CƏMİYYƏT
Naxçıvan şəhərində payız-qış mövsümünə hazırlıqla bağlı kompleks tədbirlər həyata keçirilir
![Naxçıvan şəhərində payız-qış mövsümünə hazırlıqla bağlı kompleks tədbirlər həyata keçirilir](/files/2014/2/1200x630/14087125521553539038_1200x630.jpg)
Naxçıvan, 8 avqust (AZƏRTAC, Rauf Əliyev). Naxçıvan Şəhər İcra Hakimiyyətində yığıncaq keçirildi.
AZƏRTAC xəbər verir ki, Naxçıvan Muxtar Respublikası Ali Məclisində 2014-2015-ci ilin payız-qış mövsümünə hazırlığa həsr olunmuş müşavirədə qarşıya qoyulmuş tapşırıqların icrası ilə əlaqədar keçirilən tədbiri açan Naxçıvan Şəhər İcra Hakimiyyətinin başçısı Vüqar Səfərov payız-qış mövsümündə qarşıya çıxa biləcək problemlərin həlli istiqamətində bir sıra kompleks tədbirlərin görülməsinin əhəmiyyətindən danışdı.
Naxçıvan Şəhər İcra Hakimiyyəti başçısının müavini Səyahət İmanov məruzə ilə çıxış edərək bildirdi ki, 2013-2014-cü ilin qış mövsümü başa çatdıqdan sonra transformator yarımstansiyalarında əsaslı və cari təmir işləri aparılıb, istismar müddəti başa çatmış elektrik dirəkləri yenisi ilə əvəz olunub. Cari ilin qış mövsümünə hazırlıqla əlaqədar, ümumilikdə, 94 ədəd istismar müddəti başa çatmış elektrik dirəkləri yığışdırılıb, 14 min 334 metr uzunluğunda elektrik verilişi hava xətləri yeraltı kabellə əvəz olunub. Bundan əlavə, 0,4 kilovoltluq elektrik verilişi hava xətlərində qəza hallarının aradan qaldırılması üçün mühafizə zonası altında yerləşən ağaclarda budama işləri aparılıb, yararsız vəziyyətdə olan 7 min 600 metr uzunluğunda elektrik naqilləri yenilənib, 2014-cü ilin qış mövsümünə hazırlıqla bağlı 2 ədəd yeni transformator yarımstansiyası quraşdırılıb, 274 ədəd sıradan çıxmış elektrik hesablama sayğacları yeniləri ilə əvəzlənib.
Diqqətə çatdırıldı ki, Naxçıvan şəhərində 2014-2015-ci ilin payız-qış mövsümünü mütəşəkkil keçirmək üçün şəhər sanitar təmizlik idarəsində daxili avtomobil və piyada yollarını qardan təmizləmək məqsədilə qumsəpən və qartəmizləyən maşınlar saz vəziyyətə salınıb, qum gətirilərək tədarük edilib, fəhlələr üçün xüsusi isti geyim formaları sifariş verilib. Bəhs olunan mövsümi dövr üçün Naxçıvan şəhərində 8 marşrut üzrə əhaliyə xidmət göstərəcək 56 avtobus tam saz vəziyyətə salınıb, qış mövsümü üçün avtobusların hərəkət qrafiki tərtib olunub.
Əhalinin keyfiyyətli içməli su ilə təmin edilməsi və kanalizasiya sisteminin yenidən qurulması ilə bağlı görülmüş işlərdən bəhs edən məruzəçi bildirdi ki, 2014-cü il avqustun 1-nə olan məlumata görə, Naxçıvan şəhərində 212,2 kilometr uzunluğunda kanalizasiya, 222,5 kilometr isə içməli su xətti çəkilib. Bu mövsümdə Naxçıvan şəhərində 15 məktəb, 9 uşaq bağçası fərdi, 1 uşaq bağçası mərkəzləşdirilmiş qazanxana, 1 məktəb isə neft sobası ilə qızdırılacaq.
Tədbirdə müvafiq xidmət təşkilatlarının rəhbərləri payız-qış mövsümünə görülən hazırlıq işləri ilə barədə ətraflı məlumat verdilər.
Sonra qarşıya qoyulmuş tapşırıqların vaxtında yerinə yetirilməsi istiqamətində həyata keçiriləcək tədbirlərə dair müzakirələr aparıldı.