İQTİSADİYYAT
Naxçıvan Beynəlxalq Hava Limanının kollektivi mülki aviasiya işçilərinin peşə bayramı gününü qeyd etmişdir
![Naxçıvan Beynəlxalq Hava Limanının kollektivi mülki aviasiya işçilərinin peşə bayramı gününü qeyd etmişdir](/files/2014/2/1200x630/14087121752483539411_1200x630.jpg)
Naxçıvan, 2 iyun (AZƏRTAC). Mülki aviasiya işçilərinin peşə bayramı günü münasibətilə Naxçıvan Beynəlxalq Hava Limanında tədbir keçirilmişdir.
AZƏRTAC xəbər verir ki, tədbirdə çıxış edən hava limanının direktoru Mənşur Gülməmmədli mülki aviasiya işçilərinin peşə bayramı günün təsis edilməsi barədə Azərbaycan Prezidentinin 2006-cı il 18 may tarixli Sərəncamını xatırlatmış, ölkəmizdə bu nəqliyyat növünün dünya standartları səviyyəsinə yüksəldilməsində ümummilli liderimiz Heydər Əliyevin xidmətlərindən ətraflı söhbət açmışdır.
Qeyd olunmuşdur ki, Ulu Öndər Naxçıvan Hava Limanı ilə bağlı iki dəfə qərar qəbul etmişdir. 1992-ci ildə Naxçıvan Muxtar Respublikası Ali Məclisinin Sədri vəzifəsində çalışan dahi şəxsiyyət hava limanının uçuş-enmə zolağının yenidən qurulması təşəbbüsünü irəli sürmüş və bu iş yerli mütəxəssislər cəlb olunmaqla qısa müddət ərzində həyata keçirilmişdir. Uzunluğu 3300 metr olan uçuş-enmə zolağının istifadəyə verilməsi nəticəsində o vaxta qədər yalnız üçüncü dərəcəli təyyarələr üçün nəzərdə tutulan hava limanı “TU-154” tipli təyyarələri də qəbul etməyə başlamış və gün ərzində onun xidmətindən istifadə edənlərin sayı 800-1000 nəfərə çatmışdı.
Hava nəqliyyatına tələbatın artmasının Naxçıvanda daha müasir hava limanının tikilməsini zərurətə çevirdiyini bildirən Mənşur Gülməmmədli demişdir ki, bunu nəzərə alan Ulu Öndər 2002-ci il avqustun 11-də Naxçıvan Muxtar Respublikası Ali Məclisində müşavirə keçirmiş və bu məsələnin həllinə dair qərar qəbul olunmuşdur. 2002-ci il oktyabrın 1-də inşasına başlanan limanda tikinti-quraşdırma işləri ən müasir tələblər səviyyəsində həyata keçirilmişdir. Bu gün Naxçıvan Beynəlxalq Hava Limanından ölkəmizin şəhərləri ilə yanaşı, İstanbul və Moskva şəhərlərinə də müntəzəm uçuşlar həyata keçirilir. Hava limanının gələcək perspektiv planında uçuşların sayının artırılması və əhatə dairəsinin daha da genişləndirilməsi nəzərdə tutulmuşdur.
Xatırladılmışdır ki, bu yaxınlarda Prezident İlham Əliyevin Naxçıvan Muxtar Respublikasına səfəri zamanı Naxçıvan Beynəlxalq Hava Limanının yeni inzibati binasının açılışı olmuşdur. Müasir səviyyədə inşa olunan binada hava gəmilərinə texniki xidmət sahəsi, daşımaların təşkili, aviasiya təhlükəsizliyi, hava hərəkətinin idarə edilməsi, aviasiya-metrologiya və digər müvafiq xidmətlər üçün hərtərəfli şərait yaradılmışdır.
Tədbirdə muxtar respublikada mülki aviasiya işçilərinə göstərilən böyük diqqət və qayğıdan da bəhs edilmişdir. Belə ki, onların əmək haqları artırılır, fərqlənənlərin əməyi qiymətləndirilir. Naxçıvan Beynəlxalq Hava Limanının şəxsi heyəti bu diqqət və qayğıya cavab olaraq uçuşların təhlükəsizliyini təmin etmək və sərnişinlərə göstərilən xidmətin səviyyəsini yüksəltmək üçün səylərini daha da artırır.
Daha sonra limanın direktor müavini Hikmət Əhmədovun, hava hərəkətinin idarə edilməsi xidmətinin rəisi Bağır Rəhimovun, maliyyə şöbəsinin rəisi Rəfael İbrahimovun, aviasiya təhlükəsizlik xidmətinin rəis əvəzi Toğrul Qasımovun çıxışları dinlənilmişdir.
Tədbirə dəvət olunmuş veteran aviatorlar peşə bayramı münasibətilə mülki aviasiya işçilərini təbrik edərək onlara gələcək fəaliyyətlərində uğurlar arzulamışlar.
Sonda bir qrup aviasiya işçisinə Naxçıvan Beynəlxalq Hava Limanının fəxri fərmanları təqdim olunmuşdur.