Bakı, 26 may (AZƏRTAC). Azərbaycan Respublikasının Misir Ərəb Respublikasındakı səfirliyindən AZƏRTAC-a bildirmişlər ki, neft-qaz sənayesi üzrə aparıcı beynəlxalq jurnallardan hesab olunan “The Oil and Gas Year” jurnalının 2010-cu ilin yekunlarına həsr olunmuş növbəti sayında səfir Şahin Abdullayevin Azərbaycanın neft sənayesinin tarixi, “Əsrin müqaviləsi”, respublikamızın neft-qaz ixrac infrastrukturu, Azərbaycanın Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsündə (MHŞT) iştirakı, neft-qaz və iqtisadiyyatın digər sahələrində Azərbaycan ilə Misir arasında əməkdaşlığın perspektivlərinə dair müsahibəsi dərc edilmişdir.

Müsahibədə XIX əsrdə Azərbaycanın dünya neft sənayesində aparıcı rol oynadığını və XX əsrin əvvəllərində dünya neft hasilatının yarısının Azərbaycanın payına düşdüyünü qeyd edən Ş.Abdullayev ümummilli lider Heydər Əliyevin müəllifi olduğu neft strategiyası əsasında 1994-cü ildə “Əsrin müqaviləsi”ni imzaladığı barədə məlumat verərək, bu sazişin Azərbaycanın neft tarixində yeni başlanğıc olduğunu və bu sazişin ardınca 19 ölkədən 41 neft şirkəti ilə 26 neft-qaz sazişinin imzalandığını oxucuların diqqətinə çatdırmışdır.

Bu sazişlə Xəzər dənizində yeni əməkdaşlıq mühitinin təşəkkül tapdığını deyən səfir hazırda Azərbaycanın şaxələndirilmiş neft-qaz ixrac kəmərləri vasitəsilə qlobal enerji təhlükəsizliyində mühüm rol oynadığını vurğulayaraq, uğurlu neft strategiyasının davamı kimi, Azərbaycanın potensial qaz ixracatçısına çevrildiyini və dünya qaz bazarının sabit inkişafına töhfə verdiyini qeyd etmişdir.

Neft-qaz gəlirlərinin şəffaf və səmərəli idarə olunması üçün Azərbaycanda Dövlət Neft Fondunun təsis edildiyini və gəlirlər barəsində bütün məlumatların ictimaiyyətə tam açıq olduğunu bildirən Ş.Abdullayev Azərbaycanın MHŞT-yə ilk qoşulan və onun icrasını uğurla həyata keçirən qabaqcıl dövlət olduğunu nəzərə çarpdırmışdır.

Azərbaycan-Misir əlaqələrinə toxunan səfir Azərbaycanın tarixən İslam dünyasının bir hissəsi olduğunu və İslam sivilizasiyasının mütərəqqi dəyərlərini və irsini bölüşdüyünü qeyd edərək, müstəqilliyini bərpa etdikdən sonra Azərbaycanın ərəb-İslam dünyası ilə əlaqələrin inkişafına mühüm əhəmiyyət verdiyini və bu strateji xətt üzrə Azərbaycan-Misir əməkdaşlığının inkişaf etdiyini bildirmişdir. Misir ilə Azərbaycan arasında enerji, ərzaq və kənd təsərrüfatı, əczaçılıq, turizm, informasiya-kommunikasiya texnologiyaları kimi sahələrdə perspektiv əməkdaşlıq imkanlarının olduğunu diqqətə çatdıran Ş.Abdullayev əlavə etmişdir ki, Misirin keçmiş neft naziri S.Fəhmi və Azərbaycanın sənaye və energetika naziri N.Əliyevin qarşılıqlı səfərləri neft-qaz sahəsində birgə işbirliyi üçün yeni üfüqlər açmışdır.

######