Bakı, 13 fevral (AZƏRTAC). Fevralın 13-də Nizami Rayon İcra Hakimiyyətində 2013-cü ilin sosial-iqtisadi inkişafının yekunlarına və 2014-cü ildə qarşıda duran vəzifələrə həsr olunmuş geniş yığıncaq keçirilmişdir.

AZƏRTAC xəbər verir ki, yığıncaq iştirakçıları əvvəlcə ümummilli lider Heydər Əliyevin rayon icra hakimiyyətinin inzibati binasının foyesindəki abidəsi önünə gül dəstələri qoymuş, əziz xatirəsini ehtiramla yad etmişlər.

Yığıncaqda ötən il rayonda aparılan quruculuq işlərini əks etdirən videoçarx nümayiş olunmuşdur.

Tədbirdə bildirilmişdir ki, 2013-cü ildə rayonda fəaliyyət göstərən müəssisələr tərəfindən 424,2 milyon manat dəyərində məhsul istehsal edilmiş və xidmətlər göstərilmişdir. Bu, ötən ilin müvafiq dövrünə nisbətən 5 faiz çoxdur. Sənayedə istehsalın 34,7 faizi qeyri-dövlət sektorunun payına düşmüşdür. Dövlət sektorunda 277,2 milyon manatlıq və ya ümumi istehsalın 65,3 faizi qədər məhsul istehsal edilmişdir.

Ötən il rayonda iqtisadiyyatın və sosial sahələrin inkişafı üçün bütün maliyyə mənbələri hesabına əsas kapitala 186,5 milyon manat həcmində investisiya yönəldilmişdir ki, bu da 2012-ci ilin müvafiq dövrünə nisbətən 32,6 faiz artıq olmuşdur. Əsas kapitala yönəldilmiş investisiyaların 177,2 milyon manatı və ya 95 faizi dövlət, 9,3 milyon manatı və ya 5 faizi isə qeyri-dövlət müəssisələrinin payına düşmüşdür. Adambaşına düşən investisiyaların həcmi il ərzində 97 manat olmuşdur.

Diqqətə çatdırılmışdır ki, 2013-cü ildə rayonda 1996 yeni iş yeri açılmışdır.

Yığıncaqda çıxış edən Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva rayonun sosial-mədəni həyatında gənclərin rolundan danışmış, onların bir çox dövlət əhəmiyyətli tədbirlərdə fəal iştirak etdiklərini söyləmişdir.

Azərbaycan Respublikası Prezidenti Administrasiyasının məsul işçisi Tağı Tağıyev, Milli Məclisin deputatları Flora Qasımova, Rasim Musabəyov və Rüfət Quliyev yığıncaqda çıxış edərək 2013-cü ildə respublikamızda ictimai-siyasi, sosial-iqtisadi və mədəni sahələrdə əldə olunan uğurlar barədə danışmış, qarşıda duran vəzifələrə toxunmuş, tövsiyələrini vermişlər.

Sonra Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) icraçı direktoru Vüqar Səfərli çıxış edərək Prezident İlham Əliyev tərəfindən mətbuata göstərilən qayğıdan və jurnalistlərin sosial rifah halının daha da yaxşılaşdırılması istiqamətində həyata keçirilən tədbirlərdən danışmışdır.

Tədbirdə media ilə sıx əməkdaşlığına görə rayon icra hakimiyyətinin başçısı Tahir Budaqova KİVDF-nin xüsusi mükafatı təqdim edilmişdir.

Qeyd olunmuşdur ki, ötən il noyabrın 9-da Nizami Rayon İcra Hakimiyyəti və KİVDF tərəfindən “Nizami rayonunun sosial-iqtisadi inkişafı: real vəziyyət və perspektivlər” mövzusunda fərdi jurnalist yazıları müsabiqəsi elan edilmişdir. Müsabiqəyə 43 yazı verilmiş və jurnalistlərin 17-si mükafata layiq görülmüşlər.

Tədbirdə müsabiqənin qaliblərinə mükafatlar təqdim edilmişdir.