Üçüncü “Baku Piano Festival” çərçivəsində istedadlı uşaqların konsertləri olub
Bakı, 24 iyun, Anara Axundova, AZƏRTAC
Üçüncü “Baku Piano Festival” çərçivəsində gənc istedadlı musiqiçilərin iştirakı ilə iki konsert, həmçinin “Arts Council Azerbaijan” tərəfindən təşkil olunmuş uşaq rəsmlərinin sərgisi keçirilib. Tədbir
“We are the Future” (“Gələcək bizik”) devizi altında təşkil olunub.
AZƏRTAC xəbər verir ki, “Landmark Rotunda”da baş tutan ilk konsertdə Hüseyn Niftəliyev, Raniya Rzayeva, Ariya Əhmədova, Aylin Abdullayeva, Əbdürrəhman Rzayev, Qafar Həsənzadə, Duyğu Rəsul, Sevda Əmirli, Nurcan Cəfərova, Əminə Nəcəfli, Pərviz Bağırov, Ayan Əsgərova, Adnan Kərimli, Mədinə Paşayeva və Ahmed Nader Abdullah klassik musiqi nömrələri ilə çıxış ediblər.
İkinci konsert “Coffee” and “Jazz JAZZ CLUB”da olub və caza həsr olunub. Tədbirdə Mirəhəd Növrəsli, Hüseyn Kərimov, Məhəmməd Allahverdiyev, Amin Əliyev, Mirsəməd Növrəsli, Cavad Məmmədov, Mətin İbrahimli, Mədinə Paşayeva, Nəzrin İmanova, Ziya Əlişov Yusifli və İsmayıl Vəlizadə iştirak ediblər.
Festivalın art-direktoru Natəvan Növrəsli AZƏRTAC-ın müxbiri ilə söhbətində keçirilən tədbirdən danışıb və qeyd edib ki, təşkilatçıların məqsədi uşaqları ruhlandırmaq, onlar üçün xoşbəxtlik ab-havası yaratmaqdır.
“Biz hər il uşaqlara hədiyyələr, güllər alırıq, sertifikatlar veririk ki, onlarda bayram əhvali-ruhiyyəsi uzun müddət qalsın. Orkestri xüsusi dəvət edirik ki, balaca musiqiçilər onunla çıxış etsinlər və bu faktı öz tərcümeyi-hallarında yazsınlar. Mən çox istəyirəm ki, bütün istedadlı uşaqlar orkestr və dirijorla işləmək imkanı əldə etsinlər – bu, onlara stimul verir və tamamilə başqa səviyyəli ifanın şahidi oluruq!” –deyə həmsöhbətimiz qeyd edib.
Konsertdə xüsusi qayğıya ehtiyacı olan uşaqlar da iştirak ediblər.
Natəvan Növrəsli vurğulayıb: “Bu il konsert beynəlxalq səviyyədə, Birləşmiş Ərəb Əmirliklərindən olan Ahmed Nader Abdullahın iştirakı ilə keçdi. Onun valideynləri bizim festivalı axtarıb tapıblar və konsertdə iştirak etmək üçün müraciət ediblər. Bu uşaq xüsusidir, onda autizm var. O, çox bacarıqlıdır, musiqi duyumludur, istedadlıdır, onu konsert proqramına əlavə etməkdən məmnun olduq. Başqa bir xüsusi oğlan inanılmaz istedadlı gənc musiqiçi Hüseyn Niftəliyevdir. O, ikinci dəfədir festivala qatılır, mürəkkəb parçaları bəzi peşəkar musiqiçilərdən daha yaxşı ifa edir. Xüsusi uşaqların istedadını nümayiş etdirmək imkanı olmalıdır, dünya onları diqqətdən kənarda qoymamalıdır”.
Tədbir çərçivəsində “Arts Council Azerbaijan”ın təşkilatçılığı ilə uşaq rəsmlərindən ibarət sərgi də keçirilib. Sərgidə 6 yaşdan 15 yaşa qədər gənc rəssamlar - Əminə Cabbarlı, Nazim Məmmədli, Sürəyya Məmmədli, Suad Tağıyeva, Aylin Rzayeva, Fərəh Mürşüdlü, Əminə Mirzəliyeva, Amin Mirzəliyev, Yevangelina Lisanova, Rəşid Əliyev, Elvira Əliyeva, Məryəm Əliyeva, Maqsud Əliyev , Fidan Abbasəliyeva, Nigar Mahmudbəyova, Umud Həbibov iştirak ediblər. Rəsmlər musiqi mövzusunda çəkilib və onların hər birində piano əsas element kimi göstərilir.
“Arts Council Azerbaijan” təşkilatının sədr müavini Sona Quliyeva AZƏRTAC-a bu tədbirin əhəmiyyətindən danışıb.
“Arts Council Azerbaijan” Azərbaycan mədəniyyətinin və incəsənətinin inkişafına hər zaman dəstək verir. Gənc istedadlara xüsusi diqqət yetirilir. Sonuncu sərgi və konsert Bakı Piano Festivalı ilə növbəti uğurlu əməkdaşlıq idi”, - deyə həmsöhbətimiz qeyd edib.
Üçüncü “Baku Piano Festival” iyunun 16-dan 29-dək paytaxtda keçirilir. Bakılılar və şəhərin qonaqları üçün müxtəlif ölkələrin virtuozlarının musiqi konsertlərindən ibarət rəngarəng proqram hazırlanıb. Bundan əlavə, festival çərçivəsində film nümayişləri, bədii tədbirlər və teatr tamaşaları təşkil olunur.
Bölmənin digər xəbərləri
