SİYASƏT
Müasir güclü Azərbaycan onu göstərir ki, Prezident İlham Əliyev hər bir azərbaycanlının Prezidenti olmağı bacarıb – Təhlil
Bakı, 12 yanvar, AZƏRTAC
Azərbaycanda fevralın 7-nə təyin olunmuş növbədənkənar prezident seçkiləri bir neçə aspektdən təhlil edilə bilər. Əvvəla qeyd etmək lazımdır ki, 44 günlük Vətən müharibəsi və 2023-cü il 19-20 sentyabr tarixli antiterror tədbirləri nəticəsində qazandığımız zəfərlər sayəsində müstəqillik tariximizdə ilk dəfə bütün ərazilərimiz boyu seçkilər keçirmək, xalqımızın iradəsinin ifadəsini təmin etmək imkanları qazanmışıq. Ərazi bütövlüyü və dövlət suverenliyi tam bərpa edilmiş bir ölkənin bütün ərazilərində yerləşən seçki məntəqələrində vətəndaşların siyasi iradəsinin ifadəsi olacaq bu seçkilərin keçirilməsi həm də tarixi zərurətdir. Eyni zamanda, seçkilər Azərbaycanın qazandığı zəfərləri həzm edə bilməyən kənar güclərin ölkə daxilində xalq-hakimiyyət birliyinə zərbə vurmaq, onların çirkin vəsaitləri ilə maliyyələşən marginal qruplar, müxtəlif radikal dini qruplaşmalar, bir sıra qeyri-hökumət təşkilatları və mətbuat orqanları vasitəsilə hökumətin uğurlu siyasətinə kölgə salmaq, cəmiyyətdə süni narazılıq yaratmaq cəhdlərinə dövlətimizin uğurlu əks gedişidir. Sözsüz ki, belə təzyiq mexanizmləri işə yaramayacaq. Digər tərəfdən, fevralın 7-də keçiriləcək seçkilər ölkəmizdə xalq-hakimiyyət birliyinin möhkəmliyinin, Azərbaycan xalqının mövcud hakimiyyətə, yəni, Prezident İlham Əliyev siyasətinə böyük inam və etimadının daha bir nümayişi olacaq. Bu baxımdan növbədənkənar prezident seçkiləri xalq-hakimiyyət birliyinin davamlılığını sübuta yetirəcək uğurlu siyasi gediş kimi də dəyərləndirilməlidir. Həmçinin bu seçkiləri dövlət başçısının Azərbaycan xalqı qarşısında 20 illik fəaliyyəti ilə bağlı hesabatı kimi də qiymətləndirmək olar.
Bu sözləri AZƏRTAC-a açıqlamasında politoloq Anar Əliyev deyib.
Politoloq bildirib ki, Prezident İlham Əliyevin ötən 20 ildə həyata keçirdiyi idarəetmənin, yürütdüyü siyasətin nə qədər uğurlu olduğunu açıq-aydın şəkildə, tutarlı faktlarla ifadə etmək çox rahatdır, amma, eyni zamanda, həm də ciddi məsuliyyət tələb edir. Çünki son 20 il ərzində xalqımızın və dövlətimizin mənafelərinin təmini istiqamətində istisnasız olaraq bütün sahələrdə qazanılmış genişmiqyaslı nəticələrin təhlili və cəmiyyətə çatdırılması hər birimizdən həm də məsuliyyətli vətəndaş mövqeyi tələb edir. Nəzərə alsaq ki, cəmiyyətimiz bu gün anti-Azərbaycan qüvvələrin yalnız yalan və böhtanlara söykənən informasiya təzyiqi altındadır, o zaman məsuliyyətimiz daha da artır. Dövlətimizin başçısı 2003-cü ildə ilk dəfə prezident seçilərkən seçicilər qarşısında verdiyi vədlərin demək olar hamısını yerinə yetirib.
“Bu yazıda xüsusilə iki fikir üzərində dayanmaq istəyirəm: seçkilər ərəfəsində və ötən dövrdə dövlətimizin başçısı tərəfindən dəfələrlə və qətiyyətlə ifadə olunmuş “mən Azərbaycanın ərazi bütövlüyünü və dövlət suverenliyini təmin edəcəyəm və hər bir azərbaycanlının Prezidenti olacağam” fikirlərinin bu gün tam olaraq yerinə yetirildiyini fəxrlə söyləyə bilirik. Bu məqamda 44 günlük Vətən müharibəsi və antiterror tədbirləri çərçivəsində edilən uğurlu gedişlər, ərazi bütövlüyümüzün və dövlət suverenliyimizin təmin olunması, Azərbaycanın beynəlxalq aləmdə durmadan artan nüfuzu, eyni zamanda, vətəndaşların rifah halının getdikcə yaxşılaşması, sosial iqtisadi imkanlarımızın, maddi gəlirlərimizin artırılması istiqamətində atılan addımlar xüsusi vurğulanmalıdır.
Regionların sosial-iqtisadi vəziyyəti ilə bağlı bir sıra konkret göstəricilər ölkəmizin inkişafının real mənzərəsini ifadə edir
2003-cü illə müqayisədə regionların sosial-iqtisadi vəziyyəti ilə bağlı bir sıra konkret göstəricilər də ölkəmizin inkişafının real mənzərəsini ifadə edir. Vaxtilə paytaxtda və digər böyük şəhərlərdə cəmləşməyə məcbur qalan – urbanizasiya prosesinin iştirakçısı olan region sakinləri üçün iş yerlərinin yaradılması, iş şəraitinin yaxşılaşdırılması, normal maddi gəlirlərlə, tibb, təhsil, kommunal xidmətlərlə təmin edilmə və bir çox digər amillər ölkə miqyasında deurbanizasiya prosesinin başlanması ilə xarakterizə olundu. Təsadüfi deyil ki, son 20 ildə Prezident İlham Əliyevin rəhbərliyi ilə Azərbaycanda regionların sosial-iqtisadi inkişafına dair 4 mühüm Dövlət proqramı qəbul və icra edilib. Məhz bu Dövlət proqramlarında insanların regionlara geri dönüşü, məskunlaşması və iş yerləri ilə təminatı, onların sosial rifahının yüksəldilməsi hədəf və məqsəd kimi qarşıya qoyulub. Təsadüfi deyil ki, sözügedən Dövlət proqramları çərçivəsində respublikanın regionlarına yatırılmış investisiyalar 104 milyard manat həcmində qiymətləndirilir”, - deyən A.Əliyev diqqətə çatdırıb ki, həmçinin 2003-cü illə müqayisədə 2022-ci ildə regionlar üzrə məhsul istehsalının nominal həcmi 14 dəfəyə yaxın artıb. Bu, təbii ki regionlarda kənd təsərrüfatı və emal sənayesinin inkişaf sürətini, açılan yeni iş yerlərini, vətəndaşların sosial rifahının, maddi gəlirlərinin artım tempini göstərir. 2023-cü ilin ilk 6 ayına olan məlumata əsasən, 2003-cü ildən etibarən təkcə bölgələrimizdə yaradılan 52 mindən çox emal sənaye müəssisəsi üzrə təxminən 1,8 milyondan çox yeni iş yeri açılıb. Ötən 20 il ərzində regionlarda bir neçəsi beynəlxalq səviyyəli olmaqla, ümumilikdə 8 hava limanı tikilib və ya yenidən qurulub. Burada işğaldan azad olunmuş ərazilərimizdə - Füzuli və Zəngilanda açılan beynəlxalq hava limanlarını xüsusi qeyd etmək lazımdır. Füzuli Beynəlxalq Hava Limanının dünyada bəlkə də analoqu olmayan şəkildə, ən qısa müddətdə inşa olunaraq istifadəyə verilməsi faktı xüsusi əhəmiyyət daşıyır. Eyni zamanda, sayca doqquzuncu olan Laçın hava limanının da tikintisi davam etdirilir. Bütün bunlar da öz növbəsində işğaldan azad olunmuş regionlarımızın Azərbaycan iqtisadiyyatının inkişafına və Böyük Qayıdışa ciddi töhfəsi kimi qiymətləndirilməlidir. Ötən 20 ildə regionlarımızda yol infrastrukturunun inkişaf etdirilməsi istiqamətində də ciddi addımlar atılıb. Regionlarda iqtisadi inkişafın əsas drayverlərindən biri kimi məhz turizm potensialından səmərəli istifadə edilməsi üçün 17 min kilometrdən çox avtomobil yolu inşa edilib və ya əsaslı şəkildə təmir olunub, eləcə də 500-dən artıq körpü və tunel tikilib.
Elmin, təhsilin və tibbi xidmətlərin səviyyəsinin yüksəldilməsi Prezident İlham Əliyevin fəaliyyətinin prioritet istiqamətlərindən biri kimi
Politoloq qeyd edib ki, Prezident İlham Əliyevin hakimiyyəti dövründə dövlətimizin fəaliyyətinin əsas prioritet istiqamətlərdən biri də elmin və təhsilin səviyyəsinin yüksəldilməsi olub. Azərbaycan vətəndaşları dövlətimizin başçısının gənclərin daha yüksək biliklərə yiyələnmələri üçün ən zəruri addımların atılmasına, müxtəlif istiqamətli proqramların hazırlanmasına və həyata keçirilməsinə dəstək verdiyinin hər zaman şahidi olublar. Təsadüfi deyil ki, ötən 20 ildə ölkədə 3300-dən artıq məktəb, 450-dən çox uşaq bağçası tikilib və ya əsaslı şəkildə təmir olunub. Bu, regionlarımızda, hətta ucqar kəndlərimizdə belə vətəndaşlarımızın yüksək təhsilə əlçatanlığının təmin olunmasına, gənclərimizin daha yaxşı təhsil almalarına və peşəkar kadrlar kimi yetişmələrinə ciddi dövlət dəstəyidir. Məhz bu siyasətin nəticəsidir ki, azərbaycanlı tələbələrin dünyanın aparıcı universitetlərində təhsil almaları və peşəkar kadrlar kimi ölkəmizə qayıdaraq işlə təmin olunmalarını əhatə edən, xaricdə təhsilin dövlət tərəfindən maliyyələşdirilməsi ilə bağlı Dövlət proqramları qəbul edilib. Həmin Dövlət proqramları çərçivəsində minlərlə Azərbaycan gənci dünyanın müxtəlif yerlərində yerləşən nüfuzlu universitetlərdə təhsillərini davam etdirmək imkanları qazanıblar. Diqqətəlayiq haldır ki, belə Dövlət proqramlarından bəhrələnənlər arasında bölgələri təmsil edən gənclərimiz əhəmiyyətli paya sahibdirlər.
Eyni zamanda, Prezident İlham Əliyev hakimiyyəti dövründə vətəndaşların, xüsusilə bölgə sakinlərinin sağlamlığına, onların zəruri tibbi xidmətlərə əlçatanlılığının təmin edilməsinə xüsusi diqqət yetirib. Belə həssas yanaşmanın və hədəfyönümlü dövlət siyasətinin nəticəsidir ki, ötən 20 ildə bölgələrimizdə 550-dən çox tibb müəssisəsi tikilib istifadəyə verilib və ya əsaslı şəkildə təmir olunub. Bundan başqa, regionlarda gənclərin asudə vaxtlarının səmərəli təşkili və onların pis vərdişlərdən uzaqlaşması məqsədilə idman məktəblərinin yaradılması, idmana cəlb edilərək sağlam gələcəklərinin təmin edilməsi də Azərbaycan Prezidentinin daim diqqət mərkəzində saxladığı məsələlərdən olub. Belə ki, təsis edilən ayrı-ayrı idman məktəbləri, məşq və toplantı mərkəzləri ilə yanaşı, ötən dövrdə bölgələrimizdə 41 Olimpiya İdman kompleksi gənclərin istifadəsinə verilib.
“Bütün bunlar onu göstərir ki, dövlətimizin başçısı İlham Əliyev doğrudan da 2003-cü ildə ilk dəfə Prezident seçilərkən dediyi kimi, hər bir azərbaycanlının Prezidenti olmağı bacarıb. Prezident İlham Əliyev vətəndaşların ehtiyaclarının qarşılanması, onların ləyaqətli həyat şəraitinin təmin edilməsi istiqamətində var gücü ilə çalışıb və qarşıya qoyulan hədəflərə nail olunub. Odur ki, Azərbaycan xalqının növbədənkənar prezident seçkilərində İlham Əliyevin 20 illik səmərəli və çox böyük nəticələrlə şərəfli tariximizə qızıl hərflərlə yazılmış fəaliyyətinə layiqli qiymət verərək, növbəti dövr üzrə bir daha Azərbaycanın Lideri seçəcəyinə əminəm. Əslində, bu seçimlə biz ölkəmizin fevralın 7-dən etibarən daha fərqli və böyük inkişaf mərhələsinin əsasını qoymuş olacağıq. Beləliklə, Azərbaycan bundan sonra da Prezident İlham Əliyevin rəhbərliyi ilə qələbədən-qələbəyə yürüyəcəkdir”, - deyə A.Əliyev qeyd edib.