların Qarabağ uğrunda gedən döyüşlərdə göstərdikləri qəhrəmanlığın indiki və gələcək nəsillərə əsl örnək olduğunu deyən G.İsrafilova bu gün harada yaşamasından asılı olmayaraq, hər bir azərbaycanlının, xüsusən də gənclərin Azərbaycan Prezidenti, Ali Baş Komandan İlham Əliyevin çağırışı ilə silaha sarılaraq işğal altında olan torpaqlarımızı düşmən tapdağından azad etməyə hazır olduqlarını vurğulayıb.

Görüşdə Milli Qəhrəman Vahid Quliyev gənclərə keçdiyi döyüş yolundan danışıb. O, işğal altında olan torpaqlarımızın düşməndən azad edilməsi naminə yenidən döyüşə getməyə hazır olduğunu deyərək tədbirin təşkilatçılarına və iştirakçılarına minnətdarlığını bildirib.

Çıxış edən YAP Nizami rayon təşkilatının aparat rəhbəri Ramil Vəlibəyov deyib ki, Azərbaycanın xalqa arxalanan Ali Baş Komandanı və qüdrətli ordusu var. Bildirilib ki, Prezident İlham Əliyevin Ağdama, cəbhə xəttinə səfər etməsi cəmiyyətdə ruh yüksəkliyini daha da yüksəltdi və hər bir azərbaycanlı gördü ki, bu ölkə 1992-ci ildə olduğu kimi rəhbərsiz və ordusuz deyil. Ona görə də bu gün hər bir azərbaycanlıda əminlik var ki, torpaqlarımız tezliklə işğaldan azad ediləcək.